“තාත්තේ මට කෙල්ලෙක් ඇඳල දෙන්නකෝ ..”
-පොඩි පුතුගෙ ඇවිටිල්ලක්.
තාත්තෙක් නොසිටිය
මං කොල්ලෙක් ව සිටි කාලෙදි
පන්සල් වගෙයි මට
අම්ම දුන් පැන්සල් මිටි
යළි හැරී
පුස් බැඳුණු මීදුම් පියස්සට
රිංගුවෙමි
ළමා සිනෙමාව අස්සට
යාවෙවී
එළි ඇබින්දෙන්
එළි ඇබින්දට
ගොඩවදිමි,පාදගත්
කඳු අගිස්සට
ඉනික්බිති
පැන්සල හගිස්සා
ඇමතුවෙමි
කෙල්ලොන්ව ඇඳපු
කොල්ලට
ඒත් කෝ ඒ කෙල්ලන් ?
කඳු පන්තියෙන් විමසමි
මිනිරන් වේඳනා
දෝනාව ඇසුරෙහි
රන් රූ මෙණෙවියෝ
පැන්සල් කූර මඩවති
“ඇඳපු හැම කෙල්ලම
අම්මලා වාගෙනෙ
මට ඇඳල ඕනේ
අම්මා වාගෙ කෙල්ලකි !”
..ඉහළ කඳු මුදුනට
නගින දිය ඇල්ලකි
කඳු නැතත් දිය නැතත්
හැම තැනම අම්මෙකි !!
තාත්තෙක් නොසිටිය
මං කොල්ලෙක්ව සිටි කාලෙදි
පින්සල් පියාපත්
පියා’දර සැරියකි ..
දයාබර පුතණුවනි
මට ඇඳිය හැකි මෙපමණි
අම්මා වාගෙ කෙල්ලක්
කෙල්ලගේ දූටයි ඇඳියැකි !!
-ටිම්රාන් කීර්ති .
“මදුරාවතී නම් තරු රටාව “
ප්රථම මුද්රණය -2023
ප්රකාශනය – විදර්ශන
කවර සැලසුම -ඩොමිනික් චන්ද්රසාලි
මිල – 450/.
පාඨක ,විචාරක ,විනිසුරු සභික ,පැසසුමට ,බුහුමනට පත් ,රාජ්ය සම්මානිත ,ඉමහත් රසිකාදරය දිනූ කවියෙකු වන,ටිම්රාන් කීර්ති ගේ පස්වන කාව්ය සංග්රහය තමයි ” මදුරාවතී නම් තරු රටාව “.
එක අතකින් හිතුවම මේ නම ම කවියක් නේද? මට නිකමට හිතෙනවා. හැම කවියෙකුට ම නැතිනම් කිවිඳියෙකුට ම තියෙනවා, තමන්ට ම අනන්ය එක්තරා දුර්ලභ විලාසයක්.
ඒක මේ මේ විදියය, මේ මේ බර ය කියල එළියෙන් ඉන්න අය වෙර දාල පැහැදිලි නොකෙරුවත් ,කවියට ළඟ ,කවියට බද්ධ බහුතරය අර රහස නිරවුල්ව දන්නවා.
ටිම්රාන් කීර්ති ,කියන කවියා ගැනත් ,ඒ හැඳුනුම එලෙසමයි.
රසයි,බරයි ,පැහැයයි පදමට පූරණය වෙලා තියෙන්නේ කොතැනද? අන්න එතැන නොවැරදීම කවියක් තියෙනවා .
ටිම්රාන්ගෙ පෙර ,හැම පොතකමත් අපට එහෙම ‘කවි ‘ අඩු වැඩි වශයෙන් හමුවුණා. ඒව ගැන අපි කතා කළා.බෙදාගත්තා .වැළඳ ගත්තා.සමහර ඒව ගැන රණ්ඩුත් කළා.
හැබැයි, මෙවර මේ පොතේ, තමන් ම ලියූ කවි තමන්ට කැමති කැමති තැන තමන් ට කැමති කැමති විදියට අතුරන්න, කවියෙන් ම මත්වුණු ටිම්රාන්ගෙ හිතට, මදුරාවතී ඉඩක් දීල නැති හැඩක් මට නිකම් පේනවා, පේනවා වගේ.
ටිම්රාන් කීර්ති නම්, කවියා, අනාගතයේ තව අවුරුදු දහයකින් ඉදිරියට ලියන කවියක ඉංඟිති, ටිම්රාන්ටත් නොදැනෙන්න, මදුරාවතී ඔහු ලවා, මෙහි ලියවාගෙන තියෙනවා.
උඩ තියෙන්නේ එහෙම එක කවියක්.!!
ටිම්රාන් මල්ලි,
ආදරෙයි, කියන එක තේරුමක් නෑ .
ඒක තුවාල වුණු තනි වචනයක් .
සම්බන්ධතා ගෞරවණීය වෙන්නෙ වචන අවසන් වෙන තැනින්.
තව තවත් ලියන්න