ඛනිජ තෙල් නීතිගත සංස්ථාවේ තෝරාගත් වෘත්තීය සමිති නායකයෙකුට එරෙහිව නීතිමය පියවර ගන්නා ලෙස විෂය බාර ඇමති කාංචන විජේසේකරගේ පාර්ශ්වයෙන් අපරාධ පරීක්ෂණ දෙපාර්තමේන්තුවට උපදෙස් දී ඇතැයි විශ්වාස කටයුතු ආරංචි මාර්ග සඳහන් කරයි.
මෙම වෘත්තීය සමිති නායකයා අනිවාර්ය නිවාඩු යවා නැත.
සංස්ථා අභ්‍යන්තරයේ සීසීටීවී දර්ශන පරීක්ෂා කිරීම පසුගියදා අපරාධ පරීක්ෂණ දෙපාර්තමේන්තුව මගින් සිදුකරන ලදි. එහිදී හඳුනාගත් සංස්ථා සේවකයන් පිළිබඳව කාංචන විජේසේකර ඇමතිවරයා විසින් වාර්තාවක් ලබාගෙන තිබේ. ඉන්පසු ඇමතිවරයා විසින් අදාළ වෘත්තීය සමිති නායකයා ඉලක්ක කොට විමර්ශන ක්‍රියාත්මක කරන ලෙසත්, ඔහුට එරෙහිව නීතිමය පියවර ගත හැක්කේ කෙසේද යනුවෙන් නීතිපති දෙපාර්තමේන්තුවෙන් උපදෙස් ලබාගන්නා ලෙසත් දැනුම් දී ඇත.
මහින්ද හමුව
මේ අතර වර්ජනය දින සේවකයන්ට බලපෑම් කළ බවට චෝදනා එල්ල කොට අනිවාර්ය නිවාඩු යවා ඇති වෘත්තීය සමිති සාමාජිකයන් ඇතුළු ඛනිජ තෙල් සේවකයන් 20කගේ කණ්ඩායමක් අද (01) ශ්‍රී ලංකා පොදුජන පෙරමුණේ නායක මහින්ද රාජපක්ෂ හමුවී තිබේ. ඒ, ඔහුගේ කොළඹ පිහිටි නිවසේදී ය.
මෙම පිරිස ඉදිරි දින කිහිපයේදී විපක්ෂ නායක සජිත් ප්‍රේමදාස සහ හිටපු ජනාධිපති මෛත්‍රිපාල සිරිසේන ද මුණගැසීමට සැලසුම් කර තිබේ. එසේම මෙම පිරිස තමන්ව අනිවාර්ය නිවාඩු යැවීමට එරෙහිව මානව හිමිකම් කොමිෂන් සභාවට පැමිණිල්ලක් ද ඉදිරිපත් කර තිබේ.
මේ අතර සංස්ථා අභ්‍යන්තර ආරංචි මාර්ග සඳහන් කරන්නේ සඳුදා (03) සිට මෙම පිරිසට අදාළ විනය පරීක්ෂණ ආරම්භ කිරීමට නියමිත බවයි.
පාවාදීමක් !
වෘත්තීය සමිති නායකයන් මර්දනය කර ඛනිජ තෙල් සම්පත අහිමි කිරීමේ මහා පාවාදීමේ වටිනාකම බලශක්ති ඇමති කාංචන විජේසේකර ඇමතිවරයා ඇතුළු වගකිවයුත්තන්ට ගෙවීමට සිදුවන බව ශ්‍රී ලංකා පොදුජන පෙරමුණ යටතේ ක්‍රියාත්මක ඛනිජ තෙල්, වාණිජ සේවා, කර්මාන්ත ප්‍රගතිශීලි සේවක සංගමයේ සභාපති, අනිවාර්ය නිවාඩු යවා ඇති බන්දුල සමන් කුමාර පැවසීය.
ශ්‍රී ලංකා පොදුජන පෙරමුණේ වෘත්තීය සමිතියේ ප්‍රධානියා ලෙස තමන් සහ සංස්ථාවේ තම වෘත්තීය සමිතියේ අනෙකුත් සාමාජිකයන් 2019 ආණ්ඩුව බලයට පත්කිරීම සඳහා කළ කැපකිරීම මහින්ද රාජපක්ෂ ප්‍රමුඛ සියලු පාර්ශ්ව දන්නා බවත්, එසේ තිබියදී මෙසේ තමන් කියන දේට ඇහුම්කන් නොදී සිටීම දැඩි කණගාටුවක් බවත් සභාපතිවරයා සඳහන් කළේය.
පොදුජන පෙරමුණ දේශපාලන පක්ෂය පිහිටුවීමටත් පෙර සිට තමන් ප්‍රමුඛ වෘත්තීය සමිති නායකයන් පොදුජන පෙරමුණු ප්‍රගතිශීලි බලවේගය ගොඩනැගූ බවත්, එහි අරමුණ වූයේ ජාතික සම්පත් සුරක්ෂිත කොට රට දියුණු කිරීම බවත් පෙන්වා දුන් ඔහු, එසේ කළ තමන්ට මෙසේ සැලකීම කිසිසේත්ම අපේක්ෂා නොකළ බව ද අවධාරණය කළේය.
සභාපතිවරයා මෙසේ පැවසුවේ ඛනිජ තෙල් සංස්ථා වෘත්තීය සමිති නායකයන් අනිවාර්ය නිවාඩු යැවීමත්, ඔවුන්ට ආයතන පරිශ්‍රයට ඇතුළු වීම තහනම් කිරීමත් සම්බන්ධයෙන් කළ විමසීමකදී ය.
සත්‍යග්‍රහයේ සිට වර්ජනය දක්වා
සංස්ථාවේ කොටස් විදේශ සමාගම් 03කට වසර 20ක කාලයක් සඳහා පවරා දීම සම්බන්ධයෙන් ඉදිරිපත් කළ කැබිනට් පත්‍රිකාවකට අනුමැතිය ලබාදීමට එරෙහිව සංස්ථා වෘත්තීය සමිති පසුගිය 28දා උදෑසන සත්‍යග්‍රහයක් ඇරඹීය. බලධාරීන් ඊට කිසිදු ප්‍රතිචාරයක් නොදැක්වීම නිසා සත්‍යග්‍රහය වර්ජනයක් දක්වා පුළුල් කිරීමට 28 පස්වරුවේ එම වෘත්තීය සමිති තීරණය කළේය.
ඒ අනුව ඉන්ධන බෙදාහැරීම නතර කෙරිණි. ඉන්පසු ආරක්ෂක හමුදා යොදවා බලහත්කාරයෙන් බවුසර්වලට තෙල් පිරවීමටත්, ඒවා පිටත් කිරීමටත් කටයුතු කෙරිණි. එම උත්සාහයේදී තෙල් බවුසර් 10ක් පමණ පිටතට යැවීමට ආරක්ෂක අංශ කටයුතු කළේය.
කෙසේ වෙතත් මේ සඳහා සහයෝගය නොදුන් සහ සංස්ථා සේවකයන්ට රාජකාරියට වාර්තා කිරීමට ඉඩනොදුන් වෘත්තීය සමිති නායකයන්ට එරෙහිව පියවර ගන්නා බව 28 රාත්‍රියේ ඛනිජ තෙල් විෂය බාර ඇමති කාංචන විජේසේකර පැවසීය.
උදෑසන ලිපිය
ඒ අනුව පසුගිය 29දා උදෑසන ලංකා ඛනිජ තෙල් නීතිගත සංස්ථාවේ සභාපතිවරයාගේ සහ ලංකා ඛනිජ තෙල් තොග ගබඩා පර්යන්ත සමාගමේ සභාපතිවරයාගේ අත්සනින් නිකුත් කළ නිවේදනයක සඳහන් වූයේ ඉන්ධන බෙදාහැරීමේ කටයුතුවලට බාධා වන ලෙස සහ ඉන්ධන බෙදාහැරීමේ සේවාවල යෙදී සිටි සේවකයන්ට බලපෑම් කරමින් එම සේවා අවහිර කිරීමට කටයුතු කළ වෘත්තීය සමිති නායකයන් අනිවාර්ය නිවාඩු යැවීමට සංස්ථා කළමනාකාරිත්වය තීරණය කර ඇති බවයි.
එසේ ම ඔවුන්ට සංස්ථා පරිශ්‍රවලට ඇතුළු වීම තහනම් කරන බව ද එම නිවේදනයේ සඳහන් විය.
හේතුව කුමක්ද?
විදේශීය සමාගම් 3කට මෙරට ඉන්ධන සිල්ලර වෙළෙඳපොළ වෙත පිවිසීම සඳහා කැබිනට් අනුමැතිය හිමිවූ බව පසුගිය 27දා විදුලිබල සහ බලශක්ති ඇමති කාංචන විජේසේකර සඳහන් කළේය.
ට්විටර් පණිවුඩයක් නිකුත් කරමින් ඇමතිවරයා පැවසුවේ Hell PLC සමග එක්ව චීනයේ Sinopec, United Petroleum of Australia සහ USA RM Parks යන සමාගම් සඳහා මෙම අනුමැතිය ලැබී ඇති බවයි. ඒ අනුව අදාළ සමාගම්වලට වසර 20ක බලපත්‍රයක් හිමිවීමට නියමිත ය. මෙරටට ඛනිජ තෙල් නිෂ්පාදන ආනයනය කිරීම, ගබඩා කිරීම, බෙදාහැරීම සහ අලෙවි කිරීම යන කාර්යයන් සඳහා ඔවුන්ට මෙම බලපත්‍රය හිමි වේ.
නියෝජිත ඉන්ධන පිරවුම්හල්
ලංකා ඛනිජ තෙල් සංස්ථාවේ මෙහෙයුම යටතේ ක්‍රියාත්මක නියෝජිත ඉන්ධන පිරවුම්හල් 450ක් රට පුරා තිබේ. එම නියෝජිත පිරවුම්හල් 450, අදාළ සමාගම් 3ට 150 බැගින් ලබාදීමට සැලසුම් කර තිබේ.