මහින්ද සෙනරත් ගමගේ, සිය ජීවිතයෙන් සැලකිය යුතු කාලයක් මේ රටේ යහපත වෙනුවෙන් දිවි නොතකා සටන් කල , ඒ ඉතිහාසයෙන් මකා හල ගමන් සගයෙක්. ඔහු අද වඩාත් ප්‍රචලිත සාහිත්‍යකරුවෙකු සහ සාහිත්‍ය පරිවර්තකයෙක් හැටියට. කිසිදා තම ආත්මය පාවා නොදුන් මේ මිනිසා, සහෝදරයා අදත් නිහඬව, අදිටන් සහගතව තම යුතුකම ඉරු කරමින් ඉන්නවා.
ඔහු රුසියානු සාහිත්‍යය පරිවර්තනය කරමින් කල මෙහෙවර අගයා හෙට(30) රුසියානු සංස්කෘතික කේන්ද්‍රයේ පැවත්වෙන රුසියානු කවි සැඳෑවේදි ලියෝ තොල්ස්තෝයි සම්මානයෙන් පිදුම් ලබනවා. ඔහුත් සමග සම්මානයට පාත්‍ර වන අනෙක් සාහිත්‍යධරයා අද අප අතර නැති පසන් කොඩිකාර.
මේ සම්මානය කෙනකුට පිදෙන්නේ එක වරක් පමණයි.
ඉතින් මේ ඇරයුම මහින්දට ආදරය කරන මිනිසුන්ට. ඔහු වෙනුවෙන් ඔබේ දෑත් එකතු කරන්න හෙට 3 වෙද්දි කොලඹ රුසියානු සංස්කෘතික කේන්ද්‍රයට එන්නට ඔබට හැකි නම් අගෙයි. අපි ඔබේ පැමිණීම අපේක්ෂාවෙන් ඉන්නව.
ඔබ එනවා නම් අපූරු කවි සැඳෑවක අසිරිය විඳින්නටද ඔබට ලැබෙයි.
චූලානන්ද සමරනායක
ඔහු හැමදාම විශ්වාස කළේ තමන් සාහිත්‍යය තුළ සිද්ධ කරමින් ඉන්නෙ තමන්ගෙ දේශපාලනය කියල
සමහර මිනිස්සු තමන්ගෙ මුළු ජීවිතයම අනෙකා වෙනුවෙන් කැප වූ මාවතක ගමන් කරන්න තමන්ටම ප්‍රතිඥා දීපු, විසල් මානව ස්නේහයකින් ලතෙත් හදවතක් පපුව තුළ දරා ගතපු සුන්දර මිනිස්සු. අනෙකාගේ පැවැත්ම පිළිබඳ සන්වේදනය නාසිස්මයෙන් ඔබ්බට තමන්ව මෙහෙයවන්න ඔවුන්ව පොළඹවනවා. ඒක එක්තරා විදියකට තමන්ගෙ ජීවිතය හැඩගස්වා ගැනීමේ සාංදෘශ්ටිකවාදී ප්‍රවේශයක්. මම තරුණ කාලයට ප්‍රවේශ වීමත් එක්ක මට සම්මුඛ වුණු මේ විදියෙ චරිත දෙකකට, මාව මේ මොහොතේ මම දරන අදහස් වලින් ගොඩනැගුණු මිනිහෙක් කරන්න සමාරම්භක දායකත්වය ලබා දීම සම්බන්දයෙන් හැමදාම කෘතඥතාවය පුද කරනවා. ඒ එක්කෙනෙක් චූලානන්ද සමරනායක. දෙවැන්නා මහින්ද සෙනරත් ගමගේ. ඒ දෙන්නම යහපත් සමාජයක් ගැන සිහින දකින අය. එය යථාර්ථයක් කිරීම වෙනුවෙන් තමන්ගෙ යෞවනත්වයම කැප කළ පමණිනුදු නොනැවතී දැවැන්ත පරාජය වීම් සහ වසර ගණනාවක අශුභවාදී දේශපාලන අද්දැකීම් මතින් පවා තමන්ගෙ ඒ පරාර්ථකාමී සිහිනය ජීවමානව පවත්වාගෙන යමින් ඒ වෙනුවෙන් තවමත් නොනවත්වාම වැඩ කරන දෙන්නෙක්. සංකේතීය වටිනාකමක් ආරෝපණය කරගනිමින් සමාජයේ ප්‍රතිරූපයක් ගොඩනගාගැනීමේ ජනප්‍රියවාදී තර්කනයට හසු නොවී ඊට එදිරිව සාමාජයීය කාර්‍යය තුළම තමාව දිය වීමට අවංකවම ඉඩහැරීමට හැකි වීම කියන්නෙ විශාල දෙයක්.
ඉතින් මහින්ද සෙනරත් ගමගේ හෙට පැවැත්වෙන රුසියානු සාහිත්‍යය උළෙලේ දී ලියෝ තෝල්ස්තෝයි සම්මානයෙන් පිදුම් ලැබීමට නියමිතව සිටින බව දැකීම අතිවිශාල ප්‍රහර්ශයක්. ඔහුගේ දේශපාලන දැක්ම ක්‍රියාවට නැංවුනු ජීවිතයේ එක්තරා මොහොතක සිදු වූ රැඩිකල් ඛණ්ඩනය වීමෙන් පසුව අතගැසූ සාහිත්‍යය ක්ෂේත්‍රය තුළ පවා දිගහැරෙන ඔහුගේ ක්‍රියාකාරීත්වය තුළින් අනවරතව ගලායන්නෙ එකම ජීවන පරමාදර්ශයක අඛණ්ඩ දහරාවක්. ඔහු පරිවර්තනය කළ කෘතීන් ඒ දේ සනාථ කරන විවෘත සාක්ෂ්‍ය සටහන් වෙනවා. මිහයිල් ෂොලොහොව්ගෙ අග්‍ර කෘතිය පමණක්ම වුව එතනදි ප්‍රමාණවත්. ඔහු හැමදාම විශ්වාස කළේ තමන් සාහිත්‍යය තුළ සිද්ධ කරමින් ඉන්නෙ තමන්ගෙ දේශපාලනය කියලයි. ඔහු සිහින දකිමින් ඉන්න යහපත් සමාජයේ ගොඩනැංවීමට දායක වන මිනිසුන් නිර්මාණය කිරීමේ බිජුවට ඔහු වපුරමින් සිටිනවා කියන එකයි එහි අදහස. විමුක්ති දේශපාලනයේ සාරාත්මවාදී හරය තුළම පවතින සාමූහික ප්‍රයත්නයක සළකුණු එක්වරම හසුකරගත නොහැකි ඔහුගේ ක්‍රියාන්විතයේ එය ද්විතීයික වූ ප්‍රපංචයක් විදියට ගොඩනැඟෙමින් පවතිනවා කියලා ඔහු විශ්වාස කරන බව මම දන්නවා. ඒක අති මානුෂීය දේශපාලනයක්. විසි වසරකට වැඩි සාහිත්‍යය ජීවිතය තුළ කළ කාර්‍යභාරය සම්බන්දයෙන් මේ නිහඬ සාහිත්‍යකරුවා මේ විදියට ඇඟයීමට ලක්වීම පිළිබඳ අසීමිත සොම්නසක් පෙරදැරිව මම ඔහුට සුබ පතනවා.