දෙමළ ජාතික සන්ධානයේ නව නායකයා තෝරාගැනීම සදහා වන ඡන්ද විමසිම ජනවාරි 21 වැනිදා පැවැත්වීමට නියමිත ය.
එම ඡන්ද විමසීම ත්‍රිකුණාමලය ප්‍රදේශයේදී පැවැත්වීමට නියමිත අතර, එහිදී නව නායකත්වයට පාර්ලිමේන්තු මන්ත්‍රී එම්.ඒ. සුමන්දිරන් පත්කර ගැනිම කෙරෙහි සන්ධානයේ බහුතරයකගේ කැමැත්ත පවතින බවට වාර්තා වේ. කෙසේ වෙතත් දෙමළ ජාතික සන්ධානයේ නායකත්වය සදහා එම පක්ෂයේ තිදෙනකු ඉදිරිපත් වී ඇති අතර, ඒ අතරින් සුමන්දිරන් වෙත බහුතර ප්‍රසාදය හිමිව ඇත.
සුමන්දිරන්ට එරෙහි පාර්ශ්ව සඳහන් කරන්නේ ඔහු උතුරේ ජනතාවගේ ගැටළුවලට සෘජු ව ආමන්ත්‍රණය කිරීමට අපොහොසත් බවයි. එම නිසා දෙමළ ජාතික සන්ධානයේ නායකත්වයට ඔහු පත්වුවහොත්, වෙනත් පාර්ශ්ව විසින් සන්ධානය හැසිරවීමේ වැඩි ඉඩක් ඇතැයි ද එම පාර්ශ්ව සඳහන් කරයි.
මේ අතර සුමන්දිරන්ට පක්ෂ පාර්ශ්ව පෙන්වා දෙන්නේ ඔහු ජාතික නායකයකු ලෙස කැපීපෙනෙන භූමිකාවක් ඉටුකරමින් සිටින බවයි. එම නිසා මේ මොහොතේ සන්ධානයේ නායකත්වයට පත්විය යුත්තේ එවැනි භූමිකාවක් සහිත අයෙකු බව ඔවුහු පවසති.
දෙමළ ජාතික සන්ධානයේ නායක ආර්. සම්බන්දන් මේ වන විට රෝගී තත්ත්වයෙන් පසුවන අතර, මෙම නව නායකත්වය තේරීම සම්බන්දන්ගේ ම යෝජනාවක් අනුව සිදු වන බව එම සන්ධානයේ ප්‍රකාශකයෙක් thetime.lk වෙත පැවසීය.