‘2019 වසරේ එක්තරා මාසයක සාමාන්‍ය දවසක විය හැකිව තිබූ සිද්ධියක් පාදක කරගෙනයි මේ නාට්‍යය ගොඩනැගිලා තියෙන්නෙ. ඒ හරහා මේ ගතවෙන ජීවිතයත්, ඉදිරියේදී ගතවෙන්න තියෙන ජීවිතයේ සමහර කාරණාවලට හේතු වුණු අපේ හැසිරීම් සමුදායත් යම් විවරණයකට ලක්කරනවා. සැකය, බිය වැනි කාරණා මිනිස්සුන්ගෙ මනසට ඇතුළු වුණාම ඔවුන් ක්‍රියාකරන ආකාරයත්, ඒ ඔස්සේ සමහර මඟහැරෙන දේවල් පිළිබඳවත් සිතීමකට ප්‍රේක්ෂකයාට ඉඩසලසන්නයි මෙම නිර්මාණයෙන් මම උත්සාහ කරන්නෙ.’
රාජිත දිසානායක මෙහෙම කියන්නෙ ‘2019 ජූලි මාසයේ දවසක්’ වේදිකා නාට්‍යය ගැන.
නිර්මාණකරණයට අවශ්‍ය වස්තුබීජ ඇති තරම් තියෙන මේ වගේ පොළොවක ඔබ නාට්‍යයට මුල්කරගන්නෙ කල්පිතයක්. ඇයි ඒ … ?
ඒ ප්‍රශ්නෙට රාජිතට මෙහෙම උත්තරයක් තියෙනවා.
‘කලාව කියන්නෙ ප්‍රබන්ධයක්. පරිකල්පනය තුළ තමයි ප්‍රබන්ධයක් ගොඩනැගෙන්නෙ. සිදුවූ සිද්ධියකදි වුණත් පරිකල්පනයෙන් එකතු වෙන කොටස් තියෙනවා. කලාකරුවාගේ කාර්යය වෙන්නෙ පරිකල්පනය තුළ ප්‍රබන්ධය ගොඩනැගීමයි. මේ නිර්මාණයෙත් ඒ වගේම සිදු විය හැකිව තිබූ දෙයක් නිර්මාණය කරලා තියෙන්නෙ. නිර්මාණයක් වාර්තාවකින් වෙනස් වෙන්නෙ ඒ අයුරින්.’
ඔහු නිර්මාණය කර ඇත්තේ කුමක්ද ?
ඔහු කියන්නට හදන්නේ කුමක්ද ?
2019 අප්‍රේල් 21න් පසුව එන 2019 ජූලි මාසයේ දවසක් …!
මීට අවුරුදු 27කට පෙර ‘සක්වාදාවල’ අරන් වේදිකාවට පැමිණි රාජිත, ‘හංසයන්ටත් මං ආසයි – 1996’, ‘මට වෙඩි තියන්නැද්ද – 1999’, වීරයා මැරිලා – 2002’, ‘සිහින හොරු අරං – 2005’, ආපහු හැරෙන්න බෑ – 2009’, ‘බකමුණා වීදි බසී’ වගේ වේදිකා නාට්‍ය හරහා වේදිකාවේ නිශ්චිත සලකුණක් සටහන් කළා. ආපහු හැරෙන්න බෑ කියන්නෙ ඔහුගෙ කුඨප්‍රාප්තිය. බකමුණා වීදි බසී තුළ පරණ රාජිත ව හමුවෙන්නෙ ටිකක් අඩුවෙන්.
ඒත් ‘2019 ජූලි මාසයේ දවසක්’ හරහා ඔහු යළිත් පුරුදු ප්‍රහාරාත්මක සහ තාක්ෂණික පිති හරඹයේ යෙදෙනවා.
ස්විට්සර්ලන්ත මනෝ විද්‍යාඥයෙකු වූ කාර්ල් ජුන්ග් (Carl Gustav Jung : 1875-1961) රාජිත දිසානායක වැන්නන්ගේ සමාජ මැදිහත්වීම දකින්නෙ මේ විදිහට.
‘කලාවෙන් අනාවරණය කෙරෙන යතාර්ථය සමාජයේ පවතින්නකි. එහෙත් සමාජය ඒ ගැන නොදනී. එම නොදන්නා දේ ඉක්මවා පෙරට යෑමට සමාජයට යතාර්ථය පිළිබඳ ඥානය අවශ්‍ය වේ. එම ඥානය භාවිතයට මගපෙන්වයි. කලාවේ මාර්ගය වැටීඇත්තේ මේ මාවතේ ය.’
සමාජයෙන් සත්‍යය වසන් කළ – කරන – නියත වශයෙන් ම ඉදිරියේදී අනාවරණය වන ඒ බරපතළ අපරාධය සිදු කළේ 2019 අප්‍රේල් 21 : පාස්කු ඉරිදා ත්‍රස්ත ප්‍රහාරය.
බලය වෙනුවෙන් ඕනෑම දෙයක් සිදුකරන ඝාතකයන්ගේ මග වැටී ඇත්තේ කොතැනටද යන්න තේරුම්ගැනීම සඳහා කලාවෙන් ජනතාව ඥානනය කිරීම අත්‍යවශ්‍යයි.
මේ, එවැනි ප්‍රයත්නයක්.
ඒ වගේම,
ඒ අපරාධයේ වින්දිතයන් කිහිපදෙනෙකු ජීවත් කරවන්න – ඔවුන්ට තාවකාලිකව හෝ සිනහවක් දෙන්න…
හැකි නම්,
අද (18) රාජිතගෙ නාට්‍යය බලන්න එන්න.
තැන – මරදාන, ටවර් හෝල් රඟහල
වෙලාව – 3.30 සහ 7.00
එන්න අමාරු නම් ටිකට් එකක් අරගෙන ඒ සිනහවට දායක වන ලෙසත් සංවිධායකවරුන් ඉල්ලා සිටිනවා.
ගිණුම් අංකය –
142020128644
හැටන් නැෂනල් බැංකුව : තලවතුගොඩ ශාඛාව
වැඩි විස්තර : 071 555 1237 (දුරේක්ෂා)