ප්‍රංශ ජාතික සම්මානනීය සුරූපී සිනමා නිළියක් හා අධ්‍යක්ෂකවරියක් වන Laure de Clermont – Tonnerre විසින් අධ්‍යක්ෂණය කරන ලද නවතම චිත්‍රපටිය වනුයේ Lady Chatterley’s Lover – 2022 ය. නාටකීය ෂානරයට අයත් මෙම චිත්‍රපටය විනාඩි 127 ධාවන කාලයකින් යුක්තය .
චිත්‍රපටයට පාදක වූ නවකතාවේ පසුබිම කෙබඳුද ?
බ්‍රිතාන්‍ය ජාතික විශිෂ්ට නවකතාකරුවකු , කෙටිකතාකරුවකු හා කවියකු වූ ඩී .එච් ලෝරන්ස් ( David Herbert Richards Lawrence 1885 – 1930 ) විසින් රචනා කරන ලද මහත් ආන්දෝලනයකට තුඩු දුන් Lady Chatterley’s Lover – 1928 නැමති නවකතාව මෙම චිත්‍රපටය සදහා පාදක වී ඇත්තේ ය.
Lady Chatterley’s Lover නවකතාව තරම් ගෙවීගිය විසිවැනි සියවසේ ලොව ඉමහත් ආන්දෝලනයකට හා නඩුහබවලට භාජනය වූ නවකතාවක් ලෝකයේ තවත් නොමැති තරම්ය. ඒ තරමට මෙහි නවකතාකරුවා වන ලෝරන්ස්ට විවිධ අභියෝග හා කම්කටොලුවලට මෙම නවකතාව රචනා කිරීම නිසා මුහුණදීමට සිදුවිය.
Lady Chatterley’s Lover නවකතාව අරබයා වික්ටෝරියානු සුචරිතවාදය විසින් අසභ්‍ය නවකතාව වශයෙන් හංවඩු ගසන ලදි. මෙම කාරණාවේදී නවකතාකරුවකු. කෙටිකතාකරුවකු , නාට්‍ය රචකයකු වූ ඔස්කාර් වයිල්ඩ් ( Oscar Wilde ) නොබියව මෙම නවකතාව පැත්තේ හිඳිමින් ප්‍රකාශ කරන ලද්දේ “සාහිත්‍යයේ සභ්‍ය අසභ්‍ය කියා දෙයක් නොමැති බවයි”.
මෙම නවකතාව නිසා ලෝරන්ස්ට අධිකරණ ක්‍රියාවලියකට පවා මුහුණු දීමට සිදුවූ බව මවිසින් ඉහත සදහන් කරන ලද බව නැවත සිහිකරගන්න . මෙම නවකතාව අරබයා පවරන ලද නඩුවේදී ලෝරන්ස් වෙනුවෙන් අධිකරණයට කරුණු දක්වන ලද නීති – විශාරදයන් ඉදිරිපත් කරන ලද තර්ක විතර්ක හමුවේ දී Lady Chatterley’s Lover නවකතාව කාර්මිකකරණයෙන් පරාරෝපණය වූ නූතන මිනසාගේ විඥාන ධාරාව විවිධ අවස්ථා හා හැඟීම් සම්බන්ධයෙන් ක්‍රියාත්මක වන ආකාරය ඉතා ව්‍යක්ත ආකාරයෙන් යථාර්තවාදී රීතිය අනුගමනය කරමින් රචිත විශිෂ්ට නවකතාව වශයෙන් අධිකරණයට පිළිගැනීමට සිදුවිය .
Lady Chatterley’s Lover නවකතාව තුළින් කාර්මිකරණයෙන් පරාරෝපණය වූ නූතන මීනීසාගේ පැවැත්ම කිසිවිටෙක වෙනස් කළ නොහැක්කක් සේ නවකතාකරුවා දකියි . හෙතෙම “කෝනි” ( චැට්ලි ආර්යාවගේ ) චරිතය තුළින් විවරණය කරන්නේ “අනාගතය දකින්නේ දෙවියන් දෙවියන් පමණක් බවයි.” ( පිටුව 168 ) .
වඩාත්ම ධනාත්මක අනාගතයක් සදහා වැඩදායි ව්‍යාපාර ශක්‍යතාව ද නවකතාකරුවා ධනාත්මකව දකින්නේ ය. මිනිසා මිනිසත්කමින් පිරි හෙළ හුදු යන්ත්‍ර-සූත්‍ර බවට පරිවර්තනය වූ පතල් කම්කරුවන් තුළ මියැදෙන ප්‍රාණථ යලිදු නැගී සිටියහොත් එය සිතීමට පවා අපහසු අති භයානකකාරී තත්වයක මූලාරම්භය බව කෝනි චරිතය තුළින් නවකතාකරුවා වැඩිදුරටත් දකින්නේ ය.
සදාචාරාත්මක වශයෙන් නූතනවාදි ලේඛකයකු වශයෙන් ලෝරනස් වික්ටෝරියානු ආචාර්ය ධර්ම පද්ධතයේ (සුචරිතවාදයේ ) සීමා මායිම් Lady Chatterley’s Lover නවකතාව තුළින් සුණුවිසුණු කර දමන බව පෙනේ.
මෙපරිදී ගෙවීගිය විසිවැනි සියවසේ දිවිගෙවූ මූලාරම්භය නවකතාකරුවෝ යථාර්තය, භාෂාව හා කලාවේ පුනර්-නිර්මාණය යෙදුණාහුය . ඔවුන් විසින් තම නවකතා තුළින් ප්‍රබල වූ පරිකල්පනයන් ගෙවීගිය විසිවැනි හසියවසේ මුල්ම දශක තුනෙහි කාර්මිකකරණයෙන් හා වාණිජකරණය වූ ලෝකයාගෙන් මිනිසාට එල්ලවූ පීඩනයට තම නවකතා තුළින් ප්‍රතිචාර දැක්වූ බව පෙනේ. ඊට කදිම උදාහරණයකි , Lady Chatterley’s Lover යන මෙම විශිෂ්ට නවකතාව.
ලෝකයේ එදා මෙදාතුර ඉමහත් ජනප්‍රියත්වයකට හිමිකම් කියන Lady Chatterley’s Lover නවකතාව පිළිබඳව වර්තමානයේ වුවද ලොව නන්දෙස විවිධ විචාර හා විවිධ සෙවුම්-බැලුම් කරන්නේ ය.
~චිත්‍රපටයේ නාමාවලිය~
Directed by
Laure de Clermont-Tonnerre
Screenplay by David Magee
Based on Novel
Lady Chatterley’s Lover
Produced by
Laurence Mark
Pete Czernin
Graham Broadbent
Starring
Emma Corrin
Jack O’Connell
Matthew Duckett
Ella Hunt
Faye Marsay
Joely Richardson
Cinematography Benoît Delhomme
Edited by Géraldine Mangenot
Music by Isabella Summers
Production companies
Laurence Mark Productions
Blueprint Pictures
3000 Pictures
Harper Collins
Distributed by Netflix
Release dates
2 September 2022 (Telluride)
25 November 2022
( United Kingdom/United States )
2 December 2022 ( Netflix )
Running time ~ 127 minute
Language ~ English / Franch
නවකතාවේ ශ්‍රව්‍ය-දෘශ්‍ය ඉතිහාසය කෙබඳුද ?
Lady Chatterley’s Lover නවකතාව පසුබිම කරගෙන එදා මෙදාතුර චිත්‍රපටයක් හා ටෙලිනාට්‍යයක් දෙකක් නිර්මාණය කර ඇත්තේ ය. මෙහි පළමු චිත්‍රපටය ප්‍රංශයේ නිෂ්පාදනයක් ලෙස ප්‍රංශ ජාතික අධ්‍යක්ෂකවරයකු වූ Just Jaeckin විසින් Lady Chatterley’s Lover – 1982 යමින් නිර්මාණය කරන ලදි. මෙහි චැට්ලි ආර්යාවගේ චරිතය නිරූපණය කරන ලද්දේ හොලිවුඩ් නිළි Sylvia Kristel විසිනි.
චිත්‍රපටය න්‍යයාත්මකව කියවීම කෙබඳුද ?
එතෙක් මෙතෙක් Lady Chatterley’s Lover නවකතාව පසුබිම කරගෙන නිර්මාණය කරන ලද ඉතා සිනමාත්මකව අගයකින් ( Cinematic Quality ) යුතු චිත්‍රපටය මෙය බව අවිවාදිතයෙන් යුතුව හදුන්වා දෙන්නේ ය. පළමු චිත්‍රපටය වඩා මෙම ප්‍රතිභාපූර්ණ අධ්‍යක්ෂකවරිය ඉතා මැනවින් නවතාව හා එහි චරිතවල හැඟීම් හා මනෝභාවයන් අති-සියුම් ආකාරයෙන් මෙම චිත්‍රපටයට නතුකර ගෙන ඇත්තේ ය. මෙහි පළමු චිත්‍රපටය තුළින් අධ්‍යක්ෂකවරයා හුදෙක්ම නවකතාව කොටුකරගෙන ඇත්තේ ඉතා ප්‍රබල ආකාරයෙන් කායික සම්බන්ධතා සිනමාත්මකව උද්දීපනය කර පෙන්වීම සදහාම බව පෙනේ. එනමුත් මෙම චිත්‍රපටයේ දී අධක්ෂකවරිය ඉතා සියුම් ආකාරයෙන් නවකතාවේ එන චරිත ඉතා මැනවින්.ග්‍රහණය කර ගනිමින් සිනමාත්මකව එම චරිතවල විවිධ මනෝභාවයන් උද්දීපනය කර පෙන්වීමටත් මෙහි ප්‍රධාන චරිතය වන චැට්ලි ආර්යාව හා විවාහක කාන්තාවන් වශයෙන් ඇයගේ මනෝභාවය මැනවින් ප්‍රේක්ෂකයාගේ මනස්කාන්තයේ තැම්පත් කොට එතුළින් චැට්ලි ආර්යාව වූ කලී කාමාස්වාදයෙන් තෘප්තිමත් වීමට පමණක් වෙර දරණ ( ප්‍රභූ ) කාන්තාවක් නොවන බව ප්‍රේක්ෂකාගාරයට කියා පෑමට මහත් වීර්යයක් දරා ඇත්තේ ය. මෙම චිත්‍රපටය නරඹා අවසන් වත්ම කුමන තරාතිරමක ගැහැණිය වුවද සංස්කෘතික යදමින් කුමන ආකාරයෙන් බැඳ තිබුණද ඇය කුමන හෝ මොහොතකදී එම යදම් සිඳ බිඳ දමමින් තම සිතැඟි පරිදි ක්‍රියාත්මක වන බව ඉතා සිනමාත්මකව අවබෝධ කර ගත හැක වන්නේ ය.
මෙහි කැමරාකරණය පිළිබඳව ද යමක් නොකිවහොත් එය විචාරයට කරන බලවත් අසාධාරණයක් බව සිතේ. මෙහි බහුතර රූපරාමුවක්ම ලා -නිල් පැහැය ඉස්මතු වන ආකාරයේ රෑපගත කර ඇත්තේ ය . සැබවින්ම එය චිත්‍රපටයට මහත් ආභරණයකි. එපමණක්ද නොව ඉතා සංයමයකින් යුතුව යොදාගන්නා ලද රූපරාමු හා එම රූප රාමු අවස්ථා සම්බන්ධයෙන් ගොඩනගන ලද රිද්මය අතිශයින්ම කලාත්මක වන්නේ ය. එමගින් පරිසරයේ වූ චමත්කාරය හා රිද්මය ප්‍රේක්ෂක මනසේ විචිත්‍රණය කිරීමට වෙසෙසින්ම ඉවහල් වී ඇත්තේ ය.
මෙම නවකතාව හා චිත්‍රපටය ශ්‍රේෂ්ඨ බෞද්ධ දර්ශනයට අනුව ඉතා සියුම් හා ඉතා ගැඹුරින් විශ්ලේෂණය කළ හැකිය,එනමුත් එසේ කළහොත් මෙම සටහන දිගුවන්නේ ය. එය ඉතා කෙටියෙන් මෙසේ දක්වමි.
“උපාදානය”.එනම් මනසින් ඉතා දැඩිව ග්‍රහණය කර ගැනීමයි. එය සිව්වැදෑරුම් ආකාරයෙන් ක්‍රියාත්මක වන්නේ ය. කාමුපාදානය , දිට්ඨුපාදානය . ශීලබ්බතුඋපාදානය , අන්තවාදුඋපාදානය යනුවෙනි. මේ සිව්වැදෑරුම් කොටසක් තුළින්ම මෙම නවකතාව හා චිත්‍රපටය ඉතා ගැඹුරින් විශ්ලේෂණය කළ හැකිය .
සමස්තයක් වශයෙන් ගත් කල්හි නවතම Lady Chatterley’s Lover චිත්‍රපටිය නවකතාවට ඉතා ඉහළ සාධාරණයක් ඉෂ්ට සිද්ධ කරන ලද ඉහළ කලාත්මක අගයකින් යුතු චිත්‍රපටයකු බව විශේෂයෙන් අවධාරණය කැමැත්තෙමි.
විශේෂ කාරණාව
Platform හා Theater යන නූතන සිනමා ප්‍රදර්ශන ධාරා දෙකෙහිම මෙම Lady Chatterley’s Love චිත්‍රපටය ඉතා සාර්ථක ආකාරයෙන් ප්‍රදර්ශනයවීම තවත් විශේෂත්වයක් වශයෙන් ද පෙන්වා දිය හැකිය.
පූජ්‍ය ඇතිපොළ මංගල හිමි
Lady Chatterley’s Lover by D.H Lawrence– චිත්‍රපටයේ ජාත්‍යන්තර පෝස්ටර්
[ චිත්‍රපටය සදහා පාදක වූ නවකතාව ]
ප්‍රංශ ජාතික සිනමා නිළි හා අධ්‍යක්ෂක Laure de Clermont – Tonnerre