රජයේ පාලනය යටතේ පවතින කොමිෂන් සභා, නියෝජිතායතන, පදනම් සහ සංවිධාන 100කට වැඩි සංඛ්යාවක් කඩිනමින් වසාදැමීමට හෝ එමගින් සිදු කළ කටයුතු වෙනත් රජයේ ආයතනවලට පැවරීමට තීරණය කර ඇත.
ජාතික වැටුප් කොමිසම ද ලබන මාර්තු 31දා සිට වසාදැමීමට නියමිත ය. එහි කටයුතු මුදල් අමාත්යංශය යටතේ ඇති කළමනාකරණ සේවා දෙපාර්තමේන්තුවේ අධ්යක්ෂ ජනරාල්වරයා වෙත සහ රාජ්ය පරිපාලන අමාත්යංශය යටතේ ඇති ස්ථාපිත කළමනාකරණ අධ්යක්ෂ ජනරාල් වෙත පැවරීමට සැලසුම් කර තිබේ.
වැටුප් කොමිසමේ සාමාජිකයන් 15ක් සහ වෙනත් කාර්ය මණ්ඩල 36ක් ඇතුළු සියලු නඩත්තු කටයුතු සඳහා මාසිකව රුපියල් මිලියන 5.8ක් වැයකරන බව රජයේ ආරංචි මාර්ග සඳහන් කරයි. පසුගිය පෙබරවාරි මාසයේ කොමිසමේ වැටුප් සඳහා රුපියල් මිලියන 2.7ක් සහ බණ්ඩාරනායක සම්මන්ත්රණ ශාලාවේ පිහිටි කාර්යාල කුලිය ලෙස රුපියල් මිලියන 1.4ක් වැය කර ඇතැයි ද පෙන්වා දෙන එම ආරංචි මාර්ග, කොමිසම සඳහා 2023 වසරට වෙන්කර ඇති මුළු මුදල රුපියල් මිලියන 71ක් බව ද පවසයි.
කොමිසම වසාදැමීමෙන් පසු එහි සේවක පිරිස රාජ්ය පරිපාලන අමාත්යංශයට අනුයුක්ත කිරීමට නියමිත ය.
මේ අතර 2021 අගෝස්තු මාසයේ ත්රස්තවාදය වැලැක්වීමේ පනතේ කටයුතු ක්රියාත්මක කිරීම සඳහා ජනාධිපතිවරයා යටතේ පිහිටුවන ලද ආයතනයක් ද වසාදැමීමට නියමිත අතර, එහි කටයුතු ජනාධිපති ලේකම් කාර්යාලයෙන් ඉවත් කර අධිකරණ අමාත්යංශය යටතට පැවරීමට සැලසුම් කර තිබේ.
එසේ ම අධ්යාපන අමාත්යංශය යටතේ ක්රියාත්මක නියෝජිතායතන 17ක් ද කඩිනමින් වසාදැමීමට තීරණය කර තිබේ.