ශ්‍රී ලංකා පිතිකරුවෝ අවසන් පන්දුවාරයේ ජය ගෙනෙති

ශ්‍රී ලංකා කණ්ඩායම සහ ඇෆ්ගනිස්ථානු කණ්ඩායම අතර පැවති තරග තුනකින් යුත් එක්දින තරඟාවලිය 1-1 ලෙස සමකිරීමට ශ්‍රී ලංකා කණ්ඩායම අද(30) සමත්විය. ඒ තුන්වැනි සහ අවසන් තරඟයෙන් සංචාරක ඇෆ්ගන් කණ්ඩායම කඩුලු 4කින් පරාජය කරමින් ය.

පිට පිට තෙවැනි වරටත් කාසියේ වාසිය දිනාගත් ඇෆ්ගන් කණ්ඩායම මුලින්ම පන්දුවට පහරදුන් අතර පන්දුවාර 50 අවසානයේ කඩුලු 8ක් බිඳවැටී ලකුණු 313ක ප්‍රබල ඉලක්කයක් ශ්‍රී ලංකාවට ලබාදීමට ඔවුන් සමත්විය.එය දකුණු ආසියානු කණ්ඩායමකට එරෙහිව ඇෆ්ගන් කණ්ඩායම ලබාගත් ඉහළම එක්දින ලකුණු සංඛ්‍යාව වේ.

එහිදී ඊබ්‍රාහිම් සාර්දාන් ලබාගත් ලකුණු 162 ඇෆ්ගන් ක්‍රීඩකයෙක් එක්දින පිටියේ ලබාගත් ඉහළම ලකුණු සංඛ්‍යාව ලෙස වාර්තා පොතට එක්විය. ඔහුට අමතරව නජිබුල්ලා සාර්දාන් ලකුණු 77ක් ලබාගත්හ. පන්දු යැවීමේදී කසුන් රාජිත ලකුණු 60කට කඩුලු 3ක් සහ වනිඳු හසරංග ලකුණු 67කට කඩුලු 2ක් බිඳදමන ලදි.

පිළිතුරු ලෙස පන්දුවට පහරදුන් ශ්‍රී ලංකා පිතිකරුවන් ඉතා හොඳින් ලකුණු ඉලක්කය හඹා ගියද අවසන් මොහොතේදී තරගය තියුණු එකක් බවට පරිවර්තනය විය. එහෙත් අවසන් පන්දුවාරයේ හතරවැනි පන්දුවට අසලංක එල්ලකල හයේ පහර සමගින් ශ්‍රී ලංකාවට කඩුලු 4ක තියුණු ජයක් හිමිවිය.

එහිදී චරිත අසලංක නොදැවී ලකුණු 83ක්, කුසල් මෙන්ඩිස් ලකුණු 67ක්, නායක දසුන් ශානක ලකුණු 43ක් සහ යොවුන් ක්‍රීඩක දුනිත් වෙල්ලාලගේ නොදැවී ලකුණු 31ක් ලබාගැනීමට සමත්විය. පන්දු යැවීමේදී රශීඩ් කාන් ලකුණු 37කට කඩුලු 4ක් බිඳ හෙලීය.

තරඟයේ වීරයා ලෙස චරිත් අසලංක නම්කරනු ලැබූ අතර තරඟාවලියේ විරයා ලෙස තරඟ තුනේදී පිත්තෙන් ලකුණු 278ක් ලබාගත් ඊබ්‍රහිම් සාර්දාන් සම්මාන දිනාගන්නා ලදි.