ප්රකට ව්යාපාරික දිනේෂ් ෂාෆ්ටර්ගේ ඝාතනය සම්බන්ධයෙන් අපරාධ පරීක්ෂණ දෙපාර්තමේන්තුව මගින් විශේෂ විමර්ශනයක් ආරම්භ කර තිබේ.
ජනශක්ති සමූහ ව්යාපාරයේ සභාපති ෂාෆ්ටර්ගෙන් රුපියල් කෝටි ගණනක ණයක් ලබාගත් ක්රිකට් විස්තර විචාරකයෙකු මූලික කරගෙන මෙම විමර්ශන පවත්වාගෙන යන බව එම දෙපාර්තමේන්තු ආරංචි මාර්ග සඳහන් කරයි.
මේ පිළිබඳව බොරැල්ල පොලීසිය විසින් සිදු කළ මූලික විමර්ශනවලදී අනාවරණය වී ඇත්තේ මියගිය අදාළ ව්යාපාරිකයා මෝටර් රථය තුළ යම් ශාරීරික හිරහැරයකට ලක්ව ඇති බවයි.
රුපියල් කෝටි ගණනක ණය මුදලක් ලබාදීමට නියමිත පුද්ගලයෙකු හමුවීම සඳහා පිටව යන බව බිරිඳට පවසා ඔහු නිවසින් පිටත්ව ගොස් තිබෙන බව පොලිස් විමර්ශන විමර්ශනවලදී අනාවරණය වී තිබේ.
පෙරේදා (14) දහවල් කුරුඳුවත්ත, මල්පාර ප්රදේශයේ පිහිටි සිය නිවසින් ඔහු පිටත්ව ගොස් තිබූ අතර, මඳ වේලාවකින් ඔහුගේ බිරිඳ දුරකතන ඇමතුමක් ලබාගෙන ඇත. එහෙත් දිනේෂ් ෂාෆ්ටර්ගේ දුරකතනය ක්රියාවිරහිත වී තිබූ බව ඇය පොලිසියට පවසා ඇත.
පසුව දුරකතන හරහා ලැබුණු GPS සංඥා අනුව ඔහුගේ දුරකතනය බොරැල්ල කනත්ත අසල තිබෙන බවට අනාවරණය කරගෙන තිබේ.
මේ සම්බන්ධයෙන් සැක සිතූ ඔහුගේ බිරිඳ ෂාෆ්ටර්ගේ සමාගමේ ඉහළ නිලධාරියෙකුට මේ බව දැනුම් දී, බොරැල්ල කනත්ත වෙත ගොස් පරීක්ෂා කරන ලෙස දැනුම් දී තිබේ.
පසුව ඔහු පැමිණ කළ සොයාබැලීමේදී ව්යාපාරිකයා පැමිණි මෝටර් රථයේ රියදුරු අසුන මත ඔහුගේ අත්දෙක ගැට ගසා ගෙලට වයරයක් දමා ඇති බව දැක තිබේ.
එහිදී වහාම ක්රියාත්මක වූ විධායක නිලධාරියා බොරැල්ල කනත්තේ සේවකයෙකුගේ සහාය ඇතිව ව්යාපාරිකයාගේ අත් දෙක සහ ගෙලට දමා තිබූ වයර් ඉවත් කර, ඔහුව කොළඹ ජාතික රෝහල වෙත ඇතුළත් කර ඇත.
කනත්තේ සේවය කරන සේවකයෙක් පොලීසිය වෙත ප්රකාශයක් ලබාදෙමින් පවසා ඇත්තේ ෂාෆ්ටර්ගේ මෝටර් රථය අසල සිට නාඳුනන පුද්ගලයෙක් පිටත්ව යන බව දුටු බවයි.
ප්රකට ක්රිකට් විස්තර විචාරකයෙකු රුපියල් කෝටි ගණනක ණය මුදලක් ෂාෆ්ටර්ගෙන් ලබාගෙන ඇති අතර, ඒ සම්බන්ධයෙන් අපරාධ පරීක්ෂණ දෙපාර්තමේන්තුව වෙත පැමිණිලි 3ක් ද ඔහු සිදු කර ඇති බව මාධ්ය වාර්තා කරයි.