ශ්‍රී ලංකා පාපන්දු සම්මේලනයේ පරිපාලනය හා මූල්‍ය ගැටළු පිළිබඳව සොයා බැලීමට, අති විශේෂ ගැසට් නිවේදනයක් මගින්, හිටපු මහාධිකරණ විනිසුරු කුසලා සරෝජනී වීරවර්ධනගේ ප්‍රධානත්වයෙන් පත්කරන ලද පංච පුද්ගල කමිටුවේ වාර්තාව අද (04 වැනිදා) ක්‍රීඩා අමාත්‍යවරයාට බාර දීමට නියමිතව තිබේ.
ශ්‍රී ලංකා පාපන්දු සම්මේලනයේ ව්යවස්ථාව සැකසීම 2012 වසරේ සිටම ප්‍රමාද කිරීම, මුදල් පරිපාලනය, නාමිකව ඇති ක්‍රීඩා සමාජ, සේවක බඳවාගැනීම් ආදිය පිළිබදව විමර්ශනය කිරීම අදාල කමිටුව මගින් සිදුකෙරිණි.
මෙම වාර්තාව අද පස්වරු 5.00 ට ක්‍රීඩා අමාත්‍යාංශයේ ඩන්කන්වයිට් ශ්‍රවණාගාරයේදී ක්‍රීඩා ඇමති රොෂාන් රණසිංහ වෙත බාරදීමට නියමිතය.
ජාත්‍යන්තර පාපන්දු සම්මේලනය විසින් (FIFA) විසින් ශ්‍රී ලංකා පාපන්දු සම්මේලනයේ සාමාජිකත්වය මේවනවිට තාවකාලිකව අත්හිටුවා තිබේ.
ඒ පාපන්දු සම්මේලනයේ සභාපතිවරයා තේරීම සඳහා පැවති නිලවරණයේදී දේශපාලනික අතපෙවීම් මත ඇතිවූ අනවශ්‍ය මැදිහත්වීම් සම්බන්ධයෙන් මතුවූ ගැටළුකාරී තත්වය හේතුවෙන් ය.
අදාල තහනමට අනුව ශ්‍රී ලංකාව නියෝජනය කරන කිසිදු ක්‍රීඩකයෙකුට, පුහුණුකරුවෙකුට හෝ නිලධාරියෙකුට මෙන්ම ශ්‍රී ලංකා ජාතික කණ්ඩායමට වෙනත් කිසිදු තරගාවලියකට හෝ ජාත්‍යන්තර තරග වලට සහභාගී වීමට නොහැකිවනු ඇත.
එමෙන්ම ක්‍රීඩා අමාත්‍යංශය විසින් පොරොන්දු වූ පරිදි ශ්‍රී ලංකා පාපන්දු සම්මේලන ව්යවස්ථාව සංශෝධනය නොකිරීම සහ ජාත්‍යන්තර පාපන්දු සම්මේලනය සමග මීට පෙර එකඟ වූ අයුරින් ක්‍රියා නොකිරීම යන කරුණු මත එම තහනම පැනවීමට අදාල ජාත්‍යන්තර නිළධාරීන් කටයුතු කළේය.
සබැඳි පුවත්
- පාපන්දු සම්මේලනයෙන් කෝටි 15ක පොල්ලක් : අපිව දැනුවත් කළොත් උපදෙස් දෙන්නම් – ක්‍රීඩා අමාත්‍යංශ ලේකම්
- පාපන්දු විධායක සභාවේ ප්‍රධාන ලේකම් ඉල්ලා අස්වෙයි
- පාපන්දු නිලවරණය : පෙත්සම් විභාගය මාර්තු 08
- FIFA ලංකාවේ පාපන්දු සාමාජිකත්වය අහිමිකරයි – ජාත්‍යන්තර තරගත් තහනම්!
- නව පාපන්දු සභාපතිට අතුරු තහනම් නියෝගයක් : මම මැච් එක ගැහුවා – ශ්‍රී රංගා