හිටපු අගමැති ඉම්රාන් ඛාන් අත්අඩංගුවට ගැනීමත් සමග රට පුරා පැවති විරෝධතාවලදී හමුදා ස්ථාන වලට පහර දුන් බවට චෝදනා ලැබ සිටින සැකකරුවන් හමුදා අධිකරණයට ඉදිරිපත් කරන බව පාකිස්තාන රජය සහ හමුදාව පවසා තිබේ.
නීතිඥ නියෝජනයක් නොමැති, විවෘත නඩු විභාග නොමැති හමුදා අධිකරණවල සිවිල් නඩු විභාග කිරීම මූලික මානව අයිතිවාසිකම්වලට පටහැනි බව විවිධ සිවිල් සහ මානව හිමිකම් සංවිධාන චෝදනා පෙන්වාදෙයි.
එලෙස හමුදා අධිකරණය මගින් සිවිල් වැසියන්ගේ නඩු විභාග කිරීම අභියෝගයට ලක් කරමින් පාකිස්තාන ශ්‍රේෂ්ඨාධිකරණයට පෙත්සම් ගණනාවක් ඉදිරිපත් වී තිබිණි.
ඒ අනුව අගවිනිසුරු උමාර් අතා බන්ඩියල් ප්‍රමුඛ සත් පුද්ගල විනිසුරු මඩුල්ලක් විසින් එම පෙත්සම් විභාගය සිදු කිරීමට පියවර ගත්තේය.
පසුගිය මැයි 9 වනදා එරට හිටපු අගමැති ඉම්රාන් ඛාන් අත්අඩංගුවට ගැනීමත් සමග එරට බොහෝ ප්‍රදේශවල කෝලාහල ඇතිවිණි.
කෝලහල අතරතුර අත්අඩංගුවට පත් කාන්තාවන් සහ බාල වයස්කරුවන් සිටීනම් එම සියලුම පුද්ගලයින්ගේ විස්තර ලබාදෙන විනිසුරු මඩුල්ල විසින් ඉල්ලා සිටියේය.
එහිදී එරට නීතිපති මන්සූර් උස්මාන් ශ්‍රේෂ්ඨාධිකරණයට ප්‍රකාශ කර ඇත්තේ පුද්ගලයන් 102 දෙනකු හමුදාව භාරයේ සිටින බවය.
එහෙත් අත්අඩංගුවට ගෙන ඇති පුද්ගලයන් අතර කාන්තාවන් හෝ බාලවයස්කරුවන් නැති බවත්, කිසිදු මාධ්‍යවේදියකු හෝ නීතිඥයකු අත්අඩංගුවට ගෙන නැති බවත් පාකිස්තාන නීතිපතිවරයා ශ්‍රේෂ්ඨාධිකරණයට දැනුම් දී ඇත.
කෙසේවෙතත් එරට සමාජ ක්‍රියාකාරීන් වෙනත් මානව හිමිකම් සංවිධාන පෙන්වාදෙන්නේ එසේ අත්අඩංගුවට ගත් පුද්ගලයන් අතර වයස අවුරුදු 18ට අඩු පුද්ගලයකු සිටින බවට තොරතුරු වාර්තා වී ඇති බවයි.
කෙසේවෙතත් එවැනි සැකකරුවකු සිටින්නේ නම් ඔහු නිදහස් කරන බව පොලිස්පතිවරයා අධිකරණය හමුවේ ප්‍රකාශ කර තිබේ.
සබැඳි පුවත්