ඉන්ස්ටග්‍රෑම් සහ ෆේස්බුක් පරිශීලකයින්ට blue tick verification ලබා ගැනීම සඳහා යම් මුදලක් ගෙවීමට සිදුවන බව එහි මව් සමාගම වන Meta නිවේදනය කරයි.
මින් පෙර එය නොමිලයේ ලබා දීමට එම සමාගම කටයුතු කළේය.
එම සමාගම නිවේදනය කරන ආකාරයට වෙබ් පරිශීලකයන් වෙනුවෙන් මාසයක් සඳහා ඩොලර් 11.99 (ආසන්න වශයෙන් රුපියල් 4,400ක්) සහ ඇපල් iphone පරිශීලකයන් වෙනුවෙන් මාසයක් සඳහා ඩොලර් 14.99 (ආසන්න වශයෙන් රුපියල් 5,500) මේ සඳහා ගෙවීමට සිදුවනු ඇත.
එය මේ සතියේ සිට ඕස්ට්‍රේලියාවේ සහ නවසීලන්තයේ ක්‍රියාත්මක කිරීමට නියමිතව ඇති අතර මෙය අනෙකුත් රටවලට ලබපාන්නේ කවදා සිටදැයි Meta ආයතනය තවම නිශ්චිතව සඳහන් කර නොමැත.
කෙසේවෙතත් එය ඉතා ඉක්මනින්ම සිදුවනු ඇතැයි මෙටා හි ප්‍රධාන විධායක මාර්ක් සකර්බර්ග් ප්‍රකාශ කර ඇත.
ඔහු පවසන්නේ මෙය සමාජ මාධ්‍ය ගිණුම් වල ආරක්ෂාව වැඩි දියුණු කිරීමට මෙන්ම සහ ව්‍යාජ සමාජ මාධ්‍ය ගිණුම් අවම කිරීමට ගත් පියවරක් බවයි.
මෙම blue tick ලබා ගන්නා පරිශීලකයින්ට ඔවුන්ගේ Facebook සහ Instagram සටහන්, ඡායාරූප වඩා වැඩි දෙනෙකුට පෙනෙන ආකාරයට Reach වනු ඇති අතර ගිණුම් වල සුරක්ෂිතතාවය වැඩි ඉඩක් ලැබෙනු ඇ.ත.
මෙම ගෙවීම් මීට පෙර blue tick ලබාගත් ගිණුම්වලට බලනොපාන බවද මාර්ක් පවසා තිබේ.
එමෙන්ම Twitter හි හිමිකරු වන Elon Musk විසින් 2022 නොවැම්බර් මාසයේදී Twitter blue tick verification ලබා දීම සඳහා මෙම පියවර ක්‍රියාත්මක කළේය.
Reddit සහ Discord වැනි සමාජ මාධ්‍ය වෙබ් අඩවි ද මෙවැනිම විවිධ ක්‍රමවේද භාවිතා කර තිබේ.
මේ අතර Twitter සමාගම විසින් Twitter ගිණුම් සුරක්ෂිත කිරීම සම්බන්ධයෙන් විශේෂ නිවේදනයක් නිකුත් කර තිබේ.
එම නිවේදනයට අනුව ගිණුම් ආරක්ෂක ක්‍රමවේදයක් වන, SMS two-factor authentication භාවිතා කළ හැක්කේ මුදල් ගෙවන පරිශීලකයින් හට පමණි.
එළඹෙන මාර්තු 20 න් පසු, මුදල් ගෙවා Twitter blue tick සලකුණ ලබාගත් පරිශීලකයින්ට පමණක් මෙම ආරක්ෂක ක්‍රමවේදය භාවිතා කළ හැක.