ජාතික විභාග පැවැත්වෙන අවස්ථාවලදී විදුලිය කප්පාදු කිරීම වැළැක්වීමේ නියෝගයක් ලංකා විදුලිබල මණ්ඩලය ඇතුළු ආයතන වෙත නිකුත් කරන ලෙස ඉල්ලා ලංකා ගුරු සංගමය විසින් ගොනුකළ මුලික මිනිස් අයිතිවාසිකම් පෙත්සම සලකා බැලීම සඳහා ජූලි මස 14 වන දා කැඳවන ලෙස ශ්රේෂ්ඨාධිකරණය නියම කර තිබේ.
ඒ එම පෙත්සම අද (06) සලකා බැලීම සඳහා ප්රියන්ත ජයවර්ධන, අචල වෙංගප්පුලි සහ මහින්ද සමයවර්ධන යන ශ්රේෂ්ඨාධිකරණ විනිසුරු මඩුල්ල ඉදිරියේ කැඳවූ ලැබූ අවස්ථාවේදීය.
එහි වගඋත්තරකරුවන් ලෙස විදුලිබල හා බලශක්ති අමාත්යංශයේ ලේකම්වරයා, ලංකා විදුලිබල මණ්ඩලයේ සභාපතිවරයා, ඛනිජ තෙල් නීතිගත සංස්ථාවේ සභාපතිවරයා, ශ්රී ලංකා මානව හිමිකම් කොමිසම ඇතුළු පිරිසක් නම් කර ඇත.
අදාල පෙත්සමේ වගඋත්තරකරුවෙකු ලෙස නම් කර සිටින විභාග කොමසාරිස් ජනරාල්වරයාට යළි නොතීසි නිකුත් කරන ලෙස ද අධිකරණය විසින් නියම කර තිබේ.
ලංකා ගුරු සංගමයේ ලේකම් ජෝසප් ස්ටාලින් විසින් එම පෙත්සම ගොනුකර තිබුණු අතර පෙත්සම්කරුවන් පෙන්වා දෙන්නේ අපොස උසස් පෙළ විභාගය පැවැත්වෙන කාලසීමාව තුළ විදුලිය කප්පාදු කිරීමක් නොකරන බවට ලංකා විදුලි බල මණ්ඩලය සහ බලශක්ති අමාත්යාංශයේ ලේකම්වරයා විසින් ශ්රී ලංකා මානව හිමිකම් කොමිසමට ප්රතිඥාවක් ලබා දුන් බවය.
එම ප්රතිඥාව කඩකරමින් වගඋත්තරකරුවන් විදුලි බලය කප්පාදු කිරීම නිසා උසස් පෙළ විභාගය සඳහා පෙනී සිටින සිසුන්ට දැඩි අසාධාරණයක් සිදු වී ඇති අතර ඒ තුළින් ඔවුන්ගේ මුලික මිනිස් අයිතිවාසිකම් උල්ලංඝනය වී ඇති බවත් අදාල පෙත්සමෙන් පෙන්වාදෙයි.
මේ අතර අපොස උසස් පෙළ විභාගය පැවැත්වෙන කාලසීමාව තුළ විදුලිය කප්පාදුකිරීම වැළැක්වීමේ නියෝගයක් නිකුත් කරන ලෙස ඉල්ලා මහජන උපයෝගීතා කොමිසම (PUCSL) ගොනුකළ පෙත්සම සලකාබැලීම සඳහා මේ මස 8 වනදා කැඳවන ලෙස අභියාචනාධිකරණය නියම කළේය.
ඒ අදාල පෙත්සම අද (06) සෝභිත රාජකරුණා සහ ධම්මික ගනේපොල යන අභියාචනාධිකරණ විනිසුරු මඩුල්ල ඉදිරියේ කැඳවනු ලැබූ අවස්ථාවේදීය.
සබැඳි පුවත්
උ.පෙළ විභාග සමයේ විදුලි කප්පාදුව : මණ්ඩලයෙන් ප්රතිඥාවක් : හදිසියි, කල්දාන්න බෑ – ශ්රේෂ්ඨාධිකරණය