ප්‍රබල බලපෑමක් කළ ප්‍රබල තරුණ පරම්පරාවක් මෙරට සිටින බව ජාතික ජන බලවේගයේ නායන අනුර කුමාර දිසානායක කුරුණෑගල පැවැති තරුණ සමුළුවේදී අවධාරණය කළේය.
ඔහු කළ සම්පූර්ණ කතාව පහළ පළවේ.
මේ වනවිට අයහපත් කාලගුණික තත්වය හේතුකොටගෙන ආපදා තත්වයක් ඇතිවෙලා තිබෙනවා. ඇතැම් ප්‍රදේශවල ජනතාව අවතැන්වී සිටිනවා. ඒ වගේම ජීවිත අහිමිවීම් කිහිපයක් වාර්තා වී තිබෙනවා. වර්ෂාව නිසා මිය ගිය හා අසරණභාවයට පත්වූ ජනතාවට ජාතික ජන බලවේගය ලෙස අපේ පැත්තෙන් උදවු කරන්න, සහාය දෙන්න අපේ සහන සේවා බලකායන් ක්‍රියාත්මක වෙමින් තිබෙනවා. එහෙත් ගංවතුර හේතුවෙන් සමහර ප්‍රදේශවල යාමට නොහැකිව තිබෙනවා. ගංවතුරකින් මිය යෑමටත්, මෙතරම් විශාල සංඛ්‍යාවක් අවතැන් වීමත්, සිදුවිය යුතු නැහැ. වැස්ස ස්වභාවිකයි. නමුත් අනතුර ස්වභාවික නැහැ. අපේ රටේ පාලකයින් දීර්ඝ කාලයක් අනුගමනය කරන ලද වැරදි සංවර්ධන ප්‍රතිපත්තිවල ප්‍රතිඵල තමයි වර්තමාන පරම්පරාව මේ බුක්ති විඳිමින් තිබෙන්නේ. ලෝකයේ විද්‍යාව හා තාක්ෂණයේ දියුණුව විසින් මෙවැනි අනතුරක් කල්තියා හඳුනාගෙන, වර්ෂාව වැඩිපුර ලැබෙන්නේ කුමන ප්‍රදේශයටද, ගංවතුර අවදානම තිබෙන්නේ කුමන ප්‍රදේශයටද යන්න හඳුනාගත හැකිව තිබෙනවා. හඳුනාගෙන මෙම ව්‍යසනයන් අවම කරගත හැකිව තිබෙනවා. දත්ත, තොරතුරු ලබාගැනීමට හැකි තාක්ෂණය දියුණු වී තිබෙනවා. නමුත් අපේ රටේ තාක්ෂණය උපයෝගීකර ගැනීමට අසමත්වී තිබෙනවා. මේ ව්‍යසනයන් අපට අඬගසා කියන්නේ මේ රට වෙනස් කළ යුතුයි කියන පණිවිඩයයි.
මේ ඉන්නේ ඉතාමත් ප්‍රබල බලපෑමක් කළ හැකි තරුණ පරම්පරාවක්. මේ පරම්පරාව ලෝකයට විශාල පණිවිඩයක් හා අත්දැකීමක් දුන්න පිරිසක්. අපේ පැරණි දේශපාලකයන්ටත්, දේශපාලකයන්ගේ ප්‍රතිපත්තිවලටත් ප්‍රබල ප්‍රහාරයක් එල්ලකර තිබෙනවා. මීට වසර දෙකකට පෙර මෑත ඉතිහාසයේ විශාල ස්වභාවික ජන නැගිටීමක් සිදුවුණා. පසුගිය දශක කිහිපය ඇතුලේ කොතනකවත් ජනතාව ස්වභිවික ලෙස සංවිධානය වෙලා පාරට බැහැලා, එහි පාලකයන් පලවා හැර නැහැ. මැදපෙරදිග යම් යම් රටවල්වල සිදුවීම් තිබුණත් ඒවා සිදුවුණේ යටි අරමුණු සහ යටි මැදිහත්වීම් අනුව. අපේ රටේ ස්වභාවිකව ජනතාව නැගිට්ටා. මේ ජනතාව අවදි කිරීමේ විශාල කාර්යභාරය කළේ වත්මන් තරුණ පරම්පරාව. වර්තමාන ලෝකය අපේ කාලයේ තිබුණු පරම්පරාව නොවෙයි. 1995 සිට 2009 දක්වා අවුරුදු 15 ඇතුළත ඉපදුණු පරම්පරාව ඉෂෙඞ් පරම්පරාව කියලා අපි හඳුන්වනවා. ඉන්පසු පරම්පරාව ඇල්ෆා පරම්පරාව කියලා හඳුන්වනවා. අපේ පරම්පරාව එක්ස් රම්පරාව 1965-1979 අතර ඉපදුණු අයයි. මෙතනට රැස්වී සිටින බොහෝ දෙනා අයිති වෙන්නේ ඉෂෙඞ් පරම්පරාවටයි. අපේ රටේ තිබෙන ගෘහ ඒකක ලක්ෂ 52න් ඒකක ලක්ෂ 30ක ඉෂෙඞ් පරම්පරාවට අයත් තරුණයෙක් හෝ තරුණියක් ජීවත් වෙනවා.
ඔවුන්ගේ අපේක්ෂාවන් වෙනස්, ගෙදරට බලපෑම් කළ හැකි ඩිජිටල් ලෝකයේ ජීවත් වෙන අයයි. ඒ පරපුර අපේ පරපුරේ තිබුණු සීමිත අවශ්‍යතා සහ ඉතා කුඩා ලෝකයට වඩා සම්පූර්ණයෙන්ම වෙනස් වී තිබෙනවා. පෑනේ මිතුරන්, ගුවන් විදුලියේ අසන්නන්ගේ ඉල්ලීම්, තැපැල් පත්, මූලික කරගත් පරම්පරාවෙන් වෙනස් වී ඩිජිටල් ලෝකයේ සැරිසරණවා. අපේ පරම්පරාව උදේ නැගිටලා මුලින්ම තේ එකක් බොනවා ඒ වෙනුවට ඔබේ පරම්පරාව මුලින්ම ෆෝන් එක අතට ගන්නවා. ඔබට වේගයෙන් තොරතුරු ගලාගෙන එනවා. අපට ලැබුණේ පෙරණ ලද තොරතුරු. පත්තරෙන් ලැබෙන තොරතුරුවලට ප්‍රතිචාර දක්වන්න තිබුණේ “කතෘට ලියුම්” තුළින්. ඔබට තොරතුරක් ලැබෙන විටම ඔබේ ප්‍රතිචාරය දක්වන්න පුළුවන්. අපි ඉතා කුඩා ලෝකයක තරුණ විය ගත කළත් ඔබ විශ්ව ලෝකයේ ගත කරනවා. 2022 තරුණ නැගිටීමට මූලික වුණේ මේ ඩිජිටල් විශ්ව ලෝකයයි. නමුත් ඒ අරගලයේ තිබුණු ඇත්ත ආධ්‍යාත්මික බැඳීම සහ ඔබ වෙත තිබුණු නැගීගෙන එන තරුණ පරම්පරාවේ අපේක්ෂාවන් ඛේදජනක අන්තයකට ගෙන ගියා. ඔබේ පරම්පරාව දේශපාලන පක්ෂ සමග සමීපව ගැටගැසී නොසිටියත් අපේ පරම්පරාවට වඩා අරමුණුවලින් දේශපාලනය සමග බැඳීම් තිබෙනවා. ඔවුන්ට යහපත් දේශපාලනයක අපේක්ෂාවන් තිබෙනවා.
නීතිය සාධාරණව ක්‍රියාත්මක වෙන, හොරකම් නැති රාජ්‍යයක් අපේක්ෂා කිරීම, සාධාරණ සමාජයක් වගේ සක්‍රීය පොදු දේශපාලන උවමනාවක යෙදී සිටින නිසයි, අරගලයට ඔබව කැඳෙව්වේ. තරුණ පරම්පරාවේ කැකෑරෙන වේදනාව තුළින් පැන නැගුණු අරගලය පාලකයන් හැඳින්වූයේ කුඩුකාරයන්ගේ වැඩක් කියලයි. මේ පාලකයන් පාඩමක් ඉගෙන ගන්නවා නම්, ඉගෙනගත යුතුව තිබුණේ අරගලයේ හරයෙන්. නමුත් ඔවුන් මුග්ධ, සාහසික ලෙස කුඩුකාරයන්ගේ නැගිටීමක් ලෙස හැඳින්වූවා. තවදුරටත් කීවේ ගණිකා වෘත්තියේ යෙදෙන්නන්ගේ නැගිටීමක් කියලා. අඩුම තරමින් එවැනි විශාල ජනතා නැගිටීමකින් වත් මේ පාලකයන් පාඩම් ඉගෙන නැහැ. ඈත ගම්මානයක ජීවත් වුවත් ගෝල්ෆේස් එකේ අරගලය සමග අධ්‍යාත්මික බැඳීමක් තිබුණා. පාලකයන් අඩුම ගානේ ඒ ආධ්‍යාත්මික බැඳීමවත් තේරුම් නොගෙන තමන්ගේ බලය යොදවමින් මර්දනය දියත් කරන්න උත්සාහ කළා. ප්‍රසන්න රණවීර ගුවන් තොටුපොළ සේවකයෙකුට පහරදීම, තොණ්ඩමන් ඇමතිවරයා ආයතනයකට කඩා පැන පාලන අධිකාරිය බිය වැද්දීම, කළ හැකි ආකාරයෙන් ඔවුන්ගේ බලය තාවකාලිකව ස්ථාපිත කරගෙන පරණ සතාට එළියට එන්න ඉඩහැර තිබෙනවා.
ජනතාවගෙන් කොල්ලකාගත් දේපළ නැවත පවරා ගන්න කියන සටන් පාඨය අරගලයේ තිබුණා.
ඒ වගේම නීතිය එකලෙස ක්‍රියාත්මක නොවීම ඩයනා ගමගේ ඇමතිවරියගෙන් හොඳටම පැහැදිලි වෙනවා. ඇයට පුරවැසිභාවය නැති බව වඩාත් හොඳින් දන්නේ ඩයනාමයි. එහෙම තිබියදී පාර්ලිමෙන්තුවට ඇවිත් රාජ්‍ය අමාත්‍යවරියක් වී සිටින්නේ නීතියට වඩා උඩින් ඉන්නවා කියන හැඟීමෙන්. ඔබට පුරවැසි හැඳුනුම්පත නොතිබුණොත් කෙතරම් පීඩාවකට පත්වෙනවාද, නමුත් ඇයට රනිල් වික්‍රමසිංහගේ රැකවරණය තිබුණා. අවුරුදු හතරක් රැක ගත්තා. මිස් ෆයර් එකකින් දඬුවමක් ලැබුණා. ඩයනාට පුරවැසිභාවය නැති බව දෙවෙනියට දන්නේ රනිල්.
එදා නැගිටීම තුළ රටේ සම්පත් විකිණීමට එරෙහි මතයක් තිබුණා. දැන් යළි වේගයෙන් ලාභ ලබන රාජ්‍ය ආයතන ඇතුළු රටේ සම්පත් විකුණමින් සිටිනවා. අපේ අයි.ටී. කර්මාන්තයම අනතුරට ලක්කරමින් ලාභ ලබන ටෙලිකොම් ආයතනය විකුණන්න යනවා. තාවකාලික පාලකයන් ලාභ ලබන රක්ෂණ සංස්ථාව, පශු සම්පත් මණ්ඩලයේ අක්කර විසිඅට දාහක්, ලාභ ලබන ගෑස් සමාගම විකුණන්න යනවා. ඒකෙන් පැැහදිලි වන්නේ ගමේ භාෂාවෙන් කියනවා නම්, ගලේගහලාවත් හදන්න බැහැ කියන එකයි.
එදා 2022 නැගිටීමෙන් පාඩම් ඉගෙන ගන්නනවා නම් ඒ නැගිටීමේ හරය සමග සමපාතවන දේශපාලනයකට යා යුතුව තිබුණා. නමුත් ඒ දේශපාලනයේ තිබෙන්නේ ජාතික ජන බලවේගය තුළ පමණයි. 2022 අරගලයෙන් විශාල ආශ්වාදයක් ලැබුවත්, එය අවසානය නොවෙයි, එළඹෙන ජාතික මැතිවරණයකදී ජාතික ජන බලවේගයට බලය ලබා ගැනීම සඳහා කටයුතු කිරීම එහි දෙවන අදියරයි. අනාගතය තිබෙන්නේ ඉෂෙඞ් සහ ඇල්ෆා පරම්රාවේ අතේ. අනාගතය වෙනුවෙන් දේශපාලන අරමුණු පෙළ ගැසෙන්න ඕනෑ. විශේෂ දැනුමක් සහ ප්‍රාගුන්‍යයක් එදා පරම්පරාවට වඩා ඔබ එකතු කරගෙන තිබෙනවා. එදා චේන්පොටක් ගැනීමට, මුද්දක් හදාගැනීමට, මුදල් එකතු කර ගත් අරමුණු වෙනුවෙන් ගාමන් ෆැක්ටරිය උත්තරයක් වුණා. අද අධ්‍යාපන මට්ටමින් ඉහළ ගිහින් වෘත්තීය මටටමකට ආපු වෙනස් තරුණ පිරිසක් ඉන්නේ. ලෝකයේ ඇති නව වෙනස්කම් උකහා ගත් වෙනස් ජීවිත අරමුණු ඔබට තිබෙනවා. එදා තිබුණු රස්සාව අද ඔබට නොගැලපෙන නිසා, ගාමන්ට් ෆැක්ටරිවල ඇබෑර්තු පවතිනවා. නමුත් තරුණ තරුණියන්ට රස්සා නැහැ. හේතුව තරුණ තරුණියන් ජීවත් වෙන වර්තමාන ලෝකයට ඒ පුරප්පාඩු ගැලපෙන්නේ නැහැ. ගාමන්ට්වල ඉල්ලන ප්‍රාථමික ශ්‍රමය වෙනුවට දැනුම අත්දැකීම් සහිත වෙනම ශ්‍රම ප්‍රාගුන්‍යයක් ඔවුන් සතුව තිබෙන්නේ.
තරුණ පරම්පරාව ප්‍රතික්ෂේප කරන ලද ආර්ථිකයක් මේ රටේ තිබෙන්නේ. තරුණ පරම්පරාව වෙනස්වුණු වේගයට ආර්ථිකය වෙනස් වුණේ නැහැ. ඒ නිසා මේ ආර්ථිකය සමග සම්බන්ධ නොවෙන විශාල තරුණ පරම්පරාවක් එළියේ ඉන්නවා. ඒ තරුණ පරම්පරාවේ සිතිවිලි, අපේක්ෂාවන්, ජීවන රටාවන්වලට අනුරූපවන පරිදි ගලපන ආර්ථික ක්‍රමයක් ගොඩනැගීම අපේ අරමුණයි. 2030 වන විට මෘදුකාංග ඉංජිනේරුවන් මිලියන 45ක් ලෝකයට අවශ්‍ය වෙනවා. ඊට අදාළ සැලසුම්වලට තරුණ පරපුර ගෙනයන්න මේ පාලකයන් සැලසුම් සකස්කර තිබෙනවාද? එසේ නොවෙන නිසා අනාගත අවිනිශ්චිතතාවයෙන් පෙළෙන, රට අත්හැර යාමේ අරමුණ සහිත තරුණ පරපුරක් අද ඉන්නේ. නමුත් ඔබේ සිතුම් පැතුම්, අපේක්ෂාවන්, විලාසිතාවන්වලට අනුරූප සිනමාවක්, සංගීතයක්, ක්‍රීඩාවක් සම්බන්ධයෙන් සැලසුම් පවතින්නේ ජාතික ජන බලවේගයට පමණයි. නූතන ලෝකය සමග අත්වැල් බැඳගෙන යන ශ්‍රී ලංකාවේ තරුණ පරම්පරාවේ අරමුණු, ඉටුකරන්නේ ජාතික ජන බලවේගය පමණයි. අපි ලෝකයේ ඉතාමත් ප්‍රාථමික ශ්‍රම වෙළඳපොළක් මේ වන විට අත්පත්කරගෙන ඉන්නේ. මේ පරම්පරාවේ දුවා දරුවන්ගේ අනාගතය නිර්මාණය කිරීමේ සද් උවමනාවක් අපට තිබෙනවා.
ඒ වගේම සාම්ප්‍රදායික ප්‍රභූ දේශපාලනය ගෙනයන පවුල් දේශපාලනය තරුණ පරම්පරාව අතට මාරු කළ යුතුව තිබෙනවා. ස.ජ.බ. හෝ වෙන කිසිවෙකු එවැනි බලයක් තරුණ පරම්පරාවට ලබාදෙන්නේ නැහැ. සජිත් ඇතුළු සමගි ජන බලවේගයේ නායකයන් සියලුම දෙනා පෙර පරම්පරාවල පුතුන්. අනෙක් පැත්තෙත් ඉන්නේ පුත්තුන්ගේ එකතුවක්. අපේ තරුණ පිරිස යොදවා ගන්නේ ඔවුන්ගේ පෝස්ටර් ගහන්න, කැන්වසින් යන්න විතරයි. ජාතික ජන බලවේගයේ අපි කිසිවෙක් පාරම්පරික දේශපාලන පවුල්වලින් එන අය නොfවි. මේ රට වෙනස් කිරීම සඳහා නව දේශපාලන අපේක්ෂාවන් තෝරාගත් අය පමණයි ජාතික ජන බලවේගයේ ඉන්නේ. අපි මේ කරමින් ඉන්නේ ඔවුන් අතේ තිබෙන බැට්න් එක අරගෙන ඔබ අතට ලබාදීමේ ක්‍රියාමාර්ගයයි. ඉතා කෙටි කලකින් අපි ඒ බැට්න් එක ඔබ අතට ලබාදී ඔබ විසින් රට ගොඩනගන ආකාරය දෙස බලමින් සතුටු වෙන්න අපේක්ෂා කරනවා. නමුත් ඔවුන් ලේසියෙන් බලය අත්හරින්නේ නැහැ. ඔවුන් සතු පවුල් බලයත් රාජ්‍ය බලයත් යොදවා දේශපාලන බලය අල්ලාගෙන ඉන්න උත්සාහ කරනවා. පුතාට බැට්න් එක ලබාදෙන්න හැකි සෑම දෙයක්ම පියා කරනවා. එහෙම නම් අපි පොරබදලා මේ බැට්න් එක මාරුකර ගන්න එළඹෙන ජාතික මැතිවරණය යොදාගත යුතු වෙනවා.
බලය මාරුකර ගන්න සුදුසු අවස්ථාව එන තුරු ධෛර්යයෙන් අල්ලාගෙන සිටිය යුතුයි. පුද්ගලිකව ගත්තොත් මගේ ජීවිතයෙන් අවුරුදු 35ක් ඒ අල්ලාගෙන සිටීම කළා. අවලාද, අපහාස, චෝදනා ජනතාව ප්‍රතික්ෂේප කිරීම, 3%ට වැට්ටවීම් සියල්ල මැද්දේ අල්ලාගෙන සිටිමේ කාර්යභාරය පසුගිය කාලය පුරාම සිදුකර තිබෙනවා. දැන් අවස්ථාව එළඹී තිබෙනවා. මුලින් පවත්වෙන්නේ ජනාධිපතිවරණය ද, මහ මැතිවරණය යන්න තෝරා ගැනීමට බැරි තරමට පාලකයන් අර්බුදයට ගොස් සිටිනවා. පොහොට්ටුවට අපේක්ෂකයෙක් තෝරා ගැනීමට නොහැකිවී තිබෙනවා. රනිල් වික්‍රමසිංහ ජනාධිපතිවරණයට ඉල්ලනවාද නැද්ද යන්න තීරණය කළ නොහැකි තත්වයක් මතුවෙලා තිබෙනවා. සාම්ප්‍රදායික ලෙස තිබෙන ආණ්ඩුවෙන් පස්සේ විපක්ෂ නායකයාට ඔටුන්න වැටුණු කාලය දැන් අවසන්. ඒ නිසා ඔවුන් විශාලතම මානසික පීඩාවට ලක්ව සිටිනවා. ඉස්කෝලේ ළමයි ඉදිරියේ කියන කතා බැලුවාමත් ඔවුන්ගේ මානසික ආතතිය පැහැදිලි වෙනවා. විපක්ෂ නායක විහිළු කාරයෙක් වෙලා.
කුරුණෑගල දිස්ත්‍රික්කයේ තරුණ ඔබගේ බලය, ශක්තිය ඇතුගල්පුරටත් වඩා විශාල බව අපි හිතනවා. අපි හැමෝම එකතුවී ප්‍රබෝධමත්ව සතුටින් ජයග්‍රහණයේ ආස්වාදය සහිතව සිනහමුසු මුහුණින් මේ පරිවර්තනයට දායක වෙමු. සියලු දෙනාට ජය ප්‍රාර්ථනා කරනවා.