ප්‍රමිතියෙන් තොර ප්‍රතිදේහ එන්නත් මෙරටට ආනයනය කිරීමේ සිද්ධිය සම්බන්ධයෙන් රක්ෂිත බන්ධනාගාර ගත කර සිටින වෛද්‍ය සැපයුම් අංශයේ හිටපු ගණකාධිකාරී නිරාන් ධනංජය ඇප මත මුදාහරින ලෙස මාලිගාකන්ද ප්‍රධාන මහේස්ත්‍රාත් ලෝචනා අබේවික්‍රම අද (03) නියෝග කළාය.
සැකකාර හිටපු වෛද්‍යවරයාගේ දරුවෙකු කිසියම් මානසික පීඩනයකින් පසුවන බවට ඔහු වෙනුවෙන් පෙනී සිටි නීතිඥවරයා අධිකරණයට දැක්වූ කරුණු සලකා බලමින් මහේස්ත්‍රාත්වරිය එම නියෝගය නිකුත් කළ අතර ඔහුට රුපියල් ලක්ෂයක මුදල් හා රුපියල් ලක්ෂ 50 ක ශරීර ඇප දෙකක්ද නියම කෙරිණි.
තවද සෑම මසකම පළමු හා අවසන් ඉරිදා දිනයන්හි අපරාධ පරීක්ෂණ දෙපාර්තමේන්තුව හමුවේ පෙනී සිටින ලෙසටද අධිකරණයෙන් සැකකරුට නියම විය. ඒ අනුව මෙම සිද්ධිය සම්බන්ධයෙන් තිදෙනෙකු ඇප මත මුදාහැර සිටින අතර සෙසු සැකකරුවන් අටදෙනා ජුනි මස 14 දින දක්වා තවදුරටත් රක්ෂිත බන්ධනාගාර ගත කරන ලෙසටද නියම කෙරිණි.
මෙම සිද්ධිය සම්බන්ධයෙන් අත්අඩංගුවට ගැනීමට නියමිත සැකකරුවකු විදෙස්ගතව සිටින බවටද අධිකරණයෙ හෙළිවිය. නීතිපතිවරයා වෙනුවෙන් පෙනී සිටි අතිරේක සොලිස්ටර් ජනරාල් ලක්මිණී ගිරිහාගම සිද්ධියට අදාළ වැඩිදුර වාර්තාවක්ද අධිකරණයට ඉදිරිපත් කළාය.