යුද්ධයේ අවසන් වකවානුවේදී යුද හමුදාවට බාර වූ එල්ටීටීඊ සාමාජිකයන් සම්බන්ධයෙන් තොරතුරු ඉල්ලා ගොනුකරන ලද අභියාචනයක විමර්ශන අවසන් කිරීමට තොරතුරු දැනගැනීමේ කොමිෂන් සභාව අද (28) තීරණය කළේය.
ඒ අනුව අවශ්‍ය ලිඛිත වාර්තා ගොනුකිරීමට දෙපාර්ශ්වයට කාලය ලබාදුන් කොමිසම, ඉන්පසු අභියාචනයට අදාළ තීන්දුව ප්‍රකාශයට පත්කරන බව දැනුම්දුන්නේය.
Tamil Mirror පුවත්පතේ මාධ්‍යවේදී පී. නිරෝෂ් කුමාර් විසින් ශ්‍රී ලංකා යුද හමුදාවෙන් අදාළ තොරතුරු ඉල්ලා තිබිණි. එම තොරතුරු නොලැබීම නිසා ඔහු කොමිසමට අභියාචනා කළ අතර, RTIC App/No: 1111/2022 යටතේ මෙම අභියාචනය විභාග කෙරිණි.
ඉල්ලුවේ මොනවාද ?
යුද්ධයේ අවසාන කාලයේදී යුද හමුදාවට බාර වූ එල්ටීටීඊ සාමාජිකයන් කවුද සහ ඔවුන්ගේ තොරතුරු, ඔවුන් බාරගත්තේ කවුද, ඔවුන් බාර වුණේ කොහේදීද, එසේ බාර වූ එල්ටීටීඊ නායකයන්ට විරුද්ධව ගත් පියවර මොනවාද යන තොරතුරු අදාළ මාධ්‍යවේදියා විසින් තොරතුරු දැනගැනීමේ පනත යටතේ ඉල්ලා තිබිණි.
හමුදාවේ ප්‍රතිචාර
කොමිසම මගින් සිදු කළ විමර්ශනයේදී හමුදාව පාර්ශ්වයෙන් මුලින්ම පැවසුවේ එහිදී කිසිවකු හමුදාවට බාර වූයේ නැති බවයි. ඉන්පසු ඔවුන් සඳහන් කර තිබුණේ බාර වූ පුද්ගලයන් එල්ටීටීඊ සාමාජිකයන් ද යන්න හඳුනාගත නොහැකි වූ බවත්, බාර වූ සියල්ලන් අවතැන් කඳවුරු වෙත යොමු කළ බවත් ය.
මාධ්‍ය වාර්තා සහ ලේඛන ආශ්‍රයෙන් තොරතුරු ඉල්ලුම්කරුගේ පාර්ශ්වයෙන් කරුණු ඉදිරිපත් කිරීමෙන් පසු හමුදාව හෙවත් පොදු අධිකාරිය පාර්ශ්වයෙන් සඳහන් කළේ බාර වූ පුද්ගලයන්ගේ තොරතුරු ලබානොගත් බවයි.
තොරතුරු ඉල්ලුම්කරුගේ පාර්ශ්වයෙන් නීතිඥ කේ.එස්.රත්නවේල්, නීතිඥ ස්වස්තිකා අරුලිංගම් සහ මාධ්‍යවේදී තරිඳු ජයවර්ධන කොමිසම ඉදිරියේ පෙනීසිටියහ.
යුද හමුදාව පාර්ශ්වයෙන් නීතිඥවරුන් ලෙස බ්‍රිගේඩියර් ආර්.ඩි.ඕ. පතිරණගේ ප්‍රමුඛ ලුතිනන් කමාන්ඩර් ඩි.සී.කේ.ඩබ්ලිව්. රණසිංහ සහ මේජර් බී.ඩි.ජේ. යායවීර කොමිසම ඉදිරියේ පෙනීසිටියහ.
තොරතුරු දැනගැනීමේ කොමිෂන් සභාවේ සභාපති විශ්‍රාමික විනිසුරු උපාලි අබේරත්න සමග විශ්‍රාමික විනිසුරු රෝහිණී වල්ගම, නීතිඥ කිෂාලි පින්ටෝ ජයවර්ධන, නීතිඥ ජගත් ලියන ආරච්චි සහ ඒ.එම්. නාහියා යන කොමසාරිස්වරුන් ඉදිරියේ මෙම අභියාචනය විභාග කෙරිණි.
අධිකරණ නියෝගයක්
මේ අතර යුද්ධයේ අවසාන කාලයේදී 2009 මැයි මාසයේ මුලතිව් යුද හමුදා කඳවුරට බාර වූ හිටපු එල්ටීටීඊ සාමාජිකයන් තිදෙනෙකු මාර්තු 22 දිනට පෙර අධිකරණයට ඉදිරිපත් කරන ලෙස මීට පෙර නියෝගයක් ලබාදෙන ලදි.
වව්නියා මහාධිකරණය මගින් මෙම නියෝගය නිකුත් කරනු ලැබුවේ එම සාමාජිකයන්ගේ භාර්යාවන් විසින් ඉදිරිපත් කරන ලද හේබියස්කෝපුස් (habeas corpus) පෙත්සම් 03ක් සලකාබැලීමෙන් පසුව ය.
පසුගිය පෙබරවාරි 23දා මෙම පෙත්සම් විභාගයට ගත් අවස්ථාවේ පෙත්සම්කරුවන් අධිකරණයට දැනුම් දුන්නේ 2009 මැයි 18දා සිය ස්වාමිපුරුෂයන් යුද හමුදාවට බාර වූ බවත්, එදින සිට ඔවුන් අතුරුදන් බවත් ය. මෙම පෙත්සම විභාගයට ගැනීමට අධිකරණය මීට පෙර තීන්දු කළේය. එය සමාජයේ දැඩි කතාබහට ලක්විය.
යුද හමුදාපතිවරයා, 58 වැනි සේනාංකයේ සේනාංකාධිපතිවරයා සහ මුලතිව් යුද හමුදා කඳවුරේ ප්‍රධාන අණදෙන නිලධාරියා මෙම පෙත්සමේ වගඋත්තරකරුවන් ලෙස නම් කර ඇත.
අතුරුදන් කවුද ?
පොන්නම්බලම් කන්දස්වාමි, සින්නතුරෙයි සසිදරන් හෙවත් එලිලන් සහ රුද්‍රකුමාර් ක්‍රිෂ්නකුමාර් වෙනුවෙන් මෙම රීට් පෙත්සම් ඉදිරිපත් කර තිබේ. මහාධිකරණයෙන් මීට පෙර මුලතිව් මහේස්ත්‍රාත් අධිකරණයට නියෝග කර තිබුණේ මෙම සිදුවීම සම්බන්ධයෙන් වාර්තාවක් ඉදිරිපත් කරන ලෙසයි.
‘කිසිවෙකු නෑ’
58 වැනි සේනාංකයේ සේනාංකාධිපති මේජර් ජෙනරාල් චානක්‍ය ගුණවර්ධන නීතිපතිවරයා මාර්ගයෙන් අධිකරණයට කරුණු දක්වමින් පෙන්වා දී තිබුණේ කිසිවෙකු අත්අඩංගුවේ හෝ රඳවා තබාගෙන නොමැති බවයි. කෙසේ වෙතත් 2009 මැයි 17, 18 සහ 19 යන දින තුනේදී මුලතිව් යුද හමුදා කඳවුරට බාර වූ පුද්ගලයන් පිළිබඳ ලේඛනයක් හමුදාව සතු බව ද ඔහු මීට පෙර සඳහන් කර තිබිණි.
එම ලේඛනය අධිකරණයට ඉදිරිපත් කරන ලෙස වව්නියාව මහාධිකරණයෙන් නියෝග කර තිබිණි.
ස්ථානීය වාර්තාවක් නෑ ?
කෙසේ වෙතත් මේජර් ජෙනරාල් ගුණවර්ධන අධිකරණයට ඉදිරිපත් කර තිබුණේ පුනරුත්ථාපන කොමසාරිස් ජනරාල්වරයා විසින් සකස් කළ වාර්තාවක් පමණි. හමුදාව විසින් ඒ මොහොතේ සකස් කළ වාර්තාවක් අධිකරණයට ඉදිරිපත් නොකිරීම සැලකිය යුතු කාරණයක් බව අධිකරණය පාර්ශ්වයෙන් මෙහිදී අවධාරණය කෙරිණි.
‘සාක්ෂි තියෙනවා’
පෙත්සම්කරුවන් වෙනුවෙන් පෙනී සිටි නීතිඥයන් මෙහිදී අධිකරණයට පෙන්වා දුන්නේ අදාළ පුද්ගලයන් ශ්‍රී ලංකා යුද හමුදා අත්අඩංගුවේ සිටින බව දුටු සාක්ෂි ඇති බවයි. එම සාක්ෂි ලිඛිත ව ගොනුකිරීමට ද පෙත්සම්කාර පාර්ශ්වය කටයුතු කර ඇත.
අධිකරණය සෑහීමකට පත්වෙයි
මෙහිදී මහාධිකරණ විනිසුරු රාමනාදන් කන්නන් සඳහන් කළේ පෙත්සම්කරුවන් විසින් ඉදිරිපත් කර ඇති සාක්ෂි පිළිබඳ අධිකරණය සෑහීමට පත්වන බවයි. එම නිසා අදාළ පුද්ගලයන් ඉදිරිපත් කිරීමේ වගවීමක් වගඋත්තරකරුවන්ට ඇති බව ද අධිකරණය අවධාරණය කර ඇත.
ජ්‍යෙෂ්ඨ නීතිඥ කේ.එස්. රත්නවේල් සමග ජී. රනීතා සහ එම්. කේතීශ්වරන් යන නීතිඥවරුන් පෙත්සම්කරුවන් වෙනුවෙන් මෙදින අධිකරණයේ පෙනී සිටි අතර, ජ්‍යෙෂ්ඨ රජයේ නීතිඥ අබේවික්‍රම වගඋත්තරකරුවන් වෙනුවෙන් පෙනීසිටියේය.