සංචාරක ශ්‍රී ලංකා කණ්ඩායම සහ නවසීලන්ත කණ්ඩායම අතර පැවති පළමු ටෙස්ට් තරගය කඩුලු 2කින් ජයගැනීමට නවසීලන්ත කණ්ඩායම සමත් විය.
ශ්‍රී ලංකා කණ්ඩායමට ටෙස්ට් ලෝක කුසලාන තරගාවලියේ අවසන් මහා තරගයට තේරී පත්වීමටනම් එම තරග දෙකකම ජය ගත යුතුව තිබිණි.
කෙසේවෙතත් මෙම පරාජයත් සමග ශ්‍රී ලංකාවට ටෙස්ට් ලෝක කුසලාන අවසන් මහා තරගයට සුදුසුකම් නොලැබෙනු ඇත.
තරග දෙකකින් සමන්විත මෙම තරගාවලියේ පළමු තරගය පසුගිය 09 වැනිදා ක්‍රයිස්චර්ච්හීදි ආරම්භ විය.
තරගයේ කාසියේ වාසිය දිනු නවසීලන්ත පිල ප්‍රථමයෙන් පන්දුවට පහරදීමට ශ්‍රී ලංකා පිලට ආරාධනා කළ අතර ඔවුන් සිය පළමු ඉනිමට සියලුදෙනා දැවි ලකුණු 355ක් රැස් කළේය.
නවසීලන්තය සිය පළමු ඉනිම වෙනුවෙන් සියලුදෙනා දැවි ලකුණු සංඛ්‍යාව 373ක් රැස් කළ අතර නවසීලන්ත පිල සිය පළමු ඉනිම අවසන් වෙද්දී ශ්‍රී ලංකා පිලට ලකුණු 18 ක් ඉදිරියෙන් සිටියහ.
දෙවැනි ඉනිම වෙනුවෙන් ශ්‍රී ලංකාව ලකුණු 302ක් රැස් කළ අතර ඒ අනුව, නවසීලන්තයට ජයග්‍රහණය සදහා ලකුණු 285ක ඉලක්කයක් හිමිවිය.
ශ්‍රී ලංකාව වෙනුවෙන් සුපිරි ඉනිමක් ක්‍රීඩා කළ ඇන්ජලෝ මැතිව්ස් හතරේ පහර 11 ක් සමගින් ලකුණු 115 ක් රැස් කිරීමට සමත්විය.
දනංජය ද සිල්වා ලකුණු 47 ක් රැස් කළ අතර දිනේෂ් චන්දිමාල් ලකුණු 42 රැස් රැස් කළේය.
ලකුණු 285ක ඉලක්කයක් හඹාගිය නවසීලන්තය ඊයේ (12) දිනය සඳහා තරගය නතර කරනවිට සිය දෙවන ඉනිමට එක් කඩුල්ලක් දැවි රැස්කරගෙන සිටි ලකුණු සංඛ්‍යාව 28කි.
ක්‍රයිස්චර්ච් නුවරට ඇද හැලුනු වර්ෂාව හේතුවෙන් අද දිනය සඳහා තරගය ආරම්භ කිරීම ප්‍රමාද වූ අතර නවසීලන්ත පිලට ජයග්‍රහණය සඳහා පන්දුවාර 53කදී කඩුලු 9ක් අතැතිව ලකුණු 257ක් රැස් කරගත යුතුව තිබිණි.
ලකුණු 33ක් රැස් කරගෙන සිටියදී කේන් විලියම්සන් ලබාදුන් උඩපන්දුවක් නිරෝෂන් දික්වැල්ල අතින් ගිලිහී යාම තරගයේ තීරණාත්මක සිදුවීමක් විය.
කේන් විලියම්සන් එංගලන්ත ඉනිම වෙනුවෙන් නොදැවී ලකුණු 121 රැස් කළ අතර ඔහුගේ ඉනිමට හතරේ පහර 11 ක් සහ එක් හයේ පහරක් ඇතුලත් විය.
ඩැරල් මිචෙල් ලකුණු 81 ක් ලබා ගත් අතර ඩැරල් මිචෙල් සහ කේන් විලියම්සන් සිව්වන කඩුල්ල සඳහා පන්දු 157කින් ලකුණු 142ක සබඳතාවක් ගොඩනැගුවේය.
පන්දු යැවීමේදී ශ්‍රී ලංකා පිල වෙනුවෙන් අසිත ප්‍රනාන්දු කඩුලු 3 ක් ප්‍රභාත් ජයසූරිය කඩුලු 02 ක්, සහ ලහිරු කුමාර සහ කසුන් රාජිත අතර එක් කඩුල්ල බැගින් බෙදී ගියේය.
පළමු ඉනිම සඳහා ලකුණු 102 ක් සහ දෙවැනි ඉනිම වෙනුවෙන් ලකුණු 81 රැස් කළ ඩැරල් මිචෙල් තරගයේ වීරයා සම්මානය දිනා ගත්තේය.