පල්ලියේ බිම් මහල ජලයෙන් පුරවා අන්තවාදීන්ගෙන් වැඩිදෙනෙකු මරා දැමූහ

මොහාන් ධර්මරත්න පරිවර්තනය කළ කාමන් බින් ලාඩන්(Carmen Bin Ladin) ගේ The Veiled Kingdom කෘතිය ‘වට තිර ලූ රාජ්ජය’ ලෙස සෑම සදුදා සහ බ්‍රහස්පතින්දා දිනකම කොටස් වශයෙන් පළවේ. අද පළවන්නේ එහි 24 වන කොටසයි.

මා උගුලක සිරවී සිටින බවක් දැනිණි. මා සාදරයෙන් පිළිගත් හැම වෙනසක්ම තාවකාලික වූ බව පෙනී ගියේය. ඇරුණු හැම දොරක්ම ඉතා කෙටි කාලයකට විය. අවුරුදු දෙකක් පමණ සවුදීහු ලෝකයට විවෘත වී සිටියහ. දැන් ඔවුහු යළිත් ඔවුන්ගේ සම්ප්‍රදායයන් හා වටිනාකම් වෙත ආපසු යන බව පෙනිණි.

ඒ ගිම්හානයේදී අපි එක්සත් ජනපදය බලා ගියෙමු. එය එක් අතකින් යෙස්ලාම්ට ව්‍යාපාරික සංචාරයක් වූ අතර, ම‌ට වැඩිමනත් අවශ්‍ය වූයේ මේරි මාර්තාගේ සහනශීලී, ආදරණීය වැළඳගැන්ම තුළට ගුලිවීමටය. මාස ගණනක් වූ භයානක කලබැගෑනියෙන් පසු මා දැකීම ඇගේ සන්තෝෂයට හේතු විය. ඇමරිකාවට යළි පැමිණීම මා හට විශාල සහනයක් ගෙනදුන් නමුදු, යෙස්ලාම්ගේ රැස්වීම් යොදාගෙන තිබුණු සෙන්ට් ලුයී වෙත ලොස් ඇන්ජලීස් සිට පැමිණීමට අප සූදානම්ව සිටි දිනට පෙර දිනයේ මේරි මාර්තා කඳුළු සලමින් මට දුරකථනයෙන් ඇමතුවාය. ඇගේ සොහොයුරා වන ජිමී, ඔහුට අයත් ගුවන් යානයෙන් ඇරිසෝනා සිට කැලිෆෝනියාව බලා පියාසර කරමින් සිටියදී අතුරුදහන් වී ඇත. ඔහු සොයා සෝදිසි මෙහෙයුමක් කෙරෙමින් තිබුණු අතර, ඈ ඇරිසෝනා හි ඇගේ දෙමාපියන් වෙත ගුවනින් යමින් සිටියාය.

එවැනි අවස්ථාවක මේරි මාර්තා හැරදමා යාම මට කළ නොහැක්කක් වූ අතර, අප ඈ සමඟ රැඳිය යුතු යැයි මම අවධාරණය කළෙමි. යෙස්ලාම් වේගයෙන් ක්‍රියාත්මක විය. මේරි මාර්තා හා මා ඇරිසෝනා වෙත ළඟා වෙද්දී, යෙස්ලාම් ගුවන් යානා දෙකක් කුලියට ගෙන ඉන් එකක සහාය නියමුවා වෙමින් ජිමී සෙවීමෙහි නිරතව සිටියේය. ගුවන් යානා රාශියක් උදේ සිට රෑ වනතුරු ගුවන්ගත වී ඔහු සෙවූ අතර, දින පහකට පසු ජිමීගේ ගුවන් යානයේ සුන්බුන් සොයාගනු ලැබුවේය. ආතතියත් ශෝකයත් යෙස්ලාම්ගේ මුහුණේ දිස්විය. ඔහු කතා නොකළේය. යෙස්ලාම්ට වයස අවුරුදු දහ හතේදී ඔහුගේ පියා ගුවන් අනතුරකින් මිය ගිය බව මට සිහිපත් විය.

මගේ හදවත මේරි මාර්තා සහ ඇගේ පවුල සමඟ රැඳුණු මුත්, අප යෙස්ලාම්ගේ ව්‍යාපාරික කටයුතු සඳහා යා යුතු වූයේය. දුකින් පිරි හදවත් ඇතිව, වචනයෙන් කිසිවක් පිට නොකොට අප සවුදි අරාබිය වෙත ආවෙමු. එය අතිශයින් දුක්බර ගිම්හානයක් වූයේය.
ඉරානයේ පුපුරා ගිය දේශපාලන ගිනිකන්ද හා මැදපෙරදිග පුරා පතිත වුණු එහි අලු දුහුවිලි හේතුවෙන් මුලුමහත් සවුදි අරාබියම වශී වී සිටියේය. අප කතා කළේ ඒ ගැනමය. ඉඳහිට අප බලන්නට පැමිණෙන අමුත්තකු වූ ඇමරිකානු තානාපති නිලධාරී ජෝන් ලිම්බර්ට් එක්තරා බ්‍රහස්පතින්දා දිනෙක අප හා ටෙනිස් ක්‍රීඩා කරමින් සිටින අතර, පසුදින ඔහු ඉරානය බලා යාමට නියමිත බව කීවේය. දින කිහිපයකට පසුව ටෙහෙරානයේ ඇමරිකානු තානාපති කාර්යාලයේදී ඔහුව ප්‍රාණ ඇපයට ගනු ලැබිණි. ඔහු සහ දුසිම් ගණනක් වූ අනෙක් පුද්ගලයින්ව රූපවාහිනී කැමරා ඉදිරියේ පෙරහැරක් මෙන් රැගෙන ගියේ දෙවියන් පිළි නොගන්නා ඇමරිකානුවන්ට එරෙහිව ඉස්ලාමික පළිගැනීමෙහි දැවැන්තබව විදහා දැක්වීමටය. ප්‍රාණ ඇපයට ගෙන දින 444ක් රඳවාගෙන සිටි පනස් දෙදෙනෙකුගෙන් සමන්විත කණ්ඩායමේ ජෝන් ද සිටියේය. ඔහුගේ බිරිඳ පර්වානෙයි මුහුණ දෙමින් හුන් බියජනක පරීක්ෂාව තුළ ලොයිස් වෙස්ට් ඈ අස්වැසීමට උත්සාහ දැරුවාය. අප හැම දෙනාම බලවත් සේ කම්පාවට පත්ව සිටියෙමු.

ඊළඟට, නොවැම්බරයේ එක් උදෑසනක වැඩට ගොස් සිටි යෙස්ලාම් විගසින් නිවසට යළි පැමිණියේය. බෙහෙවින් කැළඹී, සුදුමැලි වී සිටි ඔහු, “මක්කම අල්ලගෙන,” යැයි මට කීවේය. සියගණන් ඉස්ලාමික අන්තවාදීහු මහ පල්ලිය තුළට වැදී ඉස්ලාමයේ ශුද්ධතම වූ ස්ථානයේ පාලන බලය අල්ලාගෙන සිටියහ. ඔවුන්ගේ නායකයා ඇතැම් අල්-සවුද්වරුන්ගේ, විශේෂයෙන්ම මක්කම ආණ්ඩුකාර නායෙෆ් කුමාරයාගේ දූෂිත බවත් විනෝදකාමී ජීවිතයත් පිළිබඳව ප්‍රකෝපකාරී ප්‍රකාශයන් පල්ලියේ යාඥාවට හඬගසන පූජකයා හරහා ප්‍රචාරය කරන්නට පටන් ගත්තේය. අන්තවාදී බලවේග මක්කමට රිංගාගෙන ඇත්තේ කිසිවිටෙක පරීක්ෂාවට ලක් නොවන බින් ලාඩන් සමාගමේ ට්‍රක් රථ යොදාගනිමිනි.
එය මුලින්ම දැනගත්තේ අප විය යුතුය. මක්කම පිහිටි නඩත්තු කාර්යාලයක බින් ලාඩන්වරුන්ගේ ස්ථිර කාර්යමණ්ඩලයක් ස්ථාපිත කොට තිබිණි. කැරලිකාරයෝ මහ පල්ලියට කඩා වදින විටම, ප්‍රචණ්ඩ ක්‍රියාවක් සිදුවන්නට පටන්ගත් බව බින් ලාඩන් සේවකයකු විසින් වහාම ජිද්දා හි පිහිටි ප්‍රධාන කාර්යාලයට දුරකථනයෙන් දන්වා තිබිණි. ඉන්පසු කැරලිකරුවෝ දුරකථන කම්බි කපා දැමූහ. පුදුමයකට මෙන් ඉස්ලාමයේ ශුද්ධතම නගරයේ කැරැල්ලක් හටගෙන තිබෙන බවට කාලිඩ් රජතුමාට දන්වා තිබෙන්නේද බින් ලාඩන් සමාගම විසිනි. ඔහුගේ පළමු තීරණවලින් එකක් වූයේ සියලුම දුරකථන මාර්ග වසා දැමීමයි. අම්මාට දුරකථන ඇමතුමක් ගෙන ඈ සනසාලීමට මට අවශ්‍ය වූ නමුත්, පිටතට ඇමතුමක් ගැනීම සඳහා දුරකථන මාර්ගයක් ලබාගත නොහැකි විය. පහරදීම පිළිබඳව දින කිහිපයක් යනතුරුම වාර්තා කිරීමට පුවත්පත් නිර්භීත නොවූ නමුත් ආරංචි කෙසේ හෝ පැතිර ගියේය. හැම තැනක්ම මහා කලබලකාරී වූ අතර, ගුවන්යානා බිමට බස්වා තබනු ලැබීය.
සොහොයුරෝ අලුත් ප්‍රවෘත්ති සමඟ පැමිණීමත් පිටවීමත් නිසා උමතුවක් මෙන් නිවස පිරී යාමත්, නැවත හිස්වීමත් වේගයෙන් සිදුවිය. යෙස්ලාම් මහත් කලබලයෙන් ගෙදර සිට කාර්යාලයට දිව්වේ පිස්සකු මෙනි. මක්කම නගරයේ, විශේෂයෙන්ම මහ පල්ලියේ එකම විස්තරාත්මක සිතියම් තිබුණේ බින් ලාඩන්වරු සතුව පමණි. සලෙම් කුමාරවරුන් සමඟ දිවා රෑ දෙකෙහි රැඳී උන්නේය. දින ගණන් සාකච්ඡා කොට අන්තවාදීන් සමඟ සමථයකට පැමිණීමට බොහෝ උත්සාහ දැරීමෙන් අනතුරුව, අන්තවාදීන් අල්ලාගෙන සිටි ශුද්ධ දේවස්ථානයට හමුදාමය පහරදීමක් කරන්නට ඔවුහු එකක් පසුපස එකක් සැලසුම් සකස් කළ නමුදු, ඒ සියල්ලම අසාර්ථක විය.

මක්කම සිට ජිද්දා දක්වා දිවෙන මාර්ගයේදී සිය සොහොයුරු මහ්රූස් අත්අඩංගුවට ගෙන තිබෙන්නේ යැයි ඊළඟට යෙස්ලාම් මට කීවේය. පොලිසිය ඔහුගේ මෝටර් රථයේ තිබී පිස්තෝලයක් සොයාගෙන තිබිණි. අවුරුදු කිහිපයක් ලෙබනනයේ බටහිර පන්නයේ ජීවිතයක් ගතකරමින් සිටියද, ඒ වනවිට ඔහු දැඩි ආගමානුකූල මිනිසකු වී සිටියේය. දැඩි චාම්බව ප්‍රදර්ශනය කරනුවස් හෙතෙම සිය තෝබ් කබාය ඇස්වටය පෙණෙන තරමට කොටට ඇන්දේය. එසේ නොවන්නට මා ඔහුද යෙස්ලාම්ගේ තවත් එක් සොහොයුරකු ලෙස පමණක් සලකනු ඇත්තේය.
අන්තිමේදී, සුප්‍රසිද්ධ GIGN ප්‍රංශ පැරෂුට් භට කණ්ඩායම කැඳවන ලදී. ඔවුහු පල්ලියේ බිම් මහල ජලයෙන් පුරවා අන්තවාදීන්ගෙන් වැඩිදෙනෙකු මරා දැමූහ. (එම ගොඩනැඟිල්ල වෙත යාමට හැකිවන්නට පෙර ඔවුන්ට ඉස්ලාම් ආගමට හැරවීමේ ලොව වේගවත්ම ක්‍රමවේදය අනුගමනය කරන්නට සිදුවිය). පුවත්පත් කලාවක් නොමැති වූ රටක කටකතා වල් සතුන් මෙන් දිව ගියේය: ප්‍රංශකාරයෝ කැරලිකාරයින්ට විදුලිසැර වැද්දුවාය, ඒ කොහොමටවත් ප්‍රංශකාරයින් නොවේය, කැරලිකාරයින්ව කොහොමටවත් අල්ලාගන්න බැරිවුණාය, වැනි කටකතා ඒ අතර විය. ඊළඟට, දුසිම් ගණන් මිනිස්සු රට පුරා තැන් තැන්වලදී මරණීය දණ්ඩනයට පත්කරනු ලැබූහ.
ඊළඟට, මහ්රූස් හිරෙන් නිදහස් කරනු ලැබීය. සත්තකින්ම මහ්රූස් අල්-සවුද්වරුන්ට එරෙහි කුමන්ත්‍රණයකට දායක වූයේද? ඔහු එවැන්නකට දායක වන්නට ඇති බවට බොහෝ කටකතා පැතිරුණු බව මා දැන සිටි නමුත්, කෙසේ හෝ ඔහුව නිදහස් කරන ලදී. පොලිස් අත්අඩංගුවෙන් නිදහස් කරන ලද එකම සැකකරුවා ඔහු බව මිනිස්සු කිහ.

දෙසැම්බර් මුල හරියේ නැඟෙනහිර සවුදි අරාබියේ කතීෆ් නගරයෙහි ප්‍රචණ්ඩ ක්‍රියා ඇවිලුනු බව අපට අසන්නට ලැබිණි. කැරලි ගැසීම් හා මරණ බොහෝ ගණනක් සිදුවී තිබිණ. මේ කලාපයේ ජීවත් වූයේ කුඩා සුලුජාතික කණ්ඩායමක් වූ, බෙහෙවින් ගැරහීමට පාත්‍ර වූ වහබ්වාදී නොවන මුස්ලිම් ජන කොටසකි. බහුතරයක් ඉරාන ජාතිකයින් මෙන් ඔවුහු ෂියා මුස්ලිම්වරුන්ය. ඇතැම්විට ඉරානයේ කොමෙයිනිගේ විප්ලවයෙන් ආභාෂය ලැබූ ෂියාවරු දිවැසිවර මුහම්මද්ගේ මුනුබුරු හුසේන්ගේ මරණය අනුස්මරණය කරන ඔවුන්ගේ වාර්ෂික පෙරහැර සඳහා එම වසරේදී අසාමාන්‍ය ප්‍රමාණයක ජන සන්නිපාතයක් මහමඟට ගෙන ආවා වන්නට ඇත. මේ පෙරහැරට මුතව්වෝ මැදිහත් වී තිබේ. විවෘත කැරැල්ලක් දින කිහිපයක් යනතුරු සිදුවී තිබුණු අතර, මියගිය සංඛ්‍යාව දැනගැනීමට පවා නොහැකි වී ඇත. යෙස්ලාම්ගේ කලබලවීම් වඩාත් ක්ෂණිකව සිදුවන්නට පටන්ගත් අතර, ඔහු අස්වසන්නට තැත්කළ මා පවා සිටියේ භීතියට පත්වය. අප හැමදෙනාටම කුමක් සිදුවන්නට යන්නේද?
ඊළඟට, මක්කම කැරැල්ලෙන් යන්තමට සති තුනක් ඉක්ම යනවාත් සමඟම සෝවියට් සංගමය ඇෆ්ඝනිස්ථානය ආක්‍රමණය කළේය. ලෝකයේ සිදුවන සිදුවීම් අප පසුපස එළවාගෙන එන්නා සේ පෙනිණි. අසල්වැසි රටක සිදුවූ විප්ලවයකින් හා රෝමෝද්ගමනය වන අභ්‍යන්තර කැරැල්ලකින් තෝන්තු වී, වර්ධනය වන ස්වදේශික රැඩිකල්වාදයේ ජාලය තුළ සිරවී හුන් සවුදීහු, දැන් ආසන්නයේ පිහිටි තවත් රටක් මත සෝවියට් යුද ටැංකි ගොර හඬ නඟමින් ගමන් කරනු බලා සිටියහ. ආක්‍රමණකාරී, අදේවවාදී කොමියුනිස්ට් ගල් ටැඹ, අහේනියෙන් පෙළෙන දුගී මුස්ලිම්වරුන් සිටින රාජ්‍යයකට පහර දී ඇත. මුස්ලිම් ලෝකයේ හැමදෙනාම මෙන් අල්-සවුද් කුමාරවරුද ගල්ගැසී සිටියහ. ඔවුහු සහෝදර මුස්ලිම් ජනයා වෙනුවෙන් සැලකිලිමත් වන්නේ යැයි පෙන්විය යුතු බව සති කිහිපයක නිහැඬියාවකින් පසු කුමාරවරු තීරණය කළහ. ඇෆ්ඝන් ප්‍රතිරෝධයට මූල්‍ය ආධාර සැපයීමට ඔවුහු ඉදිරිපත් වූහ.

සෝවියට් හමුදා භටයින් සමඟ සටන් කරන ඇෆ්ඝන් ජාතිකයින්ට හා පළායන සරණාගතයින් වෙනුවෙන් මුදල්, යන්ත්‍රෝපකරණ සහ පාවිච්චි කළ ඇඳුම් ප්‍රදානය කරන ලෙස සාමාන්‍ය ජනතාවගෙන් ඉල්ලා පල්ලිය විසින් නිවේදන නිකුත් කරමින් තිබෙන්නේ යැයි යෙස්ලාම් මා සමඟ කීවේය. සහෝදර මුස්ලිම්වරුන් වන මුජාහිදීන්වරුන්ට සහාය වීමට ස්වේච්ඡාවෙන් ඇෆ්ඝනිස්ථානයට යන්නවුනට දැවැන්ත මුදල් ආධාර ලබා දෙන බවට රජය නිවේදනය කළේය. එසේ ස්වේච්ඡාවෙන් ඉදිරිපත් වූවන් අතර මගේ මස්සිනා, ඔසාමාද වූයේය.

ඇෆ්ඝන් ජනයාගේ අභිප්‍රාය වෙනුවෙන් කැපවන විට, ඔසාමා සිය අධ්‍යාපන කටයුතු සම්පූර්ණ කළා පමණකි. සමුගැනීමේ සාද නොමැතිව ඔහු ඉතා ඉක්මනින් පිටත් වූයේය. ඔහුගේ ප්‍රතිරූපයත්, ශක්තිමත් අදහසුත් නිසා ඔසාමා ආකර්ශනීය චරිතයක් වූ නමුදු, ඇෆ්ඝන් ප්‍රතිරෝධය කුළ නායකත්වයක් ගැනීමට තරම් සුදුසු පුද්ගලයකු විනැයි කිව නොහැකිය. එපමණක් නොව, සවුදි ආධාර ස්වේච්ඡා හමුදාව වෙත රැගෙන ඒම සඳහා ඔහු නිරන්තරයෙන් පාකිස්ථානය වෙත දීර්ඝ ගමන්වල යෙදෙන්නට පටන්ගත්තේය. පාකිස්ථානයේ සෞඛ්‍ය සායන සහ පුහුණු කඳවුරු සකස් කිරීමට උදව් කළ ඔහු, ඇෆ්ඝන් අරගලය වෙනුවෙන් වැඩි වැඩියෙන් දායක වෙමින්, අවුරුද්ද පුරාම අඩුවැඩි වශයෙන් පාකිස්ථානයේම ජීවත්වන්නකු බවට ඉක්මනින්ම පත් වූයේය.