ජන අරගලය පැවති 2022 වසරේ සිදු කළ විරෝධතාවයක් සම්බන්ධයෙන් අත්අඩංගුවට ගෙන ඇප මත නිදහස්ව සිටි පිරිසක් නිදොස් කොට නිදහස් කරන ලෙස අධිකරණයෙන් තීන්දුවක් ලබාදී තිබේ.
බත්තරමුල්ල, පොල්දූව මංසන්ධිය ආසන්නයේ දී කතානායකවරයාගේ නිල නිවස ඉදිරිපිට විරෝධතාවයේ නිරතව සිටි බවට තලංගම පොලිසිය මගින් අත්අඩංගුවට ගෙන කඩුවෙල මහේස්ත්‍රාත් අධිකරණයට ඉදිරිපත් කර ඇප මත සිටි එම සැකකරුවන් 13 දෙනා නිදොස් කොට නිදහස් කරන ලෙස කඩුවෙල මහේස්ත්‍රාත් චානිමා විජයබණ්ඩාර අද (05) නියෝග කළාය.
2022 මැයි 04 දින රටේ පැවැති තත්ත්වය සම්බන්ධයෙන් කතානායකවරයා දැනුවත් කිරීම සඳහා සංදේශයක් බාර දීමට යමින් සිටි සමාජ ක්‍රියාකාරීන් 13 දෙනකු මෙසේ තලංගම පොලිසිය මගින් අත්අඩංගුවට ගෙන පසුව මහරගම පොලිසියේ රඳවා තබා ගනිමින් අනතුරුව කඩුවෙල මහේස්ත්‍රාත් අධිකරණය වෙත ඉදිරිපත් කිරීමට කටයුතු කර තිබිණි.
එම අවස්ථාවේදී මෙම සැකකරුවන් 13 වෙනුවෙන් නීතිඥවරුන් එකසිය පනහකට ආසන්න සංඛ්‍යාවක් පෙනී සිටියහ. සංවිධානාත්මකව අයුතු ජන රාශිය ඇති කිරීම, අයුතු ජන රාශියක සාමාජිකයන් වීම , පොලිසියට සහ මහජනතාවට බාධා කිරීම ඇතුලු චෝදනා කිහිපයක් එල්ල කරමින් මෙම සැකකරුවන් වෙත පොලිසිය මගින් අධිකරණය හමුවේ චෝදනා පත්‍ර ගොනු කර තිබිණි.