ඉන්දීය අගමැති නරේන්ද්‍ර මෝදිගේ ආණ්ඩුව විසින් , එරට ජම්මු කාශ්මීර ප්‍රාන්තයට ලබා දී තිබූ සුවිශේෂී තත්ත්වය අහෝසි කිරීමට 2019 වර්ෂයේ අගොස්තු 06දා ගත් තීරණය නීත්‍යානුකූල තීරණයක් බව ඉන්දීය ශ්‍රේෂ්ඨාධිකරණය ඊයේ (11) තීන්දු කළේය.
අගවිනිසුරු ඩී. වයි. චන්ද්‍රචුද් ප්‍රමුඛ පංච පුද්ගල විනිසුරු මඩුල්ලක් හමුවේ අදාළ නඩු විභාගය වසර ගණනාවක් පැවති අතර, ඊයේ දිනයේදී ඒ සම්බන්ධයෙන් ඔවුන් විසින් එකිනෙකට වෙනස් නඩු තීන්දු 03ක් ලබාදෙන ලදි.
කෙසේ වෙතත් අදාළ නඩු තීන්දු 03 ම මගින් ජම්මු කාශ්මීරය ඉන්දියාවේ සෙසු ප්‍රාන්තයක් හා සමාන මට්ටමට ගෙන එමින් ඉන්දීය ආණ්ඩුක්‍රම ව්‍යවස්ථාවේ 370 වගන්තිය අහෝසි කිරීමට ගෙන තිබූ තීරණය නීත්‍යානුකූල බව ප්‍රකාශ කෙරිණි.
විනිසුරුවරුන් තීරණය කර තිබුණේ 370 තාවකාලික වගන්තියක් බවත්, ජම්මු කාශ්මීරය විසින් අදාළ වගන්තිය මගින් ඉන්දියාවට සම්බන්ධ වන විට එය ස්වෛරීභාවයක් භුක්ති නොවිඳි බවත් ය.
ඒ අනුව ඉන්දියාවේ සෙසු ප්‍රාන්ත පරිදි ම ජම්මු කාශ්මීර ප්‍රාන්තයේ මැතිවරණය පැවැත්විය යුතු බවත්, එය ලබන වසරේ සැප්තැම්බර් 30දාට පෙර පැවැත්විය යුතු බවත් අධිකරණය සිය නියෝගය මගින් අවධාරණය කර තිබිණි.