රට පුරා රෝහල් ගණනාවක ශ්වසන රෝග පිළිබඳ විශේෂඥ වෛද්‍යවරුන්ගේ(chest physicians) සැලකිය යුතු හිඟයක් දක්නට ලැබෙන බව සෞඛ්‍ය අංශ සඳහන් කරයි.
සෞඛ්‍ය අමාත්‍යංශයේ අභ්‍යන්තර ආරංචි මාර්ග සඳහන් කරන ආකාරයට මේ වන විට දිවයිනේ ශ්වසන රෝග පිළිබඳ වෛද්‍ය විශේෂඥයන් 30 දෙනකු සේවය කරන අතර, ඔවුන්ගෙන් 10 දෙනකුට ආසන්න පිරිසක් පසුගිය මාස කිහිපය තුළ රට හැරයෑම හේතුවෙන් රෝහල් කිහිපයක් එම වෛද්‍යවරුන්ගේ හිඟයකට මුහුණ පා ඇත.
එම ක්ෂේත්‍රයේ තවත් වෛද්‍යවරු පිරිසක් ද රට හැරයෑමට අනුමැතිය ඉල්ලා ඇත.
දැනට පවතින පුරප්පාඩු අතර කරාපිටිය ශික්ෂණ රෝහලේ පුරප්පාඩු දෙකක් සහ මහනුවර ජාතික රෝහලේ එක් පුරප්පාඩුවක් ද, වැලිසර ළය රෝහල, අවිස්සාවේල්ල මූලික රෝහල, කුරුණෑගල ශික්ෂණ රෝහල, අනුරාධපුර, මඩකලපුව, යාපනය, පොළොන්නරුව, අම්පාර සහ මන්නාරම දිස්ත්‍රික් මහ රෝහල්වල ද පුරප්පාඩුව බැගින් පවතී.
කෙසේවෙතත්, වෛද්‍ය වෘත්තිකයන් විශාල වශයෙන් රට හැර යෑමට හේතු වී ඇති ගැටලුවලට විසඳුම් ලබා දී නොමැති බවට පාර්ශ්ව කිහිපයකින් රජයට චෝදනා එල්ල වී තිබේ.
ශ්වසන වෛද්‍ය විද්‍යාව පුළුල් පරාසයක රෝග ආවරණය කරන අතර ඇදුම, සිස්ටික් ෆයිබ්‍රෝසිස්, අන්තරාල පෙනහළු රෝග සහ පෙනහළු බද්ධ කිරීම වැනි රෝග ඒ අතර වේ.
මේ අතර දෙහිඅත්තකණ්ඩිය මූලික රෝහලේ දැනට මාස 10කට වැඩි කාලයක් තිස්සේ විශේෂඥ ශල්‍ය වෛද්‍යවරයෙකු නොමැති වීම සම්බන්ධයෙන් කළ විමසීමකදී නැගෙනහිර පළාත් සෞඛ්‍ය සේවා අධ්‍යක්ෂ වෛද්‍ය ඩී.බී.එම්. කොස්තා පැවසුවේ පළාත් සභාව මගින් පාලනය වන ප්‍රධාන රෝහල් රැසක විශේෂඥ වෛද්‍යවරුන්ගේ බරපතළ හිඟයක් ඇති බවයි.
දෙහිඅත්තකණ්ඩිය, පොතුවිල්, මහඔය, කින්නියා, මුතූර් ඇතුළු මූලික රෝහල් සියල්ලේ ම විශේෂඥ වෛද්‍යවරුන් නොමැති බවත්, ඒ පිළිබඳව සෞඛ්‍ය අමාත්‍යංශය දැනුවත් කළ ද, මෙතෙක් ඊට පිළිතුරක් ලබාදීමට අමාත්‍යංශය සමත් වී නැති බවත් අධ්‍යක්ෂවරයා වැඩිදුරටත් සඳහන් කළේය.
විශේෂඥ වෛද්‍යවරුන් යොමුකිරීම පිළිබඳ නිශ්චිත වගකීම දරන සෞඛ්‍ය අමාත්‍යංශයේ තෘතීක සෞඛ්‍ය සේවා අධ්‍යක්ෂවරයාගේ පාර්ශ්වයෙන් මේ පිළිබඳව විමසීමේදී ඔහු පැවසුවේ මෙය රට පුරා පවතින තත්ත්වයක් බවයි.