කාන්තා ක්‍රිකට් T20 ලෝක කුසලාන තරගාවලියේ ශ්‍රී ලංකාව මුහුණ දුන් පළමු පුහුණු තරගයෙන් අයර්ලන්ත පිල පරාජයට පත් කරමින් ලකුණු දෙකක ජයක් ලබා ගැනීමට ශ්‍රී ලංකා කාන්තා ක්‍රිකට් කණ්ඩායම සමත්විය.
තරගයේ කාසිය වාසිය දිනූ අයර්ලන්ත පිල ප්‍රථමයෙන් පන්දුවට පහර දීමට ශ්‍රී ලංකා පිලට ආරාධනා කළ අතර ශ්‍රී ලංකා කාන්තා ක්‍රිකට් කණ්ඩායම කඩුලු 05ක් දැවී ලකුණු 149ක් රැස් කළේය.
එහිදී හසිතා සමරවික්‍රම ලකුණු 56 රැස් කල අතර ආබාධයකට ලක්ව ඇයට පිටියෙන් ඉවත් වීමට සිදුවිය.
විශ්මි ගුණරත්න පන්දු 34 කට මුහුණ දෙමින් ලකුණු 36ක් රැස් කළ අතර නායිකා චමරි අතපත්තු ලකුණු 27ක් රැස් කළාය.
පිළිතුරු ඉනිම ක්‍රීඩා කරමින් අයර්ලන්ත පිලෙහි ගැබී ලෙවිස් ලකුණු 38 ක් රැස් කළේ පන්දු 24 කට මුහුණ දෙමිනි.
එමෙන්ම ආර්ලේන් කෙලී ලකුණු 30 ක් රැස් කළ අතර නායිකා ලෝරා ඩෙලනිට ලබා ගත හැකි වූ පන්දු 23 කදී ලකුණු 21පමණි.
ඇයට දුවන විට දැවී යාමකට ලක්ව පිටියෙන් ඉවත් වීමට සිදුවිය.
ඒ අනුව අයර්ලන්ත ක්‍රීඩිකාවන්ට ලබා ගත හැකි වූයේ පන්දු 19.5 කදී සියල්ලන් දැවී ලකුණු 147 ක් පමණි.
ශ්‍රී ලංකා පිල වෙනුවෙන් පන්දු යැවීමේදී ඔෂාධි රණසිංහ, ඉනෝකා රණවීර කඩුලු 03 බැගින් දවා ගත් අතර සුගන්දිකා කුමාරි සහ කවීෂා දිල්හානි අතර කඩුලු 1 බැගිනි බෙදී ගියේය.
ශ්‍රී ලංකාව මුහුණ දෙන දෙවැනි පුහුණු තරගය බටහිර ඉන්දීය කොදෙව් පිල සමග එළඹෙන 08 වැනිදා කේප් ටවුන් හිදී පැවැත්වීමට නියමිතය.