මලාවි රාජ්‍යයට බලපෑ “ෆ්‍රෙඩී” සුළි කුණාටුව හේතුවෙන් පුද්ගලයින් 99 දෙනෙකු මියගොස් තවත් පුද්ගලයින් 134 තුවාල ලබා තිබේ.
මෙම සුළි කුණාටුව අප්‍රිකාවේ දකුණු කලාපයට බලපෑ ප්‍රබලතම කුණාටුවක් ලෙස සැලකෙන අතර ලෝක කාලගුණ විද්‍යා සංවිධානයට අනුව දීර්ඝතම නිවර්තන සුළි කුණාටුව විය හැකිය.
මේ හේතුවන් මලාවි රාජ්‍යයයේ වාණිජ අගනගරය වන බ්ලැන්ටයර් වෙත වැඩි හානි සිදුව ඇති බවත් එරට ආපදා කළමනාකරණ අංශ පවසයි.
ආපදා කළමනාකරණ කටයුතු පිළිබඳ කොමසාරිස් චාල්ස් කලම්බා පෙන්වාදෙන්නේ මියගිය සහ තුවාල ලැබූවන්ගේ සංඛ්‍යාව තවදුරටත් ඉහළ යා හැකි බවයි.
එමෙන්ම කලම්බාට අනුව බොහෝ මරණ සිදුවී ඇත්තේ මලාවි හි වාණිජ අග නගරය වන බ්ලැන්ටයර් හි ය.
මේ හේතුවෙන් මලාවි රාජ්‍යය තුළ හදිසි ආපදා තත්ත්වයක් ද ප්‍රකාශ කර තිබේ.
ෆ්‍රෙඩී සුළි කුණාටුව මේ වනවිට මලාවි හි බොහෝ දිස්ත්‍රික්ක වලට බලපා ඇති බවත් එම සියලුම දිස්ත්‍රික්ක සඳහා හදිසි ආධාර ලබා දෙමින්, මෙම ව්‍යසනයෙන් විපතට පත් සියලුම පවුල් සඳහා දේශීය සහ ජාත්‍යන්තර සහාය ලබා දෙන ලෙස එරට ජනාධිපති ලාසරස් චක්වේරා, (Lazarus Chakwera) ඉල්ලා තිබේ.
සුළි කුණාටුවෙන් දරුණුතම බලපෑමට ලක් වූ දිස්ත්‍රික්ක 10 ක පාසල් එළඹෙන බදාදා දක්වා වසා තබන බව මලාවි අධ්‍යාපන අමාත්‍යාංශය ප්‍රකාශයක් නිකුත් කරමින් කියා සිටියේය.
එමෙන්ම මලාවි පොලිස් මාධ්‍ය ප්‍රකාශක පීටර් කලායා විදෙස් මාධ්‍ය වෙත ප්‍රකාශ කර තිබුණේ බොහෝ මාර්ග ජලයෙන් යටවී ඇති අතර දරුණුතම බලපෑමට ලක් වූ ප්‍රදේශවල විදුලිය විසන්ධි කර ඇති බවයි.
“ තවම වැස්සේ අඩුවක් නැහැ. නාය යෑම්, හදිසි ගංවතුර සහ ඇතැයි කඳු වලින් පහළට ගල් පෙරළෙනවා. අයහපත් කාළගුණ තත්වය නිසා ගලවා ගැනීමේ කටයුතු පහසු නැහැ. මිනිසුන් බේරා ගැනීමට ඇති සමහර ස්ථාන වලට යෑම පවා අතිශය දුෂ්කරයි. නමුත් අප හැකි උපරිමයෙන් ගලවා ගැනීමේ කටයුතු සිදු කරනවා. වැඩිදුරටත් අදහස් දක්වමින් පොලිස් මාධ්‍ය ප්‍රකාශකවරයා විදෙස් මාධය වෙත පවසා තිබිණි.
මෙම ෆ්‍රෙඩී සුළි කුණාටුව අසල්වැසි මොසැම්බික් සහ මැඩගස්කරයට ද බලපා ඇති අතර එම රටවල් වලද පුද්ගලයින් 20 කට වැඩි ප්‍රමාණයක් මියගොස් ඇති බව විදෙස් මාධ්‍ය සඳහන් කරයි.
එමෙන්ම රටවල් දෙකෙහිම තවත් දහස් ගණනක් අවතැන් කර ඇත.
ලෝක කාලගුණ විද්‍යා සංවිධානය (WMO) විසින් ෆ්‍රෙඩී සුළි කුණාටුව “ඉතා දුර්ලභ” කුණාටුවක් ලෙස විස්තර කර ඇති අතර එය හමා ගිය ආකාරය “ඇදහිය නොහැකි සහ භයානක” බව ලෙස හැඳින්වේ.