කොළඹ, ගෝල්ෆේස් පිටියේ කොඩි කණුව අසල තිබී අද (29) තවත් පිරිමි මළ සිරුරක් හමුවී තිබේ. පොලිසිය පවසන්නේ ඔහු ග්‍රෑන්ඩ්පාස් ප්‍රදේශයේ පදිංචිකරුවෙකු බවයි.
පසුගිය කාලයේදී ගෝල්ෆේස් අවට බටහිර වෙරළ තීරයෙන් සහ ඒ ආසන්නයෙන් මෙසේ මළ සිරුරු රැසක් සොයාගැනිණි. ඒ පිළිබඳව thetime.lk කළ විමසීමකදී පොලිසියේ ඉහළ නිලධාරියෙකු සඳහන් කළේ මෙම සියලු මලසිරුරුවල අනන්‍යතා සොයාගෙන ඇති බවයි. ඒ සියලු පුද්ගලයන්ගේ මරණයට හේතු සොයාගෙන ඇත්දැයි අප කළ විමසීමේදී ඔහු පැවසුවේ ඒ පිළිබඳ නිවැරදි තොරතුරු අදාළ පොලිස් ස්ථානවලින් ලබාගත යුතු බවයි.
එසේ බටහිර වෙරළ තීරයෙන් සහ ඒ ආසන්නයෙන් සොයාගැනුණු මළසිරුරු පිළිබඳ thetime.lk සකස් කළ තොරතුරු එකතුවක් පහත දැක්වේ.
- ගල්කිස්ස හරස් පටුමගේදී අවුරුදු 28ක් වයසැති පුද්ගලයෙකුගේ මළසිරුරක් අප්‍රේල් 25 දින සොයාගැනිණි.
- මැයි 28 දින මට්ටක්කුලිය, කාක දූපත වෙරළ තීරයට ගොඩ ගැසූ අවුරුදු 38ක් වයසැති පුද්ගලයෙකුගේ මළසිරුරක් හමු විය.
- ජූලි 26 දින වැල්ලවත්ත වෙරළ තීරයට ගොඩ ගැසූ අවුරුදු 34ක් වයසැති පුද්ගලයෙකුගේ මළසිරුරක් හමු විය.
- ජූලි 29 දින ගෝල්ෆේස් වෙරළ තීරයට ගොඩ ගැසූ අවුරුදු 19ක් වයසැති පුදගලයෙකුගේ මළසිරුරක් හමු විය.
- අගෝස්තු 01 දින ගෝල්ෆේස් වෙරළ තීරයට ගොඩ ගැසූ පිරිමි පුදගලයෙකුගේ මළසිරුරක් හමු විය.
- අගෝස්තු 16 දින රත්මලාන වෙරළ තීරයට ගොඩ ගැසූ පිරිමි පුද්ගලයෙකුගේ මළසිරුරක් හමු විය.
- කළුතර උතුර, කොට්ටම්බගහවත්ත ප්‍රදේශයේ මුහුදු වෙරළට ගොඩගැසූ නාඳුනන පුද්ගලයෙකුගේ මළසිරුරක් අගෝස්තු 27 හමු විය.
මෙසේ එක දිගට මළසිරුරු හමුවීම මේ වන විට සමාජයේ දැඩි කතාබහට ලක් වී තිබේ. ඒ පිළිබඳව ශ්‍රී ලංකා මානව හිමිකම් කොමිෂන් සභාව මගින් ද පොලිසියෙන් තොරතුරු ඉල්ලා තිබිණි.