MEDCOM Short Film Competition – 8th World Conference on Media and Mass Communication කෙටි චිත්‍රපට උළලේ හොඳම සිනමා නිර්මාණය (Top Short Film) ලෙස PIETA හෙවත් ‘අපරාධ රාජ්‍යයක කතාවක්’ තෝරාගැනිණි.
එනම්, MEDCOM Short Film Competitionහි ලෝකයේ විශිෂ්ඨතම චිත්‍රපටය – PIETA ය.
ක්ෂේත්‍ර රැසක් ඔස්සේ සිය හැකියාව විහිදුවන PIETA අධ්‍යක්ෂ – රවිඳු ප්‍රනාන්දු සමග thetime.lk කළ කතාබහකි, මේ.
PIETA ඊළඟට කොතැනටද ?
සරල අර්ථයෙන් කිව්වොත්, PIETA කෙටි චිත්‍රපටය ඊළඟට සාමාන්‍ය ප්‍රේක්ෂකයන්ට බාරකරනවා. චිත්‍රපටය ශ්‍රී ලංකාව තුළ සහ අන්තර්ජාතික කෙටි චිත්‍රපට කිහිපයක් නියෝජනය කළා සහ ජයග්‍රහණය කළා. දැනට හිතාගෙන ඉන්නවා මේ අවුරුද්දෙ අප්‍රේල් 21 වැනිදා මේ චිත්‍රපටය අපේ රටේ පුරවැසියන්ට බාරකරන්න.
ඊට එහා ගිය අර්ථයකින් කිව්වොත්, PIETA හරහා තව-තවත් නිර්මාණ කරන්න සැලසුම් කරමින් ඉන්නවා. තිරපිටපත් කිහිපයක් එක්ක මේ දවස්වල වැඩ කරනවා. කෙටි චිත්‍රපට, වෘතාන්ත චිත්‍රපට සහ වේදිකා නාට්‍යයක් විදිහට තමයි ඒවා සැලසුම් කරමින් ඉන්නෙ.
රවිඳු ප්‍රනාන්දු ඊළඟට කොතැනටද ?
ඉහත කියපු නිර්මාණ එක්ක තමයි මම නිර්මාණකරුවෙක් විදිහට ඉදිරියට යන්න බලාපොරොත්තු වෙන්නෙ. සමහරවිට මේ රටේ තියෙන තත්ත්වය එක්ක ඉදිරි නිර්මාණ එක්ක රවිඳු ප්‍රනාන්දුට කොහෙ- කොහෙ යන්න වෙයිද කියලා තාම හරියට කියන්න බැරි වුණත්, මේ රට වඩා යහපත් තැනක් කරන්න නිවහල් පුරවැසියෙක් විදිහට කරන්න පුළුවන් උපරිම දෙයක් කරනවා. ඒක නිර්මාණ හරහා වගේම මට කරන්න පුළුවන් ඕනෑම දෙයකින් වෙන්න පුළුවන්.
අපරාධ රාජ්‍යය තුළ පුරවැසියාගේ භූමිකාවත්, නිර්මාණකරුවාගේ භූමිකාවත් හඳුනාගන්නෙ කොහොමද ?
අපරාධ රාජ්‍යයක් වුණු මේ වගේ රටක, දවසෙන් දවස වලපල්ලට යන මේ වගේ රටක නිර්මාණයක් කරනවා කියන එක සෑහෙන විශාල අභියෝගයක්. ඒ අභියෝගය ආර්ථිකය මත රඳාපවතින එකක් විතරක් නෙමෙයි, මානසික නිදහස සහ ජීවන රටාව එක්ක බද්ධවෙලා තියෙන එකක්. හැබැයි බොහෝඅයට මේ වගේ රටක නිර්මාණයක් කරනවා කිව්වම මුලින්ම ඔළුවට එන්නෙ ආර්ථිකය. හැබැයි මට අනුව ආර්ථිකය තියෙන්නෙ ටිකක් පහළ. මට වැදගත් මානසික නිදහස සහ ජීවන රටාව. අපරාධ රාජ්‍යයක පුරවැසියෙක් විදිහට අපිට නිර්මාණයක් කරන්න මානසික නිදහසක් නැහැ. නැත්නම් බොහොම අඩුයි. අනෙක තමයි අපිට අපේ ජීවන රටාව යහපත් සහ අපිට පුරුදු විදිහට පවත්වාගෙන යන්න මේ වෙනකොට ඉඩකඩක් නැතිවෙලා තියෙනවා.
ඉතින් නිර්මාණකරුවෙක් විදිහට කෙසේ වෙතත් පුරවැසියෙක් විදිහටවත් අපිට ජීවත්වෙන්න අපහසු වෙලා තියෙනවා.
උදාහරණයක් විදිහට මෙහෙම හිතන්නකො… මේ රටේ දවසෙන් දවස සිද්ධවෙන අපරාධවලට අපිට පුරවැසියෙක් විදිහට කෙලින් හිටගන්න පුළුවන්ද කියලා. බැහැනෙ… එක්කො අපිට ගහයි, නැත්නම් අපේ චරිත අල්ලලා මඩ ගහයි. බැරිම වුණොත් අපිව මරයි… ඉතින් මම හිතනවා නිර්මාණකරුවා කෙසේ වෙතත්, පුරවැසියෙක් විදිහටවත් මේ රටේ කෙලින් හිටහන්න අපිට අපහසුයි.
නමුත් කොහොම හරි මේ අපරාධ රාජ්‍යයට එරෙහිව පුරවැසියෙක් විදිහට, නිර්මාණකාරයෙක් විදිහට සටන් කරන්න ඕනෙ. තම-තමන්ට පුළුවන් විදිහට නිර්මාණාත්මක නිර්මාණ ආයුධවලින් අපරාධකාරී පාලකයාට පහර දෙන්න ඕනෙ සහ ඔබ – මම ඇතුළු සාමාන්‍ය ජනතාවගේ පරිකල්පනය මේ අපරාධ රාජ්‍යයට එරෙහිව සන්නද්ධ කරන්න ඕනෙ. මම හිතන්නෙ ඒක තමයි, නිර්මාණකරුවා සහ පුරවැසියාගේ භූමිකාව.
මේ නිර්මාණය : PIETA, ජයග්‍රහණ ලබාගනිමින් ඉදිරියට යනවා. ඒ ගැන සඳහනක් කරමු … ?
දැනට PIETA කෙටි චිත්‍රපටය විදෙස් කෙටි චිත්‍රපට උළෙල 4ක් නියෝජනය කරලා තියෙනවා. ඒ අතරින් MEDCOM Short Film Competition – 8th World Conference on Media and Mass Communication චිත්‍රපට උළෙලේ හොඳම චිත්‍රපටය විදිහට තේරී පත්වුණා. Student World Impact Film Festival එකේ Quarter Finalist වුණා. 2022 වසරේ Agenda 14 Short Film Festival – Sri Lanka හිදී ප්‍රේක්ෂකාගාරයේ සම්මානය PIETA වෙනුවෙන් ලැබුණා. ඒ හැම එකක්ම හුඟක් වටිනවා වගේම භෞතික සම්මාන නොවුණත් මිනිස්සු මේ ෆිල්ම් එක බලලා දෙන අදහස්, හොඳ, නරක, අදහස්, විවේචන හැමදෙයක්ම මට සෑහෙන්න වටිනා ඇගයීම් විදිහට මම දකිනවා. ඒ හැම එකක්ම මට ජයග්‍රහණ.