රජයේ පාසල්වල පළමු ශ්‍රේණියට ඇතුළත් කරගත් ළමුන්ට පන්ති ආරම්භ කිරීම අද (28) සිට සිදු වේ.
පන්ති කාමරයක සිටිය යුතු ශිෂ්‍ය සංඛ්‍යාව සම්බන්ධයෙන් සංවාදයක් පවතින අතර, මෙවරත් බොහෝ ජනප්‍රිය පාසල්වල එක් පන්තියකට සිසු-සිසුවියන් 35කට වැඩි සංඛ්‍යාවක් ඇතුළත් කරගෙන තිබේ. එහෙත් ශ්‍රේෂ්ඨාධිකරණය මගින් ලබාදී ඇති තීන්දුවකට අනුව මේ වන විට එක පන්තියකට ඇතුළත් කරගත හැක්කේ සිසු-සිසුවියන් 35ක් පමණි.
අධ්‍යාපනඥයන් ද අවධාරණය කරන්නේ පාසලක එක් පන්තියක ළමුන් 35කට වඩා නොසිටිය යුතු බවයි. ඊට හේතු ලෙස ඔවුන් දක්වන්නේ පන්ති කාමරවල තදබදය අවම කිරීම සහ නිදහස් ඉගෙනුම් පරිසරයක් ගොඩනැගීම ය.
ශ්‍රේෂ්ඨාධිකරණ තීන්දුව
289/2007, 235/2011, 232/2011 යන අංක දරන නඩු තීන්දු එකක් ලෙස ගෙන ශ්‍රේෂ්ඨාධිකරණය ප‍්‍රකාශයට පත්කර ඇත්තේ 2016 වසරේ සිට පන්තියක සිටිය යුතු මුළු ශිෂ්‍ය සංඛ්‍යාව 35ක් විය යුතු බවයි.
අංක 14/1745/580/060 දරන අමාත්‍ය මණ්ඩල පත‍්‍රිකාවෙන් ද ඉහත කී ශ්‍රේෂ්ඨාධිකරණ නියෝගය තහවුරු කර තිබේ. ඉන්පසු ඊට අදාළව අධ්‍යාපන අමාත්‍යංශයෙන් 23/2013/2 දරන චක‍්‍රලේඛයක් ද නිකුත් කර තිබේ. මේ සියල්ලට අනුව, එනම් නීතියට අනුව කටයුතු කරන්නේ නම් දැන් පාසලක එක වසරට ළමුන් 35කට වඩා ගත නොහැකිය.
උපක්‍රම
2015 ඔක්තෝබර් 21දා එවකට පැවති කැබිනට් මණ්ඩලය තීන්දුවක් ගත්තේය. 15/1490/742/003 අංක දරන ඒ කැබිනට් තීන්දුවට අනුව එක වසරට ළමුන් 40ක් ගත හැකිය. ඒ 2016 වසරේදී ය. 2016 දී 40 ක්, 2017 දී 39 ක්, 2018 දී 38 ක්, 2019 දී 37 ක්, 2020 දී 36 ක්, 2021 දී 35 ක් ලෙස එක වසරට ගන්නා ළමුන් සංඛ්‍යාව අඩු කරන්නට එමගින් තීරණය කෙරිණි. ලංකා ගුරු සංගමය මගින් මීට එරෙහිව මානව හිමිකම් කොමිසමේ HRC/398/16 දරන අංකය යටතේ පැමිණිල්ලක් ද සිදුකළේය.
ශ්‍රේෂ්ඨාධිකරණ නියෝගය 2021 සිට ක්‍රියාත්මක කිරීම එහි අරමුණ විය. 2015 – 2019 ආණ්ඩුවේ තීරණය එය විය.
යළිත් අනුමතයි !
2019 ගෝඨාභය රාජපක්ෂ ජනාධිපතිවරයාගේ ආණ්ඩුව ද අදාළ ශ්‍රේෂ්ඨාධිකරණ තීන්දුවට අදාළව පන්ති කාමරයක සිටිය යුතු ළමයින් සංඛ්‍යාව 35ක් බව පිළිගත්තේය. 2016 වසරේ සිට ක්‍රියාත්මක පෙර සඳහන් කළ චක‍්‍රලේඛයට අනුව 2021 වසරේ දී පන්තියකට ඇතුළත් කර ගත යුතු සිසුන් සංඛ්‍යාව 35ක් විය. අධ්‍යාපන අමාත්‍යශංයේ එවකට ලේකම් මහාචාර්ය කපිල පෙරේරා විසින් 2020 දෙසැම්බර් 04 දිනැතිව නිකුත් කළ ඊඩී/12/11/02/02 ලිපිය මගින් ද 2021 වසරේ සිට පන්තියක සිටිය යුතු ළමුන් සංඛ්‍යාව 35ක් බව අවධාරණය කෙරිණි.
නැවත වෙනස් වෙයි !
නමුත් කඩිමුඩියේ එම ස්ථාවරය වෙනස් කරමින් 2021 මැයි 31දා අධ්‍යාපන අමාත්‍යාංශ ලේකම්වරයා පුවත්පත් නිවේදනයක් නිකුත් කළේය. ඒ 2022 වසරේ පාසල්වල පළමු ශ්‍රේණියට ළමයින් ඇතුළත් කර ගැනීමට අදාළ විධිවිධාන හා උපදෙස් නිකුත් කරමිනි. එ් අනුව පන්තියක සිටිය යුතු උපරිම ශිෂ්‍ය සංඛ්‍යාව 35ක් නොව 40ක් බවට ප්‍රකාශ කෙරිණි. ඒ අතරින් සිසුන් 35ක් සම්මුඛ පරීක්ෂණ මගින් ද, 5ක් ක්‍රියාන්විත රාජකාරියේ යෙදුණු ත්‍රිවිධ හමුදාවේ සහ පොලීසියේ සාමාජිකයන්ගේ ළමයින් අතරින් ද තෝරාගැනීමට තීරණය කෙරිණි.
මේ වසරට අදාළවත් කිසිදු වෙනසක් සිදුනොවීය. අප පෙනීසිටින්නේ සෑම දරුවෙකුටම සමාන අධ්‍යාපන අවස්ථා ලබාදීම වෙනුවෙනි. එය පසෙක තබා, ජනප්‍රිය පාසල් තරගය තවදුරටත් වැඩිකරමින් ඒ හරහා අල්ලස් සහ ගනුදෙනු විශාල වශයෙන් සිදුකිරීමට ඉඩ සකස් කර දීම අධ්‍යාපනයට අදාළ ආණ්ඩුවේ කාර්යභාරය වී ඇත.