රෝයල් පාක් ඝාතනය සම්බන්ධයෙන් මරණ දඬුවම නියමවී සිටි ජූඩ් ශ්‍රමන්ත ජයමහට ජනාධිපති සමාව ලබාදී නිදහස් කිරීමට අදාළ ලේඛන අධිකරණයට ඉදිරිපත් කරන ලෙස ශ්‍රේෂ්ඨාධිකරණය නීතිපතිවරයාට නියෝග කර තිබේ.
හිටපු ජනාධිපති මෛත්‍රිපාල සිරිසේන විසින් තමන්ට ව්‍යවස්ථාවෙන් පැවරී තිබූ බලතල යොදාගනිමින් මෙම ජනාධිපති සමාව ප්‍රදානය කරන ලදි. අදාළ විත්තිකරුට ප්‍රදානය කරන ලද ජනාධිපති සමාව බලරහිත කරන ලෙස ඉල්ලා කාන්තා මාධ්‍ය සංවිධාන එකමුතුව විසින් ගොනුකරන ලද මූලික අයිතිවාසිකම් පෙත්සමක් පෙරේදා (30) විභාගයට ගත් අවස්ථාවේ ශ්‍රේෂ්ඨාධිකරණය මගින් මෙම නියෝගය නිකුත් කෙරිණි.
එස්. තුරෙයිරාජා, යසන්ත කෝදාගොඩ සහ ජනක් ද සිල්වා යන ශ්‍රේෂ්ඨාධිකරණ විනිසුරු මඩුල්ල ඉදිරියේ මෙම පෙත්සම් විභාගය පවත්වා ඇත.
අතුරලියේ රතන භික්ෂුවගේ ඉල්ලීමට !
අතුරලියේ රතන හිමියන්ගේ ඉල්ලීම, සම්බන්ධීකරණය සහ මැදිහත් වීම මත රෝයල් පාක් ඝාතන නඩුවේ ඝාතක ජූඩ් ශ්‍රමන්ත ජයමහට ජනාධිපති සමාව ලබාදුන් බව මාධ්‍ය මගින් වාර්තා කෙරිණි. ජනාධිපති මාධ්‍ය අංශය මගින් මේ බව සඳහන් කරමින් නිවේදනයක් ද නිකුත් කළේය.
ජනාධිපතිවරයා ගත් මේ තීන්දුව අසාධාරණ බවත්, තමන්ට ද සමාව ලැබිය යුතු බවත් වැලිකඩ, බූස්ස, අඟුණකොළපැලැස්ස යන බන්ධනාගාරවල රැඳවියන් විසින් එහිදී අවධාරණය කරන ලදි. ඔවුන් තම විරෝධය පළ කළේ බන්ධනාගාර වහල මතට නැගීමෙන් සහ ආහාර වර්ජනය කිරීමෙන් ය. මරණ දඬුවම නියම වී සිටින වැලිකඩ සිරකරුවෝ ද ආහාර වර්ජනයක නිරත වෙමින් ජනාධිපතිවරයාගේ මේ අත්තනෝමතික තීරණයට විරෝධය පළකළහ. වසර 04කට වරක් සිදුකරන දඬුවම් සම්බන්ධ සමාලෝචනය පවා විධිමත්ව සිදු නොවන තත්ත්වයක් තුළ මෙය බරපතළ අසාධාරණයක් බව ඔවුහු ඒ මොහොතේ පෙන්වා දුන්හ.
හතර අතේ විකිණෙයි !
ජනාධිපති සමාව යනු මේ රටේ වැඩියෙන්ම අවභාවිත වන බලයකි. ජේ.ආර්. ජයවර්ධන ජනාධිපතිවරයා ළමා අපචාරයකට වැරදිකරු වූ ගෝනවල සුනිල්ට ජනාධිපති සමාව දුන්නේය. එයිනුත් නොනැවතී මුළු දිවයිනටම සාම විනිසුරු කළේය. එතැන් පටන් රණසිංහ ප්‍රේමදාස, චන්ද්‍රිකා බණ්ඩාරනායක, මහින්ද රාජපක්ෂ, මෛත්‍රිපාල සිරිසේන සහ ගෝඨාභය රාජපක්ෂ දිගටම ජනාධිපති සමාව භාවිත කළේ සුවිශේෂී කරගත් පුද්ගලයන්ට ජනාධිපති සමාව ලබාදීමට ය. මිනීමැරුම් චෝදනාවකට වරදකරු වූ සබරගමුව දේවාලයේ බස්නායක නිලමේ ඇතුළු පිරිසකට මහින්ද රාජපක්ෂ විසින් ජනාධිපති සමාව ලබාදීමත්, භාරත ලක්ෂ්මන් ප්‍රේමචන්ද්‍ර ඝාතනයට වරදකරු වූ දුමින්ද සිල්වාට සහ මිරුසුවිල් සමූහ ඝාතනයට වරදකරු වූ සුනිල් රත්නායකට ගෝඨාභය රාජපක්ෂ විසින් ජනාධිපති සමාව ලබාදීමත් පසුගිය කාලයේ කතාබහට ලක්වූ එවැනි අවස්ථා කිහිපයකි.
මෛත්‍රිපාල සිරිසේන විසින් ජූඩ් ශ්‍රමන්තට අමතරව අධිකරණයට අපහාස කළ චෝදනාවට වරදකරු වූ ගලගොඩඅත්තේ ඥානසාර භික්ෂුවට සහ අල්ලස් චෝදනාවකට වරදකරු වූ වරකාපොල ප්‍රාදේශීය සභාවේ හිටපු සභාපතිවරයකුට ද ජනාධිපති සමාව ලබාදුන්නේය.
රෝයල් පාක් !
රාජගිරිය රෝයල් පාක් නිවාස සංකීර්ණයේදී 2005 වසරේදී ඉවෝන් ජොන්සන් නමැති තරුණිය ඝාතනය කිරීම සම්බන්ධයෙන් ජූඞ් ශ්‍රමන්ත ඇන්තනීට කොළඹ මහාධිකරණයෙන් වසර 12ක සිර දඬුවම් නියම කෙරිණි. ඊට එරෙහිව විත්ති පාර්ශ්වයෙන් අභියාචනා කරන ලද අතර, අභියාචනාධිකරණය එය මරණ දඬුවමක් දක්වා වැඩි කළේය. මේ මරණ දඬුවමට එරෙහිව යළිත් විත්ති පාර්ශ්වය ශ්‍රේෂ්ඨාධිකරණයට ගියේය. ශ්‍රේෂ්ඨාධිකරණය මගින් අභියාචනාධිකරණ තීන්දුව තහවුරු කළේ අභියාචනාධිකරණයට ද මරණ දඬුවම ලබාදිය හැකිය යනුවෙන් විශේෂ තීන්දුවක් ද ලබාදෙමින් ය. කෙසේ වෙතත් හිටපු ජනාධිපති මහින්ද රාජපක්ෂ විසින් එම මරණ දඬුවම, ජීවිතාන්තය දක්වා සිර දඬුවමක් බවට ලිහිල් කෙරිණි. ඉන්පසු මෛත්‍රිපාල සිරිසේන විසින් ඔහුට පූර්ණ සමාවක් ලබාදෙන ලදි.
34 (1) වගන්තිය
ශ්රී ලංකා ප්‍රජාතාන්ත්‍රික සමාජවාදී ජනරජයේ ආණ්ඩුක්‍රම ව්‍යවස්ථාවේ 34 (1) වගන්තිය මගින් ජනාධිපතිවරයාට එවැනි සමාවක් ලබාදීමට අවශ්‍ය ප්‍රතිපාදන ලබා දී ඇත. එහෙත් එය නීත්‍යනුකූල සලකාබැලීම්වලට ද යටත් ය. මරණ දඬුවම නියම කර ඇති වරදකරුවෙකුට එම සමාව ලබාදීමේදී ව්‍යවස්ථාවට අනුව අදාළ නඩුව විභාග කළ විනිසුරුවරයාගෙන් වාර්තාවක් කැඳවිය යුතුය. එම වාර්තාව උපදෙස් ලබාගැනීම සඳහා නීතිපතිවරයා වෙත යොමු කළ යුතු අතර, නීතිපතිවරයාගේ උපදෙස් සහිත අදාළ වාර්තාව අධිකරණ ඇමැතිවරයා වෙත යොමු කළ යුතුය. අධිකරණ ඇමැතිවරයා විසින් ඊට අදාළ තම නිර්දේශය ජනාධිපතිවරයා වෙත යොමු කළ යුතුය.
ව්‍යවස්ථානුකූල ද – තනි කැමැත්තට ද?
මේ අනුව නඩුව විභාග කළ විනිසුරුවරුන්ගේ වාර්තාව, ඒ පිළිබඳ නීතිපතිවරයාගේ මතය සහ අධිකරණ ඇමැතිවරයාගේ නිර්දේශය මත මේ සමාව ලබාදී තිබේද යන්න දැනගැනීම ජනතාවගේ අයිතියකි. එවැනි වාර්තාවක්, මතයක් සහ නිර්දේශයක් සහිතව මේ සමාව ලබාදුන්නේද යන්න හෝ එම පාර්ශ්වවල නිර්දේශ සහ වාර්තා නොමැතිව අදාළ සමාව ලබාදුන්නේද හෝ යන්න පිළිබඳව ජනතාව දැනුවත් කළ යුතුය. මේ සඳහා ජනාධිපතිවරයාට ව්‍යවස්ථානුකූලව බලය තිබුණද, එය අත්තනෝමතික හෝ තෝරාගැනීමක් සහිතව හෝ ක්‍රියාත්මක නොකළ යුතුය.
ආණ්ඩුක්‍රම ව්‍යවස්ථාවේ 34 වගන්තිය යටතේ ලබාදී ඇති මෙවැනි සමාවක් ලබාදීමේදී 34 (1) වගන්තියේ දක්වා ඇති විධිවිධානවලට අනුකූලව කටයුතු කර තිබේ ද යන්න විශ්ලේෂණය කළ යුතුය.
ඇත්ත ජනතාව දැනගත යුතුයි !
හිටපු ජනාධිපති ගෝඨාභය රාජපක්ෂ විසින් දුමින්ද සිල්වාට ජනාධිපති සමාව ලබාදුන් අවස්ථාවේදී ශ්රී ලංකා නීතිඥ සංගමය විසින් ජනාධිපතිවරයා වෙත මේ පිළිබඳව ප්‍රශ්න කරමින් ලිපියක් යොමුකරන ලදි. එහිදී පහත කරුණු විශේෂයෙන් අවධාරණය කෙරිණි.
(අ) ආණ්ඩුක්‍රම ව්‍යවස්ථාවේ 34 (1) යටතේ ජනාධිපති සමාව ලබාදීම සඳහා දුමින්ද සිල්වා තෝරාගත් පදනම.
(ආ) එම සමාව ලබාදීමේදී අවධානය යොමු කළ කරුණු.
(ඇ) අනෙකුත් මරණ දඬුවම නියම කර ඇති වරදකරුවන්ගෙන් දුමින්ද සිල්වා විශේෂිත වන ආකාරය.
(ඈ) දුමින්ද සිල්වාට ජනාධිපති සමාව ලබාදීමට පෙර 34 (1) වගන්තියේ සඳහන් විධිවිධාන ප්‍රකාරව, නඩුව විභාග කළ විනිසුරුවරුන්ගෙන් ජනාධිපතිවරයා වාර්තාවක් කැඳවූයේද, එසේ නම් එම වාර්තාවේ අන්තර්ගතය කුමක්ද යන්න.
(ඉ) දුමින්ද සිල්වාට ජනාධිපති සමාව ලබාදීමට පෙර නීතිපතිවරයාගේ මතය විමසා සිටියේද යන්න සහ එසේ විමසා සිටියේ නම් එම මතය කුමක්ද යන්න.
(ඊ) දුමින්ද සිල්වාට ජනාධිපති සමාව ලබාදීමට පෙර අධිකරණ ඇමැතිවරයාගේ නිර්දේශය ලබාගෙන තිබේද යන්න සහ එසේ නම් එම නිර්දේශය කුමක්ද යන්න.