නීතිපති සංජය රාජරත්නම්ගේ ධුර කාලය ඊයෙන් (26) අවසන් විය.
ඔහුගේ ධුර කාලය තවත් මාස හයකින් දීර්ඝ කිරීමට ජනාධිපතිවරයා කළ යෝජනාව ආණ්ඩුක්‍රම ව්‍යවස්ථා සභාව විසින් යළිත් වරක් ප්‍රතික්ෂේප කර තිබේ.
26 පස්වරු 6ට රැස්වූ ආණ්ඩුක්‍රම ව්‍යස්ථා සභාව පැවැත්වූ ඡන්දයෙන් අදාළ යෝජනාවට විරුද්ධව මන්ත්‍රීවරුන් 5 දෙනෙකු සහ පක්ෂව මන්ත්‍රීවරු 3 දෙනෙකු ඡන්දය භාවිත කර ඇති බව වාර්තා වේ.
මීට පෙර ද, නීතිපති සංජය රාජරත්නම්ගේ නිල කාලය දීර්ඝ කිරීම සඳහා ජනාධිපති රනිල් වික්‍රමසිංහ සිදු කළ නිර්දේශය ව්‍යවස්ථාදායක සභාව විසින් ප්‍රතික්ෂේප කරනු ලැබිණි.
නීතිපතිවරයාගේ සේවා දීර්ඝය පිළිබඳ ජනාධිපතිවරයා කළ නිර්දේශය සලකා බැලීමට අවස්ථා දෙකකදී ආණ්ඩුක්‍රම ව්‍යවස්ථා සභාව රැස්වුවත් අවසන් තීරණයක් ගැනීමට නොහැකි විය.
නීතිපතිවරයාට ලබන දෙසැම්බර් මස 31වනතෙක් සේවා දීර්ඝයක් ලබාදීමට ජනාධිපති රනිල් වික්‍රමසිංහ විසින් නිර්දේශ කර තිබිණි.
මීළඟ නීතිපතිවරයා ලෙස අතිරේක සොලිසිටර් ජනරාල් පාරින්ද රණසිංහ පත්කෙරෙනු ඇතැයි ද වාර්තා පළ වේ.