ලෝක කුසලාන විස්සයි -20 ක්රිකට් තරගාවලිය සමයේ ශ්රී ලංකා ක්රිකට් කණ්ඩායම සම්බන්ධයෙන් පැනනැගුණු සිදුවීම් සහ ශ්රී ලංකා ක්රිකට් ආයතනය ඒ සමයේ සිදුකරන ලද මූල්ය අවභාවිතාව සම්බන්ධයෙන් මතු ඇති චෝදනා පිළිබඳ සොයා බැලීම සඳහා පත්කරන ලද පංච පුද්ගල විමර්ශන කමිටුවේ වාර්තාව නීතිපතිවරයා විසින් අධ්යයනය කරමින් සිටින බව අතිරේක සොලිස්ටර් ජනරාල් සුමති ධර්මවර්ධන අද (20) අභියාචනාධිරණයට දැනුම් දී තිබේ.
එම අධ්යයනයෙන් අනතුරුව නීතිපතිවරයා සිය ස්ථාවරය ක්රීඩා අමාත්යවරයා වෙත දැනුම්දීමට නියමිත බවත් අතිරේක සොලිසිටර් ජනරාල්වරයා සඳහන් කළේය.
එමෙන්ම මෙම පරීක්ෂණ වාර්තාව ඊයේ (19) දින නීතිපතිවරයා වෙත ලැබුණු බවත් නීතිපතිවරයා එම වාර්තාවේ අන්තර්ගත කරුණු අධ්යයනය කරමින් සිටින බවද ඔහු පැවසීය.
අදාළ කමිටු වාර්තාව පදනම් කර ගනිමින් ශ්රී ලංකා ක්රිකට් ආයතනයේ ලියාපදිංචිය අහෝසි කිරීම වැළැක්වීමේ නියෝගයක් නිකුත් කරන මෙන් ඉල්ලා ශ්රී ලංකා ක්රිකට් ආයතනයේ සභාපති ෂම්මි ද සිල්වා සහ ශ්රී ලංකා ක්රිකට් ආයතනයේ ලේකම් මොහාන් ද සිල්වා විසින් ගොනු කළ පෙත්සම අද (20) කැඳවනු ලැබූ අවස්ථාවේදී අතිරේක සොලිස්ටර් ජනරාල් මේ බව අධිකරණය හමුවේ පවසා ඇත.
ඒ අනුව අදාළ පෙත්සම යළි පෙබරවාරි මස 01 වනදා කැඳවීමට අභියාචනාධිකරණය නියම කළේය.
අදාල විමර්ශන කමිටුවේ සභාපතිත්වය විශ්රාමික මහාධිකරණ විනිසුරු කුසලා සරෝජිනී වීරවර්ධන දැරූ අතර, විශ්රාමික නියෝජ්ය පොලිස්පති සුදත් නාගහමුල්ල, විශ්රාමික අමාත්යංශ ලේකම් කිංග්ස්ලි ප්රනාන්දු, විශ්රාමික රියර් අද්මිරාල් ආනන්ද පීරිස් සහ හිටපු ක්රිකට් ක්රීඩක නලින් ද අල්විස් මෙම විමර්ශන කමිටුවේ සාමාජිකයෝ වූහ.
සබැඳි පුවත්
ක්රිකට් කමිටු වාර්තාව එළියට – බෝන් අගේන් ක්රිකට්වලින් ඈත් කරන්න – නිර්දේශ ගණනාවක්!