වනජීවී කලාපවල වැව් – අමුණු පෞද්ගලීකරණය කිරීමේ සැලසුමක් ! – සොබාදහම් අධ්‍යයන මධ්‍යස්ථානය

වනජීවී කලාපවල වැව් අමුණු පෞද්ගලීකරණය කරන සැලසුමක් පිළිබඳව පරිසර හා සොබාදහම් අධ්‍යයන මධ්‍යස්ථානය අද (13) මාධ්‍ය හමුවක් පවත්වමින් කරුණු අනාවරණය කළේය.

එහිදී අදහස් දැක්වු පරිසර හා සොබාදහම් අධ්‍යයන මධ්‍යස්ථානයේ කාරක සභික දිමුතු සඳරුවන් මෙසේ පැවසීය.

‘ජාතික ජල සම්පත් ප්‍රතිපත්තිය 2023 ජූලි මස 10 දින සිට ක්‍රියාත්මක වෙනවා. මුදල් ආර්ථික ස්ථායීකරණ සහ ජාතික ප්‍රතිපත්ති අමාත්‍යාංශය / රාජ්‍ය පරිපාලන ස්වදේශ කටයුතු පළාත් සභා හා පළාත් පාලන අමාත්‍යංශය / වනජීවී හා වන සත්ත්ව සංරක්ෂණ අමාත්‍යාංශය / ධීවර අමාත්‍යාංශය / කෘෂිකර්ම අමාත්‍යාංශය / නාගරික සංවර්ධන නිවාස අමාත්‍යාංශය / පරිසර අමාත්‍යාංශය එක් වී මේ ප්‍රතිපත්තිය ක්‍රියාත්මක කිරීමට නියමිතයි.

දේශගුණික විපර්යාස හේතුවෙන් රටේ ජලය අස්ථාවර වී ඇති නිසා වී වගාව සඳහා ජනතාවට ජලය සැපයීම ස්ථාවර කිරීමට සහ ගංවතුර පාලනය කිරීමට ජල සම්පත් ප්‍රතිපත්තිය ගෙන එන බව ආණ්ඩුව සඳහන් කරනවා. එම ප්‍රතිපත්තියේ 6.4 කොටසේ සිට 6.14 දක්වා ජලය කළමනාකරණය සම්බන්ධව දක්වා තිබෙනවා.

ජලය කළමනාකරණය උදෙසා වූ සභාවක් පිහිටුවීමට මෙම ප්‍රතිපත්තියෙන් යෝජනා කරලා තියෙනවා. එම සභාවේ රෙගුලාසි, නීති අනුව ජලය කළමනාකරණය උදෙසා ආණ්ඩුව ඉදිරියේදී තීරණ ගැනීමට නියමිතයි.

මේ ප්‍රතිපත්තියේ 6.6 වගන්තියේ සඳහන් වන ආකාරයට ජලය වාණිජ වශයෙන් භාවිතා කරන සියලුමදෙනා ඒ සඳහා මිලක් ගෙවිය යුතු වෙනවා. ඒ නිසා ඉදිරියේදී කෘෂිකර්මාන්තයට ගන්නා ජලය සම්බන්ධව වුවද යම් මුදල් අයකිරීමක් කරන්න හැකියාව ලැබෙනවා.

ජාතික ජල සම්පත් ප්‍රතිපත්තිය මගින් ජලය කළමනාකරණය කිරීම මුවාවෙන ජලයට බද්දක් පැනවීම සහ ජල අයිතිය ජනතාවගෙන් උදුරා ගැනීමට කටයුතු කරන බව පෙනෙන්නට තිබෙනවා.’

මෙම මාධ්‍ය හමුවේදී අදහස් දැක්වු පූජ්‍ය කාරියමඩිත්තේ ඤාණාරාම හිමි මෙසේ‍ පැවසීය.

‘සමස්ත ජීවයේ පැවැත්ම තීරණය කරන ජලය වෙළඳ භාණ්ඩයක් කර විකිණීමේ ප්‍රතිපත්තිය වර්ථමාන රජය ද 2011-2048 ජාතික භෞතික සැලැස්ම අනුව ජාතික ජල සම්පත් ප්‍රතිපත්තිය හරහා ක්‍රියාත්මක කරන්න සැලසුම් කරනවා. ස්වභාවික ජල උල්පත් භාවිත කළ ජනතාව එයින් ක්‍රමානුකූලව පුද්ගලික ජල ව්‍යාපෘතිවලට හුරු කිරීම හා ජල නිදහස භුක්ති විඳි ජනතාව ජලයට මුදලක් ගෙවන තැනට හුරු කිරීම ආදී වශයෙන් ජලය විකිණීම ජල කළමනාකරණය නමින් කරළියට එමින් තියෙනවා.

වර්තමාන ආණ්ඩුව 2023/07/10 දින අමාත්‍ය මණ්ඩලය මගින් අනුමත කරගත් ජාතික ජල සම්පත් ප්‍රතිපත්තිය මගින් ජලය ආර්ථික භාණ්ඩයක් ලෙස ගැනීම කෘෂිකර්මන්තයට පරිසරයට වනසතුන්ට සේම ජනජීවිතයට ද මරු පහරක්.’