Sex Education ඕනෙද ,එපාද ?
ඒ මිනිහා දුවගෙ ඇඟ අතගාලා තිබ්බට යටිකය අතගාලා තිබ්බෙ නැහැ මිස් , යටිකය අතාගාලා නැති නිසා ඒක අතවරයක් නෙමේ කියලා හිතලා අපි පොලීසි ගියෙ නැහැ
( ලංකාවෙ එක්තරා අම්මෙක් )
කොල්ලෙක් නිසා බය නැතුව ඕන තැනක දාලා යනවා ,
කෙල්ලොන්ව වගේ පරිස්සම් කරන්න දෙයක් නෑනෙ
( තවත් එක තාත්තෙක් )මට දරුවා ලැබුණේ අවුරුදු 17 න් , බඩේ අමාරුව හැදිලා බේත් ගන්න ගියාම බබෙක් හම්බෙන්න ඉන්නව කිව්වම ළමයෙක්
හම්බෙන්නෙ මොනවා කළාමද කියල මම දැනගෙන හිටියෙ නැහැ ,
මාමා මම දන්න දවසෙ ඉඳලම ඉස්කෝලෙ ඇරිලා ආවම මට එහෙම කරා .
( දුවෙක් වෙන්න කලින් අම්මෙක් වුනු දරුවෙක් )
මේ තුනම පසුගිය වසරේ ලංකාව ඇතුලෙ සිද්ධවුණු ඇත්තම සිද්ධි ,
මනෝ උපදේශන ජීවිතයේ අත්දැකීම් නිසා
ලියනවනම් මේ වගේ සිද්ධි මට තව සිය ගානක් ලියන්න පුළුවන් ,
ඒ ලිස්ට් එක නොලියා මෙහෙම ලියන්නම්
දැන් මේ ලිංගික අධ්‍යාපනය කියන්නෙ මොකද්ද ?
සමහරු උන්මන්තකයෝ වගේ මේකට විරුද්ධ වුනාට ලිංගික අධ්‍යාපනය කියන්නෙ සෙක්ස් කරන විදිහයි ,ළමයි හදන විදිහයි ප්‍රායෝගිකව උගන්නන එක නෙමෙයි ..
ලිංගික පද්ධතිය ගැන ,ඒ ඇතිවන වෙනස්කම් ගැන , ඒ වෙනස්කම් නිසා සිරුරේ සහ මනසේ ඇතිවන වෙනස් කම් ගැන , ගැබ් ගැනීම ගැන , අපචාර සහ අපරාධ වලින් බේරෙන හැටි සහ ඔවුන් අඳුරගන්න හැටි ගැන , ලිංගික රෝග ගැන ,සමාජ රෝග ගැන ,ලිංගික අවශ්‍යතාවය ,හැසිරීම සහ සීමා මායිම් ගැන ,නීති රීති ගැන , මාස් ශුද්ධිය ,ශ්‍රක්‍රනු මෝචනය ,සහ ලිංගික විපර්යාස ගැන විධිමත් ක්‍රමවත් පැහැදිලි සහ නිවැරදි දැනුමක් ලබාදීම තමයි ලිංගික අධ්‍යාපනය කියල කියන්නෙ .
ජනග්‍රහණයට සාපේක්ෂව අපේ රටේ කාන්තා අපයෝජන , ළමා ගැබ්ගැනීම් වගේම සමාජ රෝග ප්‍රතිශතාත්මකව වැඩියි .
ඒවාට ලොකුම හේතුව මිනිස්සුන්ගේ නොදනුවත්කම .
පත්තරයක් බලලා ,වැලක් බලලා , යාලුවෙක්ගෙන් අහගෙන , කොන්ඩම් එකක් දාන්න සෙක්ස් කරන්න බාගෙට හරි ඉගනගත්තත් ඒ සම්බන්ධ අනිත් වැදගත් කාරනා පිලිවලට නිවැරදිව ඉගනගන්න තැනක් අපේ රටවල නැහැ .
විවාහ වෙලා දරුවොත් හදල ඒත් තවමත් ඔර්ගසම් ගැන නොදන්න ගැහැණු සහ පිරිමි අපේ රටේ ඉන්නවා කියල ඔබ විශ්වාස කරනවද ?
ඒ විතරක් නෙමෙයි තමන්ට අතවරයක් කරදරයක් වුනාම ඒක ගෙදර ඇවිත් අම්මට තාත්තට කියන්න බය දරුවොත් ඕනතරම් අපි අතර ඉන්නවා ,
ඒ වගේම තමන්ට සිද්ධවුණේ අතවරයක් කියල නොදන්න දරුවො විතරක් නෙමේ වැඩිහිටියොත් ඕන තරම් ඉන්නවා ,
අපේ ළමයින්ට නම් ඔහොම ප්‍රශ්න නැහැ කියල හුඟක් වැඩිහිටියෝ හිතන් හිටියට තමන්ගේ දරුවන්ට මේ විෂය ගැන දාහක් ප්‍රශ්න තියනවා කියල දන්නෙ ඒ දරුවෝ සහ ටිකයි අයගෙ partners ලයි ,දොස්තරලා හෝ කවුන්සර්ස් ලයි විතරයි .
අපේ රටේ මේ තියන ලිංගික ඇරියස් එකට ප්‍රධාන හේතුවත් මේ ලිංගික නොදනුවත්භාවයම තමයි .
හැමදාම ලිංගික අධ්‍යාපනය කියන වචනෙ කියනකොටම කවුරුහරි විරුද්ධ වෙනවා ,මේ සැරෙත් එහෙමයි.
දරුවන්ට ලිංගික අධ්‍යාපනය ලබදෙනවට විරුද්ධ වෙන මේ කිසි කෙනෙක් ,ළමා අපචාර වලට ,බලහත්කාරකම් වලට , ළමා ගැබ්ගැනීම් වලට ,ලිංගික රෝග ව්‍යාප්තිය දැක දැක හ්ම් නොකියා කට වහගෙන උඩ ඉඳල ලිංගික අධ්‍යාපනය දෙන්න හදනකොටම රෙදි කඩාගෙන කෑ ගහන එක මොන තරම් කනගාටුදායකද ?
මේ වැඩේ කරන්නෙ කවුද මොන ආණ්ඩුවෙන්ද කියල වැඩක් නැහැ ,
දරුවන්ට ලිංගික අධ්‍යාපනය ලබාදීම අගයකලයුතු ඉතාම හොඳ වැඩක් !
අනිවාර්යයෙන් කලයුතු කාලෝචිත වැඩ පිළිවෙලක් ,
Sex කියන්නෙ මූලික මිනිස් අවශ්‍යතාවයක් මිසක් බිල්ලෝ පෙන්නලා බය කරලා හංගලා තියන්න පුළුවන් දෙයක් නෙමෙයි ,
කවුරු හරි කෙනෙක් ,අපෝ ඕවා ජරා වැඩ ,ඕවා කැත වැඩ ,ඕවා උගන්නන එක නොහොඹිනා වැඩක් කියල කියනවා කියන්නෙම ඒ කෙනාට නිවැරදි ලිංගික දැනුමක් අවබෝධයක් නැහැ කියන එකම තමයි .
දෙයියනේකියල මේ සැරේවත් අපේ රටේ
දරුවන්ට ඒ වයසට අදාලව නිවැරදි ලිංගික දැනුමක් ,ලිංගික අධ්‍යාපනයක් ලබා දෙන්න පටන් ගන්න ඕනෙ ,
ඊට අමතරව පුලුවන්නම් ,sex education කියන්නෙ පුරුෂ ලිංගයක් ස්ත්‍රී ලිංගයට දාන එකම නෙමෙයි කියල හය හතර නොතේරෙන වැඩිහිටියන්ටයි ,ආගම් වල සෙට් එකටයිත් උගන්නන්න පුලුවන්නම් සෑහෙන්න වටිනවා !
දරුවන් සම්බන්ධ ප්‍රශ්නයක් නිසා කරුණාකර මේ ප්‍රශ්නෙ දේශපාලනීකරණය නොකර ගමු !
(දැන් මේක කියවල මට උඩ දාගෙන බැන්නට වැඩක් නැහැ සරළවම කිව්වොත් ලිංගික අධ්‍යාපනයේ වැදගත්කම දශමයක් හරි හරියට තේරුම්ගත්ත කිසිකෙනෙක් මේ වැඩපිළිවෙලට අකුල් හෙලන්නෙ නැහැ .එච්චරයි !)