පාස්කු ඉරුදින ත්‍රස්ත ප්‍රහාරයට අදාළව සිදුවන විමර්ශනයට අදාළව ප්‍රකාශයක් ලබාදීම සදහා හිටපු පාර්ලිමේන්තු මන්ත්‍රි සජින් වාස් ගුණවර්ධන මහතා අද පෙරවරුවේ අපරාධ පරීක්ෂණ දෙපාර්තමේන්තුව හමුවට පැමිණ තිබේ.
ඊට හේතුව වන්නේ, සජින් වාස් ගුණවර්ධනගේ දුරකතනයෙන් ලැබුණු ඇමතුම් සම්බන්ධයෙන් හිටපු ජනාධිපති මෛත්‍රීපාල සිරිසේන දී ඇති ප්‍රකාශයකි. පාස්කු ඉරිදා ත්‍රස්ත ප්‍රහාරයේ මහමොළකරු තමන් දන්නවායැයි හිටපු ජනාධිපති මෛත්‍රීපාල සිරිසේන 2024 වසර මුලදී ප්‍රකාශ කළේය. ‘ඔය නඩු අහන ඒවායැ අල්ලලා තියෙන ත්‍රස්තවාදියෝ ඒක හරි. මම අල්ලපු අය තමයි නඩු අහන්නේත්. අනෙක් පැත්තෙන් ප්‍රධාන වශයෙන්ම පාස්කු ප්‍රහාරයේ සැබෑ ලෙසම මේක කළේ කවුද කියලා තවම කිසි කෙනෙක් කියලා නෑ. මම දන්නවා කවුද කළේ කියලා. අධිකරණය යම්කිසි ඉල්ලීමක් කළොත්, නැත්නම් නියෝගයක් කළොත් ප්‍රකාශයක් කරන්න. මම ලෑස්තියි කවුද පාස්කු ප්‍රහාරය කළේ කියන එක. ඒක රහසිගතව තබාගැනීම ඒ විනිශ්චයකාරතුමන්ලාගේත් වගකීමක් වෙනවා.‘ යනුවෙන් ඔහු එහිදී පැවසීය.
ඉන්පසු 2024 මාර්තු 24 වැනිදා ඔහුව ඒ පිළිබඳ විමසීම සඳහා අපරාධ පරීක්ෂණ දෙපාර්තමේන්තුවට කැඳවන ලදි. ඉන්දීය ඔත්තු සේවයකින් තමන්ට පාස්කු ප්‍රහාරය සම්බන්ධයෙන් දුරකතන ඇමතුම් ලැබී ඇතැයි හිටපු ජනාධිපති මෛත්‍රීපාල සිරිසේන එහිදී පවසා තිබිණි.
පොලීසිය පැවසුවේ අදාළ ඇමතුම් පිළිබඳ මෛත්‍රීපාල සිරිසේන ලබාදුන් දුරකතන අංක සම්බන්ධයෙන් සිදුකළ විමර්ශනයේදී එම ඇමතුම් සජින් වාස් ගුණවර්ධන විසින් ලබා දී ඇතැයි හෙළි වන බවයි.