මොකක්ද ඉතින් මේ කතාව… පාඨකයාව පිටු 150ක් පුරාවට රදවා ගෙන තියාගෙන ඉන්න තරම්ම පිටුවෙන් පිටුව කුතුහලය මුසු වුනු කතාවක්. මෙය කැනේඩියානූ ජාතික ලේඛකයකු වන ඩෙනිස් තැරියොල්ගේ සම්භාවනීය නව කතාවකි.
බිලාඩෝ කියන්නේ වයස අවුරුදු 27 ක හුදෙකලා ජීවිතයක් ගත කරන අවිවාහක තරුණයෙක්. ඔහු තැපැල් කරුවෙක්. ඔහු ඒකාකාරී ජීවිත රටාවක් ගෙන යන පුද්ගලයෙකු බව බැලූ බැල්මට නම් පේනවා. නමුත් පිටුවෙන් පිටුව ඉස්සරහට යද්දී මෙම ඒකාකාරී ජීවිත රටාවට පරිබාහිරව සදාචාරත්මක විරෝදී අභ්‍යන්තර ජීවිතයක් ඔහුට පවතින බව දක්නට ලැබෙනවා.
එනම් ඔහු යම් ලියුම් ප්‍රමාණයක් ඔහුගේ කබා සාක්කුවේ සගවා ගනිමින් ඔහුගේ නවාතැනේදී ඒවා පරිස්සමින් විවර කොට ඒවා කියවා පිටපත් තබා ගැනීමේ අමුතුම චර්‍යාවක් ඔහු පවත්වාගෙන යනු ලබනවා. ඒ විතරක් නෙමේ එම ලියුම් වර්ග කරමින් ඒ ලියුම් ලැබෙන පුද්ගලයා කෙසේ ඒවාට පිළිතුරු සපයනවාදැයි අනුමාන කරමින් රාත්‍රී කාලයා ගෙවා දමනවා. නමුත් පසු දින විවර කල ලියුම් ඔහු විසින්ම නැවත සීරුවට අලවා ලියුම් අයිතිකරුවාට ලැබෙන්නටත් සලස්වනවා.
නමුත් දිනක් ඔහුට එක්තරා අමුතුම ආකාරයේ ලියුමක් දකින්න ලැබෙනවා. මේ ලියුම් ගනුදෙනුව තමා ඔහුගේ ජීවිතය උඩු යටිකුරු කිරීමට සමත් වන්නේ. ඒ සිගොලේන් සහ ගැන්ඩ්පේ ගේ ලිපි හුවමාරුවයි. ඒ ඔවුන් ලිපි හුවමාරු කර ගන්නේ කාව්‍යමය අනුරූපයෙන් වන නිසා. මෙහිදී බිලාඩෝ මුහුණ පාන ගැටලුව වන්නේ සිගොලේන් ගේ ලිපි ඔහුට ලැබුනත් ගැන්ඩ්පේ ගේ ලිපි ඔහුට නොලැබෙන නිසා අනුමාන කිරීමට සිදු වීමෙන්. බිලාඩෝ ට මුලදී මේ ලිපි තේරුම් ගැනීමට අපහසු වූවත් පසුව ඔහු මේ කාව්‍යමය අනුරූපීන් පිලිබද සොයා බැලීමෙන් පසු මේවා ජපන් හයිකූ කවි ලෙස හදුනා ගන්නවා. මේ ජපන් හයිකූ කවි යනු කෙටි නමුත් ගැඹුරු අර්ථයක් ගැබ්ව ඇති කාව්‍ය විශේෂයක්. පසුව බිලාඩෝ මෙම හයිකු කවි වල ස්වභාවය අද්‍යනය කරමින් ඔහු ඒවා අවබෝද කර ගැනීමටත් ගැන්ඩ්පේ කෙසේ මේවාට පිලිතුරු ලියන්නේ දැයි අනුමාන කරමින් ඔහුද හයිකු කවි ලිවීම අරම්භ කරනවා. නමුත් එක්තරා වැහි දිනයක ගැන්ඩ්පේ හදිසි අනතුරකට භාජනය වෙනවා. ඒ මොහොත බිලාඩෝ සමීපයේ සිටින අතර ඔහු යම් දෙයක් අතේ ගුලි කරගෙන සිටින බව දක්නට ලැබුනත් එදා වැසි දිනයක් නිසා එය ලබා ගැනීමට බිලාඩෝට හැකි වන්නේ නෑ. ඔහුත් සමගම ඔහුගේ අවසන් ලිපියද මිය යනවා. ඔහු එම අවස්තාවේදී අවසන් වචනයක් පවසනවා එනම් “එන්සෝ”. මේ වචනය කුමක්දැයි බිලාඩෝ ට සොයා ගැනීමට ලැබෙන්නේ නෑ….
ගැන්ඩ්පේගේ අභාවයත් සමග බිලාඩෝ තුල මහත් වෙනසක් සිදු වෙනවා. එනම් ඔහු තුල ඇති වන වෙනස සමග ඔහු තවත් ගැන්ඩ්පේ කෙනෙකු බවට පත් වෙන්වා. මින් පසු ලිපි හුවමාරුව වන්නේ ගැන්ඩ්පේ ලෙසින් පෙනී සිටින බිලාඩෝ සමගයි. සිගොලේන් සහ ගැන්ඩ්පේ අතර හුවමාරු වන ලිපි තුල ඇත්තේ මිත්‍රත්වයක සේයා පමණක් නමුත් බිලාඩෝ ගේ හයිකු තුල මිත්‍ර කමට එහා ගිය රහසිගත ආදරයක සේයාවකුත් දක්නට ලැබෙනවා. ගැන්ඩ්පේ මිය ගිය පසු ඔහුගේ නිවස මිලදී ගන්නා බිලාඩෝ ඔහු වාගේම ජීවත් වීමට උත්සහා කරනවා. ඉතින් මෙතනින් එහාට තමා මේ කෘතියේ උද්වේගකරම දේවල් උදා වන්නේ. බිලාඩෝගේ එකම යහලුවා රිචඩ් සහ ඔහුගේ ඒක පාර්චවීය ප්‍රේමවන්තිය නතාලියා මේ අයත් මගදී මේ කතාවට සම්බන්ද වෙනවා. ඔවුන්ගේ ක්‍රියාවන් තුලින් බිලාඩෝගේ ජීවිතය කෙසේ වෙනස් වේවීද කියලා බලන්න තවත් ඉදිරියට කෘතිය කියවිය යුතුමයි. ඒ විතරක් නෙමේ සිගොලේන්, ගැන්ඩ්පේ නමින් පෙනී සිටින බිලාඩෝට ආදරය දැක්වූවාද? කෙසේ බිලාඩෝගේ ඉරණම තීරණය වී එය අවසන් වෙනවාද යන්න ? මෙහි අවසානය පාඨක ඔබට කියවීමට බාර කිරීමට මා කැමතිය. එය සිහි කල්පනාවෙන් කියවිය යුතු වෙනවා වගේම කුතුහලය පිරුනු අපූර්ව කෘතියක්. එහි ඇති හයිකු කවි වල අරුත් අලුත්ම අත්දැකීමට වනවා නියතයි පාඨක ඔබට.
පිටු 150ක් පුරාවට පිටුවෙන් පිටුව ඔබව ආනන්දයෙන් පුරවාලන්නට හැකි රසාලිප්ත පොතක් ඔබ සොයන්නේ නම් මෙය ඔබ කියවිය යුතුම පොතකි. මේ කතාවේ අවසානය ඔබට තබමින් “එන්සෝ” ලෙස මමද පවසමින් “ හුදෙකලා තැපැල් කරුවෙකුගේ අරුම දිවි පෙවත” ට තිත තබමි. මෙහි අවසානය දක්වා කියවා කෘතිය රසවිදීමට ඔබටද ආරාධනා කරමි.
කෘතිය : හුදෙකලා තැපැල් කරුවෙකුගේ අරුම දිවි පෙවත
කතෘ: ඩෙනිස් තැරියෝල්ට්ස්
පරිවර්තනය : චූලානන්ද සමරනායක
ප්‍රකාශක : සුභාවී
Bookish Treasures