සිරියානු දේශසීමාව ආසන්නයේ ගිනිකොනදිග තුර්කියේ අද (සඳුදා 06) උදෑසන ඇති වූ ප්රබල භූමිකම්පාවෙන් මේ වනවිට පුද්ගලයින් 2,000 කට වැඩි පිරිසක් මිය ගොස් දහස් ගණනක් තුවාල ලබා ඇතැයි විදෙස් මාධ්ය සඳහන් කරයි.
එරට වේලාවෙන් අළුයම 04:17 ගැසියන්ටෙප් නගරය ආසන්නයේ ඇති වූ මෙම භූමි කම්පාව රිච්ටර් මාපකයේ අංශක 7.8 ක ප්රබලත්වයෙක් සිදුව තිබිණි.
එක්සත් ජනපද භූ විද්යා සමීක්ෂණ ආයතනය සඳහන් කළේ මෙම භූ කම්පනය කිලෝමීටර් 17.9 (සැතපුම් 11) ගැඹුරකදී ඇති ව ඇති බවයි.
එය කිලෝමීටර් 100ක් (සැතපුම් 62ක්) පමණ දුරකට විසිරී ගොස් ඇත.
භූ කම්පන මාලාවක්!
එමෙන්ම පළමු භූ කම්පනය සිදුවී පැය 12 කට පමණ පසුව තරම්ම විශාල වූ තවත් කම්පනයක් සිදුව ඇති අතර එහි ප්රබලත්වය රිච්ටර් මාපකාංක 7.5 ලෙස සඳහන්ව තිබිණි.
එය කහරමන්මාරස් පළාතේ එල්බිස්තාන් දිස්ත්රික්කයේ කේන්ද්රෙකාට ගෙන සිදුව තිබේ.
විදෙස් මාධ්ය සඳහන් කරන ආකාරයට මෙම භූ කම්පනයෙන් තුර්කියේ ප්රධාන නගර 10 කට බලපෑම් සිදුව තිබූ අතර සිරියාව, සයිප්රසය, ජොර්දානය ,ලෙබනනය ,ජොර්ජියා ඇතුළු රටවල් රැසකට ද ඉන් බලපෑම් එල්ල වී ඇත.
සරණාගතයින් කබලෙන් ලිපට
විපතට පත්වූවන්ගෙන් බොහෝ දෙනෙකු යුද්ධය පවතින කලාපයක් වන උතුරු සිරියාවේ සිටින අතර, මිලියන ගණනක් සරණාගතයින් සිරියානු-තුර්කි දේශසීමා දෙපස කඳවුරු ලා ජීවත් වුණි.
එහි තත්වයන් පිළිබඳ මේ වන විටත් වාර්තා වී නොමැති අතර කැරලිකරුවන්ගේ පාලන ප්රදේශ වල තත්ත්වය මීටත් වඩා දරුණු විය හැකි බවට විදෙස් මාධ්ය වල සඳහන් වේ.
ගොඩනැගිලි දහස් ගණනක් කඩා වැටී ඇති බොහෝ ගොඩනැඟිලි සුන්බුන් බවට පත්ව ඇත. විදෙස් වාර්තා පවසන්නේ භූකම්පයෙන් සිදු වූ මරණ සංඛ්යාව තවදුරටත් ඉහළ යා හැකි බවයි.
භූ කම්පනයත් සමග කඩා වැටුණු ගොඩනැගිලි සුන්බුන් සිරවී සිටින පිරිස් බේරා ගැනීම මුදා ගැනීමේ කණ්ඩායම් යොදවා ඇත.
මේ දරුණු අනතුර හේතුවෙන් වසර 2000කට වැඩි ඉතිහාසයක් සහිත ලෝක ප්රසිද්ධ ගැසියන්ටෙප් මන්දිරය සහ එහි ආරක්ෂිත පවුරට දැඩි හානි සිදුව ඇති බවද වාර්තා වේ. එසේම භූ කම්පනය සිදුවන අවස්ථාවේ එම ප්රදේශයේ සිටි ඝානා ජාතික පාපන්දු කණ්ඩායමේ ප්රබල ක්රීඩකයෙක් වන ක්රිස්ටියන් අට්සු පිළිබඳ තොරතුරක් මේ දක්වා වාර්තා නෙවන බවද මාධ්ය වාර්තා කරයි.
1939 මහා භූ කම්පනය
මින් පෙර 1939 වර්ෂයේදීත් රික්ටර් මාපාංක 7.8 ක භූ කම්පනයක් තුර්කියේදී සිදුවූ අතර එය සැලකෙන්නේ මේ දක්වා තුර්කියේ සිදුවූ දරුණුතම භූ කම්පනය ලෙසින් ය. ඊසාන දිග තුර්කියේ ප්රදේශ කිහිපයකට මෙම භූ කම්පනය නිසා බරපතල හානි සිදුවිය. එකල වාර්තාවූ ආකාරයට එම භූමි කම්පාව හේතුවෙන් තුර්කි වැසියන් 30,000කට වැඩි පිරිසක් මියගිය බව සඳහන් වේ.
මෙයින් නැගෙනහිර තුර්කියේ නගර වන ඉර්සින්කන්, සිවාස්,ටින්සෙලි, බින්ගෝල් වැනි ප්රදේශවලට සිදුවූ හානිය ඉතා ඉහළය.
99 අගෝස්තු භූ කම්පනය
එසේම 1999 වර්ෂයේ අගෝස්තු මාසයේදී බටහිර තුර්කියේ ඉස්මිත් ප්රදේශයේද දරුණු භූමි කම්පා තත්වයක් වාර්තා විය. රිකිටර් මාපකයේ අංශක 7.4ක් ලෙස වාර්තාවූ මෙම භූ කම්පනය හේතුවෙන් තුර්කි වැසියන් 17,000කට වැඩි පිරිසක් ජීවිතක්ෂයට පත්වූහ.