ජනාධිපතිවරයාගේ ධුර කාලය වසර හයක් දක්වා වැඩිකිරීමට නම් ජනමත විචාරණයක් පැවැත්වීම අත්‍යවශ්‍ය ව්‍යවස්ථා ප්‍රතිපාදනයක් බව 19 වැනි ආණ්ඩුක්‍රම ව්‍යවස්ථා සංශෝධනය සකස් කිරීමේ නීති විශාරදයන්ගේ කමිටුවේ ප්‍රධානියකු වූ ජනාධිපති නීතිඥ ආචාර්ය ජයම්පතී වික්‍රමරත්න පැවසීය.
19 වැනි සංශෝධනයෙන් සිදුකරන ලද්දේ වසර හයේ සිට වසර පහ දක්වා ජනාධිපති ධුර කලාය අඩු කිරීම බවත්, එමගින් ජනතාවට තම පරමාධිපත්‍ය බලය අත්හදා බැලීමට නියමිත කාලයටත් පෙර අවස්ථාව ලැබෙන නිසා ඊට ජනමත විචාරණයක් අවශ්‍ය නොවන බවට ශ්‍රේෂ්ඨාධිකරණය තීරණය කළ බවත් ජනාධිපති නීතිඥවරයා වැඩිදුරටත් සඳහන් කළේය.
ආණ්ඩුක්‍රම ව්‍යවස්ථාවේ 83 වැනි වගන්තිය අදාළ වන්නේ ජනතාව ලබාදුන් ධුර කාලය වැඩිකර ගැනීමට බව ද පෙන්වා දුන් ඔහු, එම නිසා අදාළ වගන්තියේ සඳහන් වන ආකාරයට ධුර කාලය වැඩිකර ගන්නේ නම් අනිවාර්යෙන්ම ජනමත විචාරණයකට යා යුතු බව ද අවධාරණය කළේය.
එවකට ජනාධිපති මෛත්‍රිපාල සිරිසේන විසින් තමන් ද නියෝජනය කළ 19 වැනි ව්‍යවස්ථා සංශෝධන කමිටුවට උපදෙස් දුන්නේ ජනමත විචාරණයකට යෑමට හේතුවන සංශෝධන කිසිවක් ඇතුළත් නොකිරීමට බව ද ජනාධිපති නීතිඥවරයා අප කළ විමසීමේදී වැඩිදුරටත් පෙන්වා දුන්නේය.
19 වැනි ආණ්ඩුක්‍රම ව්‍යවස්ථා සංශෝධනයේ ඇති නීතිමය හිඩැසක් හේතුවෙන් ජනාධිපතිවරයාගේ ධුර කාලය වැඩි කර ගැනීමට රනිල් වික්‍රමසිංහ මහතාට ඉඩක් ඇතැයි විවිධ පාර්ශ්ව අදහස් පළකර තිබිණි.