ලලිත්-කුගන් අපරාධයේ චූදිතයන් ශ්‍රේෂ්ඨාධිකරණයත් මගහරී : අපේ කාලෙ කවුරුත් අතුරුදන් වුණේ නෑ – ගෝඨාභය රාජපක්ෂ

ප්‍ර : ආණ්ඩුව විවේචනය කරපු පිරිස් අතුරුදන් වෙන්න, පැහැරගන්න පටන්ගත්තෙ ඇයි… ?

පි : ඒව බොරු කතා. දේශපාලන වාසි ගන්න කියපුව. මේ කාලෙ ඇතුළත එහෙම කිසිකෙනෙක් අතුරුදන් වුණේ නෑනෙ.

ප්‍ර : එක්කෙනෙක්වත් අතුරුදන් වුණේ නෑ එතකොට… ?

පි : නෑ.

ප්‍ර : හිටපු ආරක්ෂක අමාත්‍යංශ ලේකම්වරයා එහෙම අතුරුදන්වීම් ගැන හාන්කවිසියක්වත් දන්නෙ නෑ… ?

පි : නෑ. කවුද එහෙම අතුරුදන් වුණේ.

ප්‍ර : දේශපාලන ක්‍රියාකාරීන් වෙච්ච ලලිත්-කුගන් දෙන්නා… ?

පි : ඔය ලලිත්-කුගන් කියන දෙන්නා මම දන්නෙවත් නෑ, පැහැරගත්තා කියල දේශපාලනඥයො කතා කරනකම්.

ප්‍ර : දන්නෙවත් නෑ කියන්නෙ, ඔබ දනුවත්වත් මිනිස්සු පැහැරගත්තද… ?

පි : එහෙම එකක් නෙමෙයි මම කියන්නෙ. අපිට විවෘතව කරන්න පුළුවන් දේවල් තියෙනවනෙ.

ප්‍ර : එතකොට ඔය ලලිත්-කුගන්ලා පැහැරගෙන ගිහින් කියලා ඔබට දැනුම්දීමක්වත් කළේ නෑ… ?

පි : ඔය ලලිත්-කුගන් කියන දෙන්නා අල්ලගත්තෙ ඇයි. ඊට වඩා කොච්චර තර්ජන තිබුණු කට්ටිය හිටියද. ඔය නම් කියපු අය ගැන මම දන්නෙවත් නෑ.

ප්‍ර : අඩුතරමෙ පත්තරවලින්වත් දැක්කෙ නැද්ද, මම ඔබෙන් ඇහුවෙත් එහෙම ප්‍රසිද්ධියට පත්වුණු සිද්ධි කීපයක් ගැන… ?

පි : ඔය සිද්ධි දේශපාලන හේතු මත උඩට ආපු ඒවා. මොන හේතුවක් හින්දා වුණාද කියන්න දන්නෙත් නෑ. හමුදාවට හෝ බුද්ධි අංශවලට එහෙම දෙයක් කරන්න තරම් ඔය මිනිහා තර්ජනයක්ද.

ප්‍ර : ඒකයි මෙතැන තියෙන ප්‍රශ්නෙ. ඔවුන්ට තර්ජනයක් නොවුණට මහින්ද රාජපක්ෂ ආණ්ඩුවට තර්ජනයක් වුණා… ?

පි : නෑ. ඔය දේශපාලන වාසි තකා කරන ප්‍රකාශනෙ.

ප්‍ර : දේශපාලන වාසි තකා හරි පුද්ගල පැහැරගැනීමක් ගැන කියන එක භයානක කාරණයක්. ඒත් ඔබ ඒක ගැන දන්නෙ නෑ… ?

පි : මම දන්නවා. ඔය හැමතැනම බිත්තිවල ලියල තිබුණේ.

ප්‍ර : එහෙනම් මුලදි දන්නෙ නෑ කිව්වෙ… ?

පි : මම ඒ කිව්වෙ බුද්ධි අංශවල දැනුවත්කම ඇතුව අතුරුදන් වුණේ නෑ කියලයි. ඔබ ඇහුවෙත් ඒ පැත්තෙන්නෙ.

ප්‍ර : ඔව්. මොකද උතුරේ මෙච්චර හමුදාවක් ඉඳලත් ඔවුන් නොදැන ඔය දේවල් වෙන්න පුළුවන් ද… ?

පි : යම් යම් අය අතුරුදන් වුණා. මරණයට පත්වුණා විවිධ අයගේ අවශ්‍යතා මත. නමුත් අන්තිමට ඒක දාන්නෙ අපේ අකවුන්ට් එකට. එහෙම කෙනෙක් හිටියා කියලා සමහර විට බුද්ධි අංශ දැනගන්නෙත් ඔය සිද්ධි වුණාට පස්සෙ.

ප්‍ර : ඉතින් ඔය චෝදනාවලට අපි නිවැරදිකරුවො, අපි හොඳ ළමයි කියලා ආරක්ෂක අංශවලට ඔප්පු කරලා පෙන්වන්න තිබුණනෙ… ?

පි : බුද්ධි අංශ වගේ ඒවට ඒ නිවැරදි බව කියන්න ක්‍රමවේද නෑනෙ. ඔවුන්ට මාධ්‍ය සාකච්ඡා තියන්න බෑ. දේශපාලනඥයකුට චෝදනා කළොත් ඔවුන්ට මාධ්‍ය සාකච්ඡාවක් තියලා කියන්න පුළුවන්, මම මේකට සම්බන්ධ නෑ කියලා. පොලිසියේ, හමුදාවෙ කෙනෙක් මේව ගැන කතාකරන්න ගියොත් ඒ මිනිහට විරුද්ධව විනය පියවර ගන්නවා.

ප්‍ර : ඇයි එහෙනම් හරියට පරීක්ෂණ කරන්න බැරි වුණේ ඔය සිද්ධි ගැන. ඇයි ඒ ෆයිල් යටගැහුවෙ… ?

පි : එහෙම ඔබ කියන විදිහට ෆයිල් යටගහලා නෑ. මම කියන්නෙ මේවට බුද්ධි අංශ සම්බන්ධ නෑ කියලයි. අතුරුදන් කරනවා නම් අතුරුදන් කරන්න මීට වඩා හුඟක් අය හිටියනෙ.

(හිටපු ජනාධිපති සහ ආරක්ෂක අමාත්‍යංශයේ හිටපු ලේකම් ගෝඨාභය රාජපක්ෂ ‘ලලිත්-කුගන් අතුරුදන් වීම’ සම්බන්ධයෙන් ලියුම්කරු සමග මෙසේ අදහස් පළකළේ 2015 මාර්තු 22 දින මව්බිම පුවත්පත වෙනුවෙන් කරන ලද දීර්ඝ සම්මුඛ සාකච්ඡාවකදී ය.

අපරාධ චූදිතයෙක්

ලලිත් කුමාර් වීරරාජ් සහ කුගන් මුරුගානන්දන් පැහැරගෙන ගොස් අතුරුදන් කිරීමේ නඩුවේ සාක්ෂි ලබාදීමෙන් හිටපු ජනාධිපති ගෝඨාභය රාජපක්ෂ ගැලවී සිටියේ මුක්තිය ඉදිරියට දමමිනි.

ආණ්ඩුක්‍රම ව්‍යවස්ථාවේ 35 වගන්තිය යටතේ ජනාධිපතිවරයකුට ධුරය දරන කාල සීමාවේදී මුක්තියක් හිමි වේ.

එනම් ඔහුව හෝ ඇයව හෝ අධිකරණය ඉදිරියට කැඳවිය නොහැකිය. ජ්‍යෙෂ්ඨ නීතිඥයන් අවධාරණය කරන්නේ දැන් ගෝඨාභය රාජපක්ෂට එරෙහි සියලු නඩු පවත්වාගෙන යා හැකි බවයි. නීතියේ ආධිපත්‍යය සුරක්ෂිත කිරීමේ මූලික ම කරුණක් වන සියලු පුරවැසියන්ට නීතිය සමාන බව තහවුරු කිරීමට එය අත්‍යවශ්‍ය බව ද ඔවුහු පෙන්වා දෙති.

ආණ්ඩුක්‍රම ව්‍යවස්ථාව රටේ මූලික නීතිය වේ. එහෙත් ඒ ව්‍යවස්ථාවේ මෙවැනි තැන් යොදාගැනෙන්නේ අපරාධ චූදිතයන්ගේ ගැලවිල්ලට ය.

ලලිත්-කුගන් නඩුව ඔහුට එරෙහි එක් චෝදනාවකට අදාළ නඩුවක් පමණි. තව කොපමණක් ද?

අධිකරණය මගහැරීම

ලලිත්-කුගන් අතුරුදන්කිරීමට අදාළ ව යාපනය මහේස්ත්‍රාත් අධිකරණයේ විභාග වන නඩුව මගහැරීම සම්බන්ධයෙන් ශ්‍රේෂ්ඨාධිකරණයේ විභාග වන නඩුවට ගෝඨාභය රාජපක්ෂව පසුගිය ඔක්තෝබර් 19දා කැඳවා තිබිණි. එහෙත් ඔහු අධිකරණයට ආවේ නැත. දැන් යළිත් ඔහුව කැඳවා තිබේ.

මේ ආකාරයට මෙම නඩුවේදී ගෝඨාභය රාජපක්ෂ අධිකරණය මගහැරිය අවස්ථා රැසකි.

01. 2019 මැයි 03 – පෞද්ගලික ප්‍රශ්නයක් බව අධිකරණයට දැනුම් දෙන ලදි.

02. 2019 ජුනි 21 – අසනීප බව අධිකරණයට දැනුම් දෙන ලදි.

03. 2019 සැප්තැම්බර් 24 – ආරක්ෂාව ප්‍රමාණවත් නොවන බව අධිකරණයට දැනුම් දෙන ලදි.

04. 2019 දෙසැම්බර් 03 – ජනාධිපතිවරයාට ව්‍යවස්ථාවෙන් හිමි මුක්තිය නිසා ඒමට නොහැකි බව අධිකරණයට දැනුම් දෙන ලදි.

05. 2022 අගෝස්තු 02 – ගෝඨාභය රාජපක්ෂට නොතීසි බාරදීමට හැකියාවක් නොලැබුණු බව අධිකරණයට දැනුම් දෙන ලදි.

06. 2022 ඔක්තෝබර් 19 – අධිකරණයට නොපැමිණීමට නිශ්චිත හේතුවක් දැනුම් දුන්නේ නැත.

‘දැන් මං ජනාධිපති’

ලලිත්-කුගන් පැහැරගෙන ගොස් අතුරුදන් කිරීමේ නඩුවට අදාළ ව සාක්ෂි ලබාදෙන්නැයි යාපනය මහේස්ත්‍රාත් අධිකරණයෙන් ගෝඨාභය රාජපක්ෂට සිතාසි නිකුත් කෙරිණි. තමන්ගේ ආරක්ෂාව පිළිබඳ ගැටළු ඇති නිසා යාපනයට යා නොහැකි බව කියමින් ගෝඨාභය රාජපක්ෂ අභියාචනාධිකරණයට ගියේය.

2019 නොවැම්බර් 16 පැවති ජනාධිපතිවරණය අවසන් වන තෙක් අභියාචනාධිකරණයෙන් තීන්දුවක් ලැබුණේ නැත. ඉන්පසු ආරක්ෂක ගැටළු කතාව පසෙකට කෙරිණි. ගෝඨාභය රාජපක්ෂගේ නීතිඥයන් අධිකරණයට කිව්වේ ‘දැන් තමන්ගේ සේවාදායකයා ජනාධිපති නිසා ඔහුට මුක්තිය ඇති බවයි.’ අභියාචනාධිකරණය එය පිළිගත්තේය.

සාක්ෂිකරුවෙක් ලෙස

ඉන්පසු වින්දිත පාර්ශ්වය ඒ තීන්දුව සම්බන්ධයෙන් ශ්‍රේෂ්ඨාධිකරණයට අභියාචනයක් ඉදිරිපත් කළේය. එම අභියාචනය මගින් ඔවුන් පෙන්වා දුන්නේ තමන් ගෝඨාභය රාජපක්ෂ අධිකරණයට කැඳවීමට උත්සාහ කරන්නේ සැකකරුවකු ලෙස නොව, සාක්ෂිකරුවකු ලෙස වන බවයි.

ජ්‍යෙෂ්ඨ නීතිඥයන් ඒ සම්බන්ධයෙන් පවසන්නේ ජනාධිපති ධුරය දරන්නාට ඇති මුක්තිය සාක්ෂි ලබාදීම සම්බන්ධයෙන් බලපාන්නේ කෙසේද යන්න පිළිබඳ ව්‍යවස්ථාවේ පැහැදිලිව සඳහන් නොවන බවයි.

ඔහුට අපරාධ නඩු සම්බන්ධයෙන් මුක්තියක් තිබේ. යම් අවස්ථාවකදී ජනාධිපතිවරයාට සාක්ෂි ලබාදෙන ලෙස මහේස්ත්‍රාත් අධිකරණයකින් සිතාසි යවනු ලැබුවහොත්, ඔහු එය පිළිගන්නේ ද, නැද්ද යන්න සම්බන්ධයෙන් ගැටළුවක් මතු වේ. යම් අපරාධයක් සම්බන්ධයෙන් ජනාධිපතිවරයාගේ සාක්ෂිය අත්‍යවශ්‍ය වන අවස්ථාවකදී, ඔහු කැමැත්තෙන් සාක්ෂි ලබාදෙන්නේ නම්, ඊට බාධාවක් තිබිය නොහැකිය.

යටි අරමුණ කුමක්ද?

අනෙක් අතට අධිකරණයට කැඳවීමක් කොට, ඒ අනුව කටයුතු නොකිරීම යනු දඬුවම් ලැබිය හැකි ක්‍රියාවකි. එම නිසා එය අපරාධ ක්‍රියාවකට සම්බන්ධ වන නිසා, ඊට අදාළව ද මුක්තිය හිමි වන බවට තර්කයක් ගොනු කළ හැකිය. තවත් පැත්තක් තිබේ. ඇතැම් නීතිඥයන් පෙන්වාදෙන්නේ කැමැත්තෙන් වුවද, ව්‍යවස්ථාවෙන් පැවරූ අයිතියක් අත්හළ නොහැකි බවයි.

මේ ආකාරයට නීති තර්ක හරහා වෙනත් මානයන්ට යොමු විය හැකිය. එහෙත් හෘද සාක්ෂියට අනුව, ඔබ යම් අපරාධයක අත්‍යවශ්‍ය සාක්ෂිකරුවකු වූ විට, එය මගහැරීමට වෙනත් උපක්‍රම භාවිත කරන්නේ නම්, ඔබේ යටි අරමුණ විය හැක්කේ කුමක්ද? කොහොමත් දැන් ඒ මුක්තිය ඔහුට අදාළ නොවේ.

2011 – 2022

2011 දෙසැම්බර් 09දා ලලිත් කුමාර් වීරරාජ් සහ කුගන් මුරුගානන්දන් අතුරුදන් කෙරිණි. ඒ අදින් අවුරුදු 11කට පෙර ය.

ලලිත් හා කුගන් පැහැරගැනීම සිදු වී ඇත්තේ දෙසැම්බර් 09දා පස්වරු 5.30 පසු වී කෙටි කාලයක් තුළ බවට සාක්ෂි ඇත. යාපනය, අවරන්ගල්හි කුගන්ගේ නිවසේ සිට ඔවුන් දෙදෙනා යාපනය බලා පිටත්ව ගොස් ඇත්තේ පස්වරු පහට පමණය. පසු දින, එනම් දෙසැම්බර් 10දා ලෝක මානව හිමිකම් දිනය වෙනුවෙන් පැවැත්වීමට නියමිතව තිබූ මාධ්‍ය සාකච්ඡාවක සංවිධාන කටයුතු ඔවුහු සිදු කරමින් සිටියහ.

කුගන්ගේ අසල්වැසියන් පවසන ආකාරයට ඔවුන් පස්වරු පහට පමණ නිවසින් පිටත්ව ගොස් තිබේ. එයින් පසු මේ දෙදෙනාගෙන් කිසිදු තොරතුරක් ලැබී නැත. කෙසේ වෙතත් ඔවුන් ගමන් ගත්, කුගන්ගේ යතුරු පැදිය දෙසැම්බර් 14 වැනිදා අච්චුවේලි පොලිසියේ තිබෙනු දැක ඇත්තේ කුගන්ගේ බිරිඳ විසිනි. මෙම යතුරු පැදිය හමු වූ ආකාරය ගැන පොලිසිය හා ගම්වැසියන් පවසන කරුණු අතර පරස්පරතා රැසක් තිබේ. ඒ පරස්පරතා ලිහන පාර වැසීම ඉතා වේගවත්ව සිදු කෙරිණි.

කුගන්ගේ බිරිඳ අච්චුවේලි පොලිසියෙන් මේ පිළිබඳව විමසා තිබිණි. පොලිසිය ඇයට පවසා ඇත්තේ දෙසැම්බර් 13 වැනිදා කෝපායි පොලිසිය විසින් කෝපායි කෝවිල අසල තිබී මෙම යතුරු පැදිය තමන් බාරයට ගෙන තිබුණු බවයි.

මෙම යතුරු පැදිය සම්බන්ධයෙන් නිර්වේලි ප්‍රදේශවාසීන් විසින් ෂන්මුගන් වඩිවේල් නම් එවකට එම ප්‍රදේශයේ රාජකාරි කළ ග්‍රාම නිලධාරිවරයාට දැනුම් දී ඇත්තේ 09දා ය. යාපනය – පේදුරුතුඩුව මාර්ගයේ නිර්වේලි ප්‍රදේශයේදී ලලිත් – කුගන් දෙදෙනා ගමන් කළ යතුරු පැදිය වෑන් රථයකින් සහ යතුරු පැදි දෙකකින් පැමිණි පිරිසක් නතර කළ බවට සාක්ෂි ඉදිරිපත් වී ඇත. එහෙත් ඒවා ඉදිරියට යන්නේ නැත. ඊට හේතුව අතුරුදන් කළ පාර්ශ්වය සම්බන්ධයෙන් ඇසින් දුටු සාක්ෂිකරුවන් හොඳින් දැන සිටීම විය හැකිය.

අත්අඩංගුවට ගැනීමක්?

එවකට පැවති ආණ්ඩුවේ කැබිනට් ප්‍රකාශකවරයා වූයේ කෙහෙළිය රඹුක්වැල්ල ය. වර්තමාන සෞඛ්‍ය ඇමැතිවරයා ය. ලලිත්-කුගන් අතුරුදන් කළ දෙසැම්බර් මාසයේ ම, 15 වැනිදා පැවැති ප්‍රවෘත්ති සාකච්ඡාවකදී ඔහු කියා තිබුණේ ලලිත්-කුගන් අතුරුදන් වී නැති බවත්, ඉක්මනින්ම ඔහු පොලිසිය හෝ හමුදාව මගින් අධිකරණයට ඉදිරිපත් කරනු ඇති බවත් ය. ඒ කියන්නේ අත්අඩංගුවට ගැනීමක් ගැන කතාවකි. ඒ ප්‍රකාශය කළේ එවකට ආණ්ඩුවේ නිල ප්‍රකාශක ලෙස කටයුතු කළ ඇමැතිවරයා ය.

පොලිසිය මගින් අත්අඩංගුවට ගන්නා සෑම සැකකරුවකුගේම සම්පූර්ණ වගකීම අදාළ පොලිස් ස්ථානයේ ස්ථානාධිපතිවරයා දැරිය යුතුය. පොලිස් ස්ථානය භාරව කටයුතු කරන පොලිස් ස්ථානාධිපතිවරයා පොලිසියේ සියලුම කාර්යයන් සඳහා පෞද්ගලිකව වගකිව යුතු බව උක්වත්ත එ. මාරසිංහ සහ තවත් අය නම් තීන්දුවේ සඳහන් ය. අත්අඩංගුවේ සිටියදී සිදු වන ඇඟේ සීරීමකට පවා ස්ථානාධිපතිවරයා පිළිතුරු බැඳිය යුතුය.

එහෙත් පසුගිය කාලයේ එසේ අත්අඩංගුවට ගත් සියයකට ආසන්න පිරිසක් ආයුධ පෙන්වන්නට ගොස්, පළායෑමට උත්සාහ දැරීමේදී වෙඩි තැබූ බව පවසමින් ඝාතනය කෙරිණි. එකම කතාන්දරය පොලිසිය අධිකරණයට කිව්වේය. එය අසා සිටි එක් විනිසුරුවරයකු හෝ අදාළ පොලිස් ස්ථානාධිපතිවරුන් කැඳවා ඒ ගැන විමසුවේ ද?

කෙහෙළිය රඹුක්වැල්ලගේ මල්ලෙන් එළියට පැන්න බළලාට අනුව නම් ලලිත්-කුගන් අත්අඩංගුවේ ය. එහෙත් එවැන්නක් මෙතෙක් තහවුරු වූයේ නැත. ඔවුන් සම්බන්ධයෙන් වගකිව යුතු පොලිස් නිලධාරීන් ඉදිරිපත් කෙරුණේ ද නැත. හමුදා අත්අඩංගුවේ දිගටම තබාගත නොහැක. පොලිසියට බාරදිය යුතුය. එවැන්නක් සිදු වූයේද නැත.

මේ සම්බන්ධයෙන් දෙවරක් කැඳවීමෙන් පසු, 2016 මැයි මාසයේදී අධිකරණයට පැමිණි කෙහෙළිය රඹුක්වැල්ල පවසා තිබුණේ එවකට පැවැති ආරක්ෂක කවුන්සිලයෙන් ලැබුණු තොරතුරු මත මෙම ප්‍රකාශය කළ බවයි. එසේ නම් ඒ ආරක්ෂක කවුන්සිලය නියෝජනය කළ සියල්ලන් ඒ ගැන යම් තොරතුරක් දැන සිටිය යුතුය. සේනාධිනායක ලෙස ජනාධිපති, හමුදා ප්‍රධානීන්, පොලිස්පති, බුද්ධි අංශ ප්‍රධානියා සහ එවකට ආරක්ෂක අමාත්‍යංශයේ ලේකම්වරයා වූ ගෝඨාභය රාජපක්ෂ ඒ කවුන්සිලය ඒ වකවානුවේ නියෝජනය කළහ.

මගහැරීමේ උපක්‍රම

2019 සැප්තැම්බර් 27දා ලලිත්-කුගන් අතුරුදන් කිරීමේ සිද්ධියට අදාළ ව යාපනය මහේස්ත්‍රාත් අධිකරණයේ විභාග වන නඩුවට ගෝඨාභය රාජපක්ෂ පෙනීසිටිය යුතු විය. ඒ 2019 ජුනි 21දා කළ නියෝගයක් ප්‍රකාරව ය. නඩුවේ සාක්ෂි ලබාදීම සඳහා ජුනි 21දා පෙනීසිටින ලෙස ගෝඨාභය රාජපක්ෂට මුලදී දැනුම් දී තිබිණි. එහෙත් ඔහුගේ නීතිඥයන් එදින අධිකරණයට දැනුම් දුන්නේ තමන්ගේ සේවාදායකයා විදේශගතව ප්‍රතිකාර ලබන නිසා අධිකරණයට ඉදිරිපත් වීමේ හැකියාවක් නැති බවටයි. ඒ අනුව සැප්තැම්බර් 21 දිනය ලැබිණි.

21දා ද ගෝඨාභය අධිකරණයට ගියේ නැත. මාධ්‍ය මගින් ඊට පෙර, අනාවරණය කළේ ආරක්ෂක හේතු දක්වා නඩුවෙන් මගහැර යෑමට ඔහු උත්සාහ කරන බවයි. උතුරු-නැගෙනහිර හැර, අනෙක් ඕනෑම පළාතක පිහිටි අධිකරණයකදී තමන්ට මේ නඩුවේ සාක්ෂි ලබාදීමට අවස්ථාව ඉල්ලමින් ගෝඨාභය අභියාචනාධිකරණයට ගියේය.

එහෙත් ජනාධිපතිවරණ ප්‍රචාරක කටයුතු සඳහා ඒ කාලයේදී ම ගෝඨාභය රාජපක්ෂ යාපනයට ගියේය. එයින් අධිකරණයට අපහාසයක් සිදු කළ බවට ද තර්ක කිරීමට හැකියාව තිබිණි.

ආරක්ෂක හේතු මත නඩුවක සාක්ෂි දෙන්නට යන්නට බෑ කී ඔහු, පෞද්ගලික වාසිය තකා එසේ ගියේ කෙසේද? ඉන්පසු ඔහු මුක්තිය අස්සේ සැඟවිණි.

අපරාධ චූදිතයෙකුට නීතිය ඉදිරියේ විශේෂ සැලකීමක් අනුමත කළ හැකිද ?

ශ්‍රේෂ්ඨාධිකරණයට !

අභියාචනාධිකරණය විසින් ගෝඨාභයට අදාළ ව ලබාදුන් තීන්දුව සම්බන්ධයෙන් ශ්‍රේෂ්ඨාධිකරණය ඉදිරියේ වින්දිත පාර්ශ්වයෙන් අභියාචනයක් ගොනුකෙරිණි. එය ඉදිරියට පවත්වාගෙන යෑමට ශ්‍රේෂ්ඨාධිකරණය තීන්දු කර තිබේ.

දැන් ගෝඨාභය රාජපක්ෂ මගහරිමින් සිටින්නේ රටේ ඉහළ ම අධිකරණයයි.

ශාලික විමලසේන