ලංකාවෙ ක්‍රිකට් ගොඩනැගිලා තියෙන්නෙ තනිකරම මිථ්‍යාව මතද කියලා ප්‍රශ්නයක් මතුවෙන වීඩියෝවක් සංසරණය වෙනවා. ඒ යෙහාලි සංගක්කාරගෙ. එයා කියන විදියට සංගක්කාර සේරම සෙල්ලම් දාලා තියෙන්නෙ දෙවියන් වහන්සේගේ හයියෙන්. භානුක රාජපක්ෂගේ ඉඳලා ක්‍රීඩකයෝ කීප දෙනෙකුගේම නම් බෝර්න් අගේන්. ආගමික වැඩසටහනත් එක්ක කියවෙනවා. දැන් බලනකොට යෙහාලි ප්‍රේ කරලා තමයි සංගා 2014 ටීටුවෙන්ටි එකේ ලකුණු 50ක් ගහලා අපිට කප් එක අරන් දීල තියෙන්නෙ. ඒක එහෙමනම් වෙලා තියෙන්නෙ ඔය කුසලානය භාර ගන්නවද? ප්‍රතික්ෂේප කරනවද? ඇත්තටම දක්ෂතා පෙන්වලා ගන්න කුසලානයක් මිසක් ඔය වගේ දෙයියො යෙහාලිට දුන්නු එකක් අපිට මොකටද?.
කවුද ඔය ජෙරොම් ප්‍රනාන්දු කියන්නේ. මිනිහා ක්‍රිකටර් කෙනෙක් වෙලා ඉඳලා ආගමික නායකයෙක් වෙනවා. ඊට පස්සේ සේරම ක්‍රීඩකයො මිනිහගෙ ආගමික නිකායට සම්බන්ධ කර ගන්න හදනවා. සම්බන්ධ වෙන්න අකමැති එවුන් ටීම් එකෙන් පන්නන්න හදනවා. ඒකට ක්‍රිකට් නිලධාරීන්, කළමනාකාරවරුන් සේරම අල්ලලා තියන්න ඕනෙ. මොකක්ද මේ ලංකාවෙ සිද්ධ වෙන්නෙ.
ඊට පස්සෙ ක්‍රීඩකයොත් කියන්න ගන්නවා තමන්ට පනහක්, සීයක් ගහන්න පුළුවන් වුණේ දෙවියන් වහන්සේ නිසා කියලා. එතකොට උන්ගෙ ක්‍රිකට් දැනුමයි, තාක්ෂණයයි, දෑතෙ දෙපයෙ හයියයි සේරම දෙවියොද ?යෙහාලිගෙ අම්මගෙ බඩට යෙහාලිව දීලා තියෙන්නෙ දෙවියො. එතකොට මෙතන යෙහාලිගෙ තාත්තට රෝල් එකක් ඇත්තෙම නැද්ද. එයාගෙ තාත්තයි අපේ ක්‍රිකටුයි එක වගේ කියන්නද යෙහාලි හදන්නෙ.
දහඩිය මහන්සියෙන් ලංකාවෙ ක්‍රිකට් ගොඩනගපු අතීත පරපුරට කළ හැකි මීටත් වඩා ලොකු නින්දාවක් තියනවද?. යම් කෙනෙකුට ආගමික විශ්වාසයක් තියෙන්න පුළුවන්. ඒත් සියල්ල ආගමට පවරා දෙන්න කියලා අපි දන්න බුදුන්, යේසුස් හෝ නබිනායකතුමා කොතනකවත් කියලා නෑ. ඒ අය කියන්නේ තමන් මත විශ්වාසය තියන්න. ඒ කියන්නේ දැනුම හා ශක්තිය මත.
ඒ ආගම්වල නාමයෙන් හොර හැත්තක් බිහිවෙලා මොනවද මේ කරන්නෙ. හැමෝම උන්ට රැවටෙන්න ඕනෙද?.සංගක්කාරගෙ බිරිඳ ගැන කවුරුත් හිතන් හිටියෙ නවීන අදහස් ඇති කාන්තාවක් කියලයි. දැන් බලනකොට අපි නූතනයි කියලා හිතාගෙන ඉන්න අය තමයි නියම වහල්ලු.
හැබැයි ඉතිං සංගක්කාර ගත්තොත් ඇදහිල්ල විතරක් නෙවෙයි ගැහිල්ලත් හරියට කළා. අද ක්‍රීඩකයො ඇදහිල්ල විතරයි ගැහිල්ල නෑ.
සෙස් බද්ද ගැන කතාවක්
ආණ්ඩුවේ ඇමතිවරු කියන දේවල් පරස්පරයි. පාසැල් අභ්‍යාස පොත්, පැන්සල්, අඩිරූල්, කවකටු පෙට්ටි, සී.ආර් පොත්, චිත්‍ර පොත් යනාදිය අධික ලෙස මිල ඉහළ ගිහින්. සෙස් බද්ද වැඩිකිරීම හැම දේකම මිල ඉහළ යාමට බලපානවා. මුදල් රාජ්‍ය ඇමැති කියනවා සෙස් බද්ද පාසල් පොත් ඇතුළු ඉහත කී ද්‍රව්‍ය වලට අදාල නැහැ කියලා.
එහෙමනම් කොහොමද මේවා අධික ලෙස මිල ඉහල යන්නේ.
අධ්‍යාපන ඇමති සුසිල් ප්‍රේමජයන්ත කියනවා සෙස් බද්ද අභ්‍යාස පොත් සහ පංති කාමර මෙවලම් වලට අදාළව ඉවත් කරන්න තමන් පේපර්ස් ඉදිරිපත් කරලා තියනවා කියලා.එතකොට මුදල් රාජ්‍ය ඇමැති කියන්නේ බොරුද?.
මෙම මිල ඉහළ යෑම නිසා ලබන වසරේ පාසල් දරුවන් 30% ක් පාසැල් හැර යන තත්ත්වයක් උදාවී තිඛෙන බව සමාජ විශ්ලේෂකයන් කියනවා. ඒකට අභ්‍යාස පොත් ප්‍රශ්නෙ විතරක් නෙවෙයි, පුරවැසියන්ගේ දෛනික ආහාර ප්‍රශ්නයත් බලපානවා. දෙමාපියන්ගෙන් 35% කට තම දරුවා පාසල් යවන්න බැරි තත්ත්වයක් උදා වෙනවා. පිටු 200 සී.ආර් පොතක් රුපියල් 540යි. පිටු 80 චිත්‍ර පොතක් රු. 400යි. පාසැල් බෑග් එකක් රුපියල් 3500යි. සපත්තු කුට්ටමක් රු.4000 යි. වේලක් කන්න බැරුව ඉන්න මිනිස්සු ළමයෙක් ඉස්කෝල යවන්නේ කොහොමද? ඒත් ඇමැතිවරුන්ට රජ මගුල්. උන්ට මේ ප්‍රශ්න මොකුත් නැහැ. බීලා වැඩි වුණාම අහසටත් වෙඩි තියලයි යන්නේ. මන්ත්‍රීධුරයෙන් ගන්න පුලුවන් උපරිම වින්දනයත් ලබනවා. ජනතාව නිරා දුක් විඳිනවා.
ජනාධිපති කාර්යාලයේ කිරි තේ නෑ
ජනාධිපති කාර්යාලයේ වියදම් අඩුකර ගන්න කිරි තේ නවත්තලා. ප්ලේන් ටී විතරයි. කිරි ඕනෙ අයට කිරි බොන්න පුළුවන් සල්ලි ගෙවලා. මේවා විශිෂ්ට වැඩ කියලා රනිල්ගේ අනුගාමිකයෝ හිතනවා ඇති. ඒත් රටේ ධනය මංකොල්ල කාපු එවුන් දැක දැක නොදැක්ක ගානට ඉන්න රනිල් කිරි තේ එක නැවැත්තුවට වැඩක් නෑ. බැංකුවට රුපියල් බිලියන ගණන් පොලු තියපු එවුන් රනිල් ළඟ දැවටි දැවටී ඉන්නවා. ඉස්සෙල්ලා ඒ ණය අයකර ගන්නකෝ. එතකොට ජනාධිපති කාර්යාලයේ වැඩ කරන අයට කිරි තේ දෙන්න පුළුවන්. මහ බැංකුව බින්ඳ යාලුවගෙන් මුදල් අය කරගන්නකෝ. එතකොට ජනාධිපති කාර්යාලයේ වැඩ කරන අයට දවල් බත දෙන්නත් පුළුවන්. රාජපක්ෂලා වැඩේ දුන්න ඩොලර් ටික ගේන්න විදිහක් බලන්නකෝ. අඩුම තරමින් මේ සීනි බදු වංචාවෙන් වෙච්ච පාඩුව පියවගන්න වත් බලන්නකෝ එතකොට ජනාධිපති කාර්යාලෙ කාටත් transport ඇතුළු තවත් පහසුකම් දෙන්න පුළුවන්. මොකද වාහන නැහැ කියලා ඔයා ළඟ වැඩ කරන අය අඬ අඬා ඉන්නේ.
ආවා ආවා
බැසිල් රාජපක්ෂ ලංකාවට ආපු ගමන් සනත් නිශාන්ත කිව්වේ ගමට ගිහින් ඡන්ද ගන්න පුළුවන් රාජපක්ෂලාට විතරයි කියලයි. ඒ කියන්නේ බැසිල් එක්ක ගමේ යන්න හිතාගෙන වෙන්න ඇති.
සජබ පා.ම. මුජිබර් රහුමාන් කියලා තිබුණේ බැසිල් පිළිගන්න airport යන්න ඕනේ පොහොට්ටුවේ මන්ත්‍රීවරු නෙමෙයි අපරාධ පරීක්ෂණ දෙපාර්තමේන්තුවේ නිලධාරීන් කියලයි. ඇත්තටම ඇතුලේ ඉන්න ඕන අය එළියෙ ඉඳලා එළියෙ ඉන්න ඕනේ අය ඇතුලෙ ඉන්න එක ගැන රනිල් මොකද කියන්නේ. මොකුත්ම කියන්නේ නැද්ද. රනිල්ට අද ජාම බේරගන්න බැසිල් ඕනෙ.රනිල් අභියෝගය භාරගත්තා තමයි. ඒත් දැන් හුඟක් දේවල් සිද්ධවෙන්නේ විගඩම්කාරී විදිහට.
එළවපු රාජපක්ෂලා ආයෙ රටේ තීරණාත්මක බලයක් පතුරුවන්න ලෑස්ති වෙන කොට මොකද හිතෙන්නේ.
අද වෙනකොට ජනතාවගේ අපේක්ෂා ඇතුල් පැත්තට පත්තුවෙන සුරුට්ටු වගේ වෙලා. ජනතාවගේ කටවල් පිච්චෙන්න ඔන්න මෙන්න.