ඝාතනය කෙරුණු ව්යාපාරික දිනේෂ් ෂාෆ්ටර්ගේ ජංගම දුරකතනයෙන් ක්රිකට් විස්තර විචාරක බ්රයන් තෝමස්ගේ දුරකතනයට කෙටි පණිවුඩයක් යොමු කර ඇත්තේ ව්යාපාරිකයා, බොරැල්ල පොදු සුසාන භූමියේදී අපරාධකරුවන්ගේ ගොදුරක් බවට පත්වීමෙන් අනතුරුව බව ඔහුගේ ඝාතනය සම්බන්ධයෙන් මෙතෙක් සිදු කර ඇති විමර්ශනවලින් අනාවරණය වී තිබේ.
එම කෙටි පණිවුඩය දිනේෂ් ෂාෆ්ටර්ගේ ඝාතකයා හෝ ඝාතකයන් විසින් බ්රයන් තෝමස්ගේ ජංගම දුරකතනයට යොමු කර ඇති බවට විමර්ශන අංශ සැක කරයි.
දිනේෂ් ෂාෆ්ටර් සමඟ මුදල් ගනුදෙනුවක් සම්බන්ධයෙන් ආරවුලක් පවතින ක්රිකට් විස්තර විචාරක බ්රයන් තෝමස්ගේ ජංගම දුරකතනයට දිනේෂ් ෂාෆ්ටර්ගේ ජංගම දුරකතනයෙන් ‘ඔයා එනකම් මම ඉන්නවා’ යන අදහස ඇති කෙටි පණිවුඩයක් යොමු වී ඇත.
මෙය සැකසහිත කෙටි පණිවුඩයක් බවට පත්ව ඇත්තේ එම කෙටි පණිවුඩය පස්වරු 2.30න් පසුව යොමුකර ඇති නිසා ය.
එම කෙටි පණිවුඩයට බ්රයන් තෝමස් ද පිළිතුරු පණිවුඩයක් යොමු කරමින් ‘මට ඔයා එක්ක කිසි කතාවක් නැහැ. මට ඔයාව හම්බවෙන්න වුවමනාවක් නැහැ’ යන අදහස ඇති කෙටි පණිවුඩයක් ඉංග්රීසියෙන් යොමු කර තිබේ.
මෙම ඝාතන සැලසුම්කරුවන් උත්සාහ ගත්තේ බ්රයන් තෝමස් ව එම ස්ථානයට ගෙන්වා, ඔහු මේ අපරාධයට කොටුකිරීමට විය හැකි බවට සැකයක් මේ වන විට මතුවී ඇත.
විමර්ශන අංශ වැඩිදුරටත් අනාවරණය කරගෙන ඇත්තේ කුරුඳුවත්ත, මල්පාරේ පිහිටි සිය නිවසේ සිට පසුගිය 15දා ෂාෆ්ටර් ගමන්ගත් මෝටර් රථය කෙලින් ම පැමිණ ඇත්තේ බොරැල්ල පොදු සුසාන භූමිය වෙත බවයි.
සබැඳි පුවත්
දිනේෂ් ෂාෆ්ටර් ඝාතනය : කෝටි ගණනක් ණයට ගත් ක්රිකට් විචාරකයෙක් ?