මහවැලි අධිකාරිය යටතේ ඇති ඉඩම් බෙදීම වහාම නතර කරන ලෙස ජනාධිපති ලේකම් සමන් ඒකනායක විසින් වාරිමාර්ග අමාත්‍යාංශයේ ලේකම් යූ.ඩී.සී.ජයලාල් වෙත ලිඛිත ව දැනුම් දී තිබේ.
ශ්‍රී ලංකා මහවැලි අධිකාරිය පාලනය වන්නේ වාරිමාර්ග අමාත්‍යාංශය යටතේ ය. PS/CSA/00/08/මහවැලි(පොදු) අංක දරන ලිපිය මගින් ජනාධිපති ලේකම්වරයා අවධාරණය කර ඇත්තේ ජනාධිපතිවරයාගේ නියෝගයක් මත මෙම ලිපිය නිකුත් කරන බවයි.
මෙම ලිපිය මහවැලි අධිකාරියේ අධ්‍යක්ෂ ජනරාල්වරයාට ද පිටපත් සහිතව යොමු කර ඇත.
‘කියන විදිහට වැඩ කරනවා’
මේ සම්බන්ධයෙන් thetime.lk කළ විමසීමේදී මහවැලි අධිකාරියේ අධ්‍යක්ෂ ජනරාල් කීර්ති කොටගම පැවසුවේ මෙතෙක් තමන්ට එම ලිපිය නොලැබුණු බවයි. ලිපිය ලැබුණු විගස ඒ අනුව කටයුතු කිරීමට බැඳීසිටින බව ද ඔහු සඳහන් කළේය.
මහවැලි විෂය බාර රාජ්‍ය ඇමති රොෂාන් රණසිංහගේ නිර්දේශ මත මේ වන විට ජනතාවට ලබාදීමට සූදානම් කර ඇති ඉඩම්වලට මෙය බලපාන්නේ කෙසේද යනුවෙන් විමසීමේදී අධ්‍යක්ෂ ජනරාල්වරයා පැවසුවේ තමන්ට ඒ පිළිබඳව කිසිවක් පැවසිය නොහැකි බවයි.
අක්‍රමිකතා රැසක් වළක්වයි ?
මහවැලි අධිකාරිය පිළිබඳ පනත මගින් එම විෂය බාර ඇමතිවරයාට රජයේ ඉඩම් බෙදීම පිළිබඳ අභිමත බලයක් ලබාදී තිබේ. මේ හේතුව නිසා අදාළ ඉඩම් බෙදීමේදී බරපතළ අක්‍රමිකතා සිදුවන බවටත්, මැතිවරණ ඉලක්ක කරගෙන දේශපාලන පක්ෂ ප්‍රවර්ධනය සඳහා මෙම බලය යොදාගැනීමෙන් මැතිවරණ නීති උල්ලංඝනය කෙරෙන බවටත් චෝදනා එල්ල වේ.
ඇමතිගෙන් ප්‍රතිචාර නෑ
මේ පිළිබඳව විමසීමට මහවැලි විෂය බාර රාජ්‍ය ඇමති රොෂාන් රණසිංහ සම්බන්ධ කර ගැනීමට thetime.lk දැරූ උත්සාහය ව්‍යර්ථ වූයේ ඔහු රැස්වීම්වල සිටින බව දුරකතනයට ප්‍රතිචාර දැක්වූ පුද්ගලයා දිගටම පැවසීම නිසා ය.
‘මරාගෙන මැරෙන ප්‍රශ්නයක්’
ලංකාවේ රක්ෂිත නොවන රජයේ ඉඩම්වලින් තුනෙන් දෙකකට ආසන්න ප්‍රමාණයක් මහවැලි අධිකාරිය යටතේ පවතී. මෙම ඉඩම් බෙදීම සම්බන්ධයෙන් පසුගිය කාලයේ බරපතළ ගැටුම් මතු වූ අතර, ශ්‍රී ලංකා පොදුජන පෙරමුණේ ඇතැම් ඇමතිවරුන් සකස් කළ ඉඩම්ලාභී නම් ලැයිස්තු අනුමත නොකිරීම පිළිබඳව ප්‍රසිද්ධියේ විවේචනය කිරීම් ද සිදු විය.
හිටපු ඇමති විමලවීර දිසානායක මීට පෙර පවසා තිබුණේ තමන්ගේ පාක්ෂිකයන්ට මහවැලි ඉඩම් ලබානොදෙන්නේ නම්, මරාගෙන මැරෙන බවයි. ඔහු එසේ පවසා තිබුණේ ප්‍රසිද්ධ රැස්වීමකදී ය.
113 අභියෝගයක් !
මෙම ජනාධිපති ලේකම් ලිපිය සම්බන්ධයෙන් thetime.lk සමග අදහස් දක්වමින් විමලවීර දිසානායක පැවසුවේ අදාළ ගැටළු මෙතෙක් විසඳී නැති බවයි. ඒ සම්බන්ධයෙන් ශ්‍රී ලංකා නිදහස් පක්ෂයේ ශ්‍රී ලංකා පොදුජන පෙරමුණේ ජ්‍යේෂ්ඨයන් හිටපු ජනාධිපති මෛත්‍රීපාල සිරිසේන ඇතුළු පිරිසක් සමග සාකච්ඡා කළ බව ද ඔහු සඳහන් කළේය. අයවැය ඡන්ද විමසීමේදී ආණ්ඩුවට 113 පිළිබඳ අභියෝගයක් මතුවිය හැකි බවත්, එම නිසා එක් පාර්ලිමේන්තු මන්ත්‍රීවරයෙකු හෝ අමනාප කරගැනීම ආණ්ඩුවට අවාසිදායක විය හැකි බවත් වැඩිදුරටත් අප කළ විමසීමේදී ඔහු සඳහන් කළේය.
තීරණාත්මක සාකච්ඡා දෙකක්
මේ අතර ආණ්ඩුවේ අභ්‍යන්තර ආරංචි මාර්ග සඳහන් කරන්නේ මහවැලි අධිකාරිය සතු ඉඩම් බෙදීම සම්බන්ධයෙන් තීරණාත්මක සාකච්ඡා කිහිපයක් පසුගිය සති දෙක තුළ පැවති බවයි. එයින් එක් සාකච්ඡා වටයක් පවත්වා ඇත්තේ ආණ්ඩුවේ ජ්‍යේෂ්ඨයන් අතර ය. එහිදී විමලවීර දිසානායක පවසන ආකාරයේ අභ්‍යන්තර ගැටුම් නිරාකරණය කරගන්නේ කෙසේද යන්න සම්බන්ධයෙන් අවධානය යොමුකර ඇත.
මන්ත්‍රී කෝටාවක්
එම සාකච්ඡාවලදී ගෙන ඇති එක් තීරණයක් වන්නේ අදාළ මන්ත්‍රීවරයාගේ හෝ ඇමතිවරයාගේ ජනප්‍රියත්වය සසඳමින් ප්‍රතිශතයක් ලෙස ඔහුට හෝ ඇයට හෝ ඉඩම් කෝටාවක් ලබාදීමටයි.
අනෙක් සැලැස්ම කුමක්ද ?
මෙහි අනෙක් සාකච්ඡා වටය පවත්වා ඇත්තේ ආයෝජකයන් සමග ය. මෙම සාකච්ඡා සඳහා ජනාධිපතිවරයාගේ පාර්ශ්වයෙන් වජිර අබේවර්ධන හිටපු ඇමතිවරයා සහභාගි වී තිබේ. එහිදී අවධාරණය වී ඇත්තේ ජනතාවට ඉඩම් ලබාදීමට වඩා, මේ මොහොතේ ව්‍යාපාරිකයන්ට මහවැලි ඉඩම් ලබාදීම වැදගත් බවයි.
අලුත් ම අයවැය යෝජනාව
මෙම සාකච්ඡාවලට ම අදාළ කරුණක් ලෙස අයවැය යෝජනා අතරට මහවැලි අධිකාරිය සතු ඉඩම් බලතල ප්‍රාදේශීය ලේකම්වරයා යටතට පත්කිරීමේ යෝජනාව ද ඇතුළත් කර තිබේ. ඊට හේතු වී ඇත්තේ මහවැලි අධිකාරිය සතු ඉඩම් ලබාගැනීමේදී පරිසර අනුමැතිය, භෞතික සැලසුම් අනුමැතිය, භූවිද්‍යා අනුමැතිය ඇතුළු විධිමත් ක්‍රමවේද රැසක් අනුගමනය කළ යුතු බව නෛතික ක්‍රමවේදයේ ම සඳහන් වීමයි.
ප්‍රාදේශීය ලේකම් යටතට මෙම ඉඩම් බලතල පවරා, අදාළ අනුමැතීන්ගෙන් තොරව කඩිනමින් රජයේ ඉඩම් තමන්ට අවශ්‍ය පාර්ශ්වවලට පැවරීම මෙහි අරමුණ වී තිබේ.
ගෝඨාභය ගිය පාර
හිටපු ජනාධිපති ගෝඨාභය රාජපක්ෂ විසින් 1/2020 චක්‍රලේඛය මගින් ද සිදු කරන ලද්දේ මීට සමාන ක්‍රියාවකි. ඒ, රජයේ අවශේෂ වනාන්තර ඉඩම් ව්‍යාපෘති සඳහා පැවරීමේදී වනසංරක්ෂණ, වනජීවී, භූවිද්‍යා, පරිසර ඇතුළු ආයතන පහකින් අනුමැතිය ලබාගැනීමේ ක්‍රමය අත්හිටුවීමයි.
මෙම තීරණයත් සමග වන සංරක්ෂණ දෙපාර්තමේන්තුව යටතේ පාලනය වූ ඉඩම් අක්කර ලක්ෂ පහකට ආසන්න ප්‍රමාණයක් වසර එකහමාරක් තුළ දී විනාශ කෙරිණි. අම්පාර, මහඔය පිහිටි ගල්වලයාය රජයේ වනාන්තරය එහිදී සම්පූර්ණයෙන්ම විනාශ කෙරුණු ජෛව විවිධත්වයෙන් පොහොසත්ව පැවති භූමියකි. මෙම චක්‍රලේඛය වහාම සංශෝධනය කරන ලෙස පසුගියදා ශ්‍රේෂ්ඨාධිකරණයෙන් තීන්දුවක් ලබාදුන්නේය.
වඩා වැදගත් කුමක්ද ?
මේ සම්බන්ධයෙන් thetime.lk වෙත අදහස් දක්වමින් ජනාධිපතිවරයාගේ සමීපතමයෙකු පැවසුවේ මේ මොහොතේ වැදගත් ම කාර්‍යය වන්නේ රට තුළ ආදායම් උත්පාදනයත්, විදේශ මුදල් ගෙනඒමත් බවයි.
එහෙම පුළුවන් ද?
එහෙත් මධ්‍යම පරිසර අධිකාරියේ නියෝජ්‍ය සාමාන්‍යධිකාරිවරයෙකුගෙන් මේ පිළිබඳව thetime.lk විමසීමේදී ඔහු පැවසුවේ සියලු මහා පරිමාණ ව්‍යාපෘති පරිසර තක්සේරු වාර්තා ලබාගැනීම අනිවාර්ය බවත්, ඉඩම් බලතල මාරුකිරීම මගින් පරිසර නීතිවලට බලපෑම් කළ නොහැකි බවත් ය.
එක ගලෙන් කුරුල්ලො රැසක් !
කෙසේ වෙතත් දේශපාලන විශ්ලේෂකයන් අවධාරණය කරන්නේ මහවැලි ඉඩම් බෙදීමට අදාළ ජනාධිපති ලේකම්වරයාගේ මෙම ලිපිය මගින් අරමුණු කිහිපයක් ඉටුකර ගැනීමට ආණ්ඩුව අපේක්ෂා කරන බවයි. එහි කෙටි කාලීන අරමුණ ලෙස පෙනීයන්නේ ආණ්ඩුවේ මන්ත්‍රීවරුන් අතර ඇති වී තිබෙන අමනාපකම් තාවකාලිකව සමනය කිරීමයි.