ආන්දෝලනයකට තුඩුදුන් දෙහිවල සෝල් බීච් හෝටලය කඩාදැමීමේ සිද්ධිය සම්බන්ධයෙන් ශ්රී ලංකා මානව හිමිකම් කොමිෂන් සභාව නිර්දේශ නිකුත් කර තිබේ.
ඒ, අනුව වෙරළ සංරක්ෂණ හා වෙරළ සම්පත් කළමනාකරණ දෙපාර්තමේන්තුවේ අධ්යක්ෂ ජනරාල්වරයා මෙහිදී ක්රියාකර ඇති ආකාරය සම්බන්ධයෙන් පරීක්ෂණයක් සිදුකර සුදුසු පියවර ගන්නා ලෙස නාගරික සංවර්ධන හා නිවාස අමාත්යාංශ ලේකම්වරයා වෙත කොමිසම නිර්දේශ කර ඇත.
එමෙන්ම වගඋත්තරකාර පාර්ශ්වයන් මෙම සිදුවීම සම්බන්ධයෙන් ක්රියා කර ඇති ආකාරය පිළිබඳ පරීක්ෂණයක් සිදුකරන ලෙස පොලිස්පතිවරයා වෙත ද කොමිසම වැඩිදුරටත් නිර්දේශ කර තිබේ.
අදාළ කාලසීමාව තුළ සිදුවූ ආර්ථිකමය හානිය තක්සේරු කර එහි සේවකයින්ට සුදුසු වන්දි මුදලක් ගෙවන ලෙසත්, අත්තනෝමතික ලෙස ගොඩනැඟිල්ල කඩාදැමීමෙන් පැමිණිලිකරුවන්ට සිදුවූ හානිය සම්බන්ධයෙන් තක්සේරු කර රජය විසින් එම මුදල ගෙවිය යුතු බවත් එම නිර්දේශවල සඳහන් වේ.
දෙහිවල පිහිටි හෝටලයක් වූ සෝල් බීච් හෝටලය, ප්රධාන පෙළේ මත්ද්රව්ය ජාවාරම්කරුවෙකු ලෙස හැඳින්වෙන දැනට විදේශගතව සිටින ශිරාන් බාසික් නමැත්තාට අයත් බව පවසමින් පසුගිය ජනවාරි 01දා වෙරළ සංරක්ෂණ දෙපාර්තමේන්තු නිලධාරීන් විසින් පොලිස් නිලධාරීන්ගේ සහාය ඇතිව කඩා බිඳ දැමීමට පියවර ගෙන තිබිණි.