විරෝධතාවක් අතරතුරදී පානදුර මූලස්ථාන පොලිසියේ ස්ථානාධිපති චමින්ද පින්තෝ විසින් පොලිස් නිලධාරිනියන් දෙදෙනෙකු බෙල්ලෙන් අල්ලා ඉදිරියට තල්ලු කිරීමට අදාළ සිදුවීම පිළිබඳ එම නිලධාරිනියන් සහ ඉහළ පොලිස් නිලධාරීන් අතර සාකච්ඡාවක් ඊයේ (15) පෙරවරුවේ සූම් ඔස්සේ පවත්වා තිබේ.
ජ්‍යෙෂ්ඨ නියෝජ්‍ය පොලිස්පතිවරයෙකුගේ ප්‍රධානත්වයෙන්, නියෝජ්‍ය පොලිස්පති, ජ්‍යෙෂ්ඨ පොලිස් අධිකාරි, පොලිස් අධිකාරි, සහකාර පොලිස් අධිකාරි ඇතුළු ප්‍රදේශය බාර ඉහළ පොලිස් නිලධාරීන්ගේ සහභාගිත්වයෙන් මෙම සාකච්ඡාව පවත්වා ඇත. ඒ සඳහා අදාළ නිලධාරිනියන් දෙදෙනා බාර ඉහළ පොලිස් නිලධාරිනියන් දෙදෙනෙකු ද සහභාගි වී තිබේ.
‘අපේ ප්‍රශ්න’
මෙහිදී අදාළ ජ්‍යෙෂ්ඨ නියෝජ්‍ය පොලිස්පතිවරයා පැහැදිලිව පවසා ඇතැයි විශ්වාස කටයුතු ආරංචි මාර්ග තහවුරු කරන්නේ ‘අපේ ප්‍රශ්න අපි බේරගන්න ඕනෙ, රාජකාරි අතරතුර එතැන තියෙන කලබලයත් එක්ක ඕනෙ තරම් ඔය වගේ සිදුවීම් වෙන්න පුළුවන්. ඒවා තරහකින් කරන දේවල් නෙමෙයිනෙ. ඒක හින්දා මේක අතහැරලා දාන්න’ යනුවෙනි.
ඉන්පසු ඊට පක්ෂ ව තවත් ඉහළ පොලිස් නිලධාරියෙකු ද සිය අත්දැකීම් එකතු කරමින් අදහස් දක්වා ඇත.
වින්දිත එකඟතාව
ඉන්පසු අදාළ නිලධාරිනියන් දෙදෙනා පවසා ඇතැයි වාර්තා වන්නේ එය හිතාමතා කළ තල්ලු කිරීමක් නොවන බවයි. තම ඉහළ නිලධාරියා එහි සිටිනු තමන් නුදුටු බව ද ඔවුන් පවසා ඇති අතර, සිදුවීම ඉදිරියට පවත්වාගෙන නොයෑමට ද එකඟ වී තිබේ.
ඉන්පසු එම නිලධාරිනියන් බාර ඉහළ නිලධාරිනියන් ද මේ සිදුවීම සම්බන්ධයෙන් මාධ්‍ය වාර්තා කළ ද, තමන්ට වාර්තා නොවූ බවත්, අදාළ සිදුවීමට මුහුණ දුන් නිලධාරිනියන් ඒ පිළිබඳව තමන් දැනුවත් නොකළ බවත් පවසා ඇත.
එයින් පසු රාජකාරි කටයුතුවලදී තමන් මුහුණ දුන් අත්දැකීම් පිළිබඳ ජ්‍යෙෂ්ඨ නියෝජ්‍ය පොලිස්පතිවරයාගේ දීර්ඝ අදහස් දැක්වීමකින් සාකච්ඡාව අවසන් කර තිබේ.
දිවයින ප්‍රවෘත්තිය
අද (16) දිවයින පුවත්පත මෙවැනි ප්‍රවෘත්තියක් වාර්තා කර තිබිණි.
‘උද්ඝෝෂකයන් මෙල්ල කිරීමට පොලිස් කාන්තාවන් දෙදෙනෙකුගේ බෙල්ලෙන් අල්ලා ඔවුන් ඉදිරියට යැවීමට තැත් කළ පානදුර (දකුණ) ප්‍රධාන පොලිස් පරීක්ෂකවරයාගේ ක්‍රියාකලාපය පිළිබඳ පොලිස් නිලධාරීහු පිරිසක් පෙරේදා (15) සිට පරීක්ෂණ ආරම්භ කළහ.
මේ සම්බන්ධයෙන් සිද්ධියට අදාළ පොලිස් කාන්තාවන් දෙදෙනාගෙන් ද ප්‍රකාශ ලබාගෙන ඇත.
එහිදී මෙම පොලිස් කාන්තාවන් පවසා ඇත්තේ මෙම ක්‍රියාව තමන්ට ප්‍රශ්නයක් නොවන බවයි.
චෝදනාවට ලක්ව සිටින ප්‍රධාන පොලිස් පරීක්ෂකවරයා පවසා ඇත්තේ එම අවස්ථාවේ තමන් පොලිස් නිලධාරීන් රාජකාරිය සඳහා උනන්දු කළ බවයි.’
සිදුවීම කුමක්ද?
ත්‍රස්තවාදය වැලැක්වීමේ පනත යටතේ ලබාගත් දින 90ක රැඳවුම් නියෝගයක් යටතේ රඳවාගෙන සිටින අන්තර් විශ්වවිද්‍යාල ශිෂ්‍ය බල මණ්ඩලයේ කැඳවුම්කරු වසන්ත මුදලිගේ සහ සිරිධම්ම හිමි නිදහස් කරන ලෙස ආණ්ඩුවට බල කරමින් පසුගිය 14දා පැවති විරෝධතා පාගමනක් අතරතුර මෙම සිදුවීම සිදු විය. ඊට අදාළ වීඩියෝ සාක්ෂි සියල්ල මාධ්‍ය මගින් ප්‍රචාරය කෙරිණි.
පොලිස්පති බේරෙයි
ඉන්පසු පොලිසිය වෙත එල්ල වූ දැඩි විරෝධය නිසා පොලිස්පති චන්දන වික්‍රමරත්න විසින් සිද්ධිය පිළිබඳ විමර්ශනයක් පැවැත්වීම ඔහු යටතේ පවතින විශේෂ විමර්ශන ඒකකයට බාරදුන්නේය. විශ්වාස කටයුතු ආරංචි මාර්ග සඳහන් කරන්නේ එම පරීක්ෂණය පවත්වන නිලධාරීන් අදාළ සිදුවීමට මුහුණ දුන් නිලධාරිනියන්ගෙන් ප්‍රකාශ ලබාගෙන ඇත්තේ ඊයේ පැවති සූම් සාකච්ඡාවෙන් පසුව ය.
සමාජ බලපෑම
අදාළ වීඩියෝ සාක්ෂි මත පදනම් ව මෙම සිදුවීම සම්බන්ධයෙන් නීතිමය පියවර ගැනීමේ හැකියාවක් තුන්වැනි පාර්ශ්වයකට තිබේ ද යන්න පිළිබඳව thetime.lk නීතිවේදීන් කිහිපදෙනෙකුගෙන් විමසීමු.
ඔවුන් සඳහන් කළේ එවැනි හැකියාවක් පවතින්නේ පොදු සමාජයට මෙම සිද්ධිය බලපෑම් එල්ල කරන බව තහවුරු කළ හැකි නම් පමණක් බවයි. (Public Interest Litigation) වින්දිත පාර්ශ්වයට මෙවැනි සිද්ධියකදී වධහිංසා පනත යටතේ නීතිමය පියවර ගැනීමට හැකියාව ඇති බවත්, එසේ නොමැති නම් ශ්‍රී ලංකා මානව හිමිකම් කොමිෂන් සභාවට හෝ ශ්‍රේෂ්ඨාධිකරණයේ මූලික අයිතිවාසිකම් පෙතසමක් ගොනුකිරීමේ හැකියාව ඇති බවත් ඔවුහු අප කළ විමසීමේදී පෙන්වා දුන්හ.
එහෙත් මෙහිදී අදාළ නිලධාරිනියන් තමන්ගේ පාර්ශ්වයෙන් එය ඉදිරියට ගෙන නොයන බව සඳහන් කර තිබේ.
කමිටුව ලත් තැන ලොප්
පොලිස් දෙපාර්තමේන්තුවේ රාජකාරි කිරීමේදී කාන්තාවන් මුහුණ දෙන ගැටළු සම්බන්ධයෙන් මානව හිමිකම් ආයතන කිහිපයක් එක්ව 2014 වසරේදී සමීක්ෂණයක් කරන ලද අතර, එහිදී අනාවරණය වී තිබුණේ පහළ පොලිස් නිලධාරිනියන්ගෙන් බහුතරයක් විවිධ ගැටලුවලට මුහුණ දී ඇති බවයි. එහෙත් ඔවුන් රැකියාව පිළිබඳ ඇති බිය නිසා ඒ පිළිබඳ අනාවරණය කිරීමෙන් වලකින බව ද මේ සම්බන්ධයෙන් පොලිස් දෙපාර්තමේන්තුව වෙත බාර දී ඇති අදාළ වාර්තාවේ සඳහන් වේ.
පසුව පොලිස්පති එන්.කේ. ඉලංකෝන්ගේ කාලයේදී මෙම වාර්තාවේ සඳහන් කරුණු පදනම් කරගනිමින් පොලිස් නිලධාරිනියන්ට පහසුකම් ලබාදීම පිළිබඳ අධ්‍යයනය කිරීමට ඉහළ පොලිස් නිලධාරිනියන්ගෙන් සමන්විත කමිටුවක් පත්කර තිබේ. එහෙත් එම කමිටුවේ කටයුතු ඉදිරියට ගොස් නැත.