හිටපු ජනාධිපති චන්ද්‍රිකා බණ්ඩාරනායකට තායිලන්ත රජයෙන් ත්‍යාගයක් ලෙස ලබාදුන් ඇතෙකු වහාම ආපසු සිය රටට යැවිය යුතු බව මෙරට තායිලන්ත තානාපති පෝජ් හර්න්පෝල් අවධාරණය කර තිබේ.
මුතුරාජා නම් මෙම ඇතා, අලුත්ගම කන්දේ විහාරයට ලබාදී තිබිණි. එම ඇතාට අවශ්‍ය පහසුකම් නිසිපරිදි නොලැබීම නිසා දැඩි රෝගී තත්ත්වයට පත්ව ඇත.
මේ බව වාර්තා වීමෙන් පසු තායිලන්ත තානාපතිවරයා එහි ගොස් තිබේ.
යන්තම් ශේප් !
ඇතාගේ තත්ත්වය දුටු ඔහු, වහාම තායිලන්ත රජයේ ප්‍රධානීන් සමග සාකච්ඡා කොට ඇතා ආපසු ගෙන්වාගැනීම අනිවාර්යෙන්ම කළ යුතු බව පෙන්වා දී ඇත. ඒ බව මෙරට වනජීවී සහ වන සංරක්ෂණ අමාත්‍යංශයට ද දැනුම් දීමට තානාපතිවරයා කටයුතු කර තිබේ.
ඉන්පසු එම අමාත්‍යංශ ලේකම් ආර්.එම්.සී.එම්. හේරත් සහ විෂය බාර ඇමති මහින්ද අමරවීර තානාපතිවරයා සමග සාකච්ඡා කොට, අදාළ ඇතා දෙහිවල සත්වෝද්‍යානයට බාරදීමට කටයුතු කර ඇත. තානාපතිවරයා පෞද්ගලිකව ම සත්වෝද්‍යානයට ද ගොස් ඇතා පිළිබඳ සොයා බලා ඇති අතර, එහිදී දැනට ලබාදී ඇති ප්‍රතිකාර පිළිබඳ සෑහීමට පත්ව ඇත.
ඇතා බාරව සිටි පුද්ගලයන්ට එරෙහිව කටයුතු කිරීමේ හැකියාව සම්බන්ධයෙන් ද තානාපතිවරයා විසින් අමාත්‍යංශ ලේකම්වරයා සමග සාකච්ඡා කොට ඇත.
ආගමික ස්ථාන උදාහරණ
මීට පෙර කෝට්ටේ රජමහා විහාරය බාරයේ සිටි ඇතෙකු සහ අලියෙකු බරපතළ හිංසනයට ලක්වීමෙන් පසු මියගොස් තිබිණි.
එසේම මාතර, දෙවුන්දර දේවාලය බාරයේ සිටි කළණ නම් ඇත් පැටවා ද එසේ හිංසනයට ලක්වෙමින් සිටින බව මාධ්‍ය මගින් අනාවරණය කිරීමෙන් පසු, බලධාරීන්ගේ මැදිහත්වීමෙන් එම ඇත් පැටවා රිදියගම සෆාරි උද්‍යානයට බාරදීමට කටයුතු කරන ලදි. ඒ සඳහා සක්‍රීය ව මැදිහත් වූයේ මාධ්‍යවේදී දයා නෙත්තසිංහ ය.
කැබිනට් හිංසනය
මේ අතර මීට පෙර පැවති ආණ්ඩුව අලි-ඇතුන් සම්බන්ධයෙන් ගත් අත්තනෝමතික කැබිනට් තීන්දුවක් ඒ ආකාරයට ම ක්‍රියාත්මක කිරීමට වර්තමාන ආණ්ඩුව ද කටයුතු කළේය. ඒ පුද්ගලික බාරයේ සිටියදී අත්අඩංගුවට ගෙන රජයේ බාරයට පත් කර සිටි හීලෑ අලි-ඇතුන් 49 දෙනෙකු සම්බන්ධයෙනි.
ඒ අතරින් වනජීවී සංරක්ෂණ දෙපාර්තමේන්තුව සහ ජාතික සත්වෝද්‍යාන දෙපාර්තමේන්තුව බාරයේ සිටි අලි-ඇතුන් 30 දෙනෙකු නිදහස් කිරීම සඳහා මෙම කැබිනට් පත්‍රිකාව ඉදිරිපත් කෙරිණි. පරිසරවේදීන්ගේ බලවත් විරෝධය හේතුවෙන් එය ක්‍රියාත්මක වීම කල් ගියද, එය සම්පූර්ණයෙන්ම නතර කර ගැනීමට නොහැකි විය.
හිංසනයට එකමුතු වීම
වර්තමාන ජනාධිපති, එවකට අගමැති රනිල් වික්‍රමසිංහ, බුද්ධශාසන හා වයඹ සංවර්ධන එවකට ඇමති ගාමිණී ජයවික්‍රම පෙරේරා සහ සංචාරක සංවර්ධන, වනජීවී සහ ක්‍රිස්තියානි කටයුතු එවකට ඇමති ජෝන් අමරතුංග විසින් ඒකාබද්ධ කැබිනට් පත්‍රිකාවක් ලෙස මෙය ඉදිරිපත් කර තිබිණි.