අයි.සී.සී ග්‍රේණිගත කිරීම් අනුව T20 පන්දු යවන්නන් අතර පෙරමුණෙහි පසුවන රවී බිශ්නෝයිගේ ශ්‍රේණිගත කිරීම් වෙනස් වූ අයුරු. 2023. 11. 22 – ඔහු ශ්‍රේණිගත කිරීම් වල 19 වන ස්ථානයේ පසුවිය.
මෙම ලයිස්තුවේ ඔහුට ඉදිරියෙන් වූ එකම ඉන්දියානුවා වූ ආර්ශ්දීප් සිංග්ට 15 ස්ථානය හිමිව තිබුණි.
ඉන් ඉහළ එකඳු ස්ථානයක් හෝ ඉන්දියානුවෙකුට වෙන්ව තිබුණේ නැත.
ඉන්පසු දිනයේ එනම් නොවෙම්බර් 23 වන දා ඕස්ට්‍රේලියාව සහ ඉන්දියාව අතර, තරග පහකින් යුත් T20 තරගාවලිය ආරම්භ විය.
පළමු තරගයේ රවී බිශ්නෝයි පන්දුවාර හතරක් යවා ලකුණු 54ක් ලබා දුන් අතර දවා ගත්තේ එක කඩුල්ලක් පමණි.
නොවෙම්බර් 25 වන විට ඔහු T20 ශ්‍රේණිගත කිරීම් වල එක් ස්ථානයක් ඉදිරියට පැමිණ 18 වෙනි ස්ථානයේ පසුවිය.
නොවෙම්බර් 26 දෙවන T20 තරගය පැවැත්වුණි.
එහිදී රවී බිශ්නෝයි පන්දුවාර හතරක් යවා ලකුණු 32කට කඩුලු තුනක් දවා ගැනීමට සමත් විය.
නොවෙම්බර් 28 පැවැති තුන්වන තරගයේ රවී බිශ්නෝයි සිය පන්දුවාර හතර අවසානයේ ලකුණු 32කට කඩුලු දෙකක් දවාගෙන තිබුණි.
තරගාවලියේ සිව්වන තරගය දෙසැම්බර් 1 දා පැවැති අතර එම තරගයේ රවී බිශ්නෝයි සිය පන්දුවාර හතරට එක් කඩුල්ලක් දවා ගත්තේ ලකුණු 17කටය.
දෙසැම්බර් පළමුවැනිදා නවතම අයි.සී.සී ශ්‍රේණිගත කිරීම් අනුව රවී බිශ්නෝයි T20 ශ්‍රේණිගත කිරීම් වල පළමු ස්ථානයට පැමිණ තිබුණි.
ඒ අනුව ඔහු දින දහයක් තුල, තරග හතරකින් ශ්‍රේණිගත කිරීම් හි අංක 19 සිට අංක 1 දක්වා පැමිණීමට සමත්ව තිබේ.
එම තරග හතර තුල ඔහු දවාගෙන ඇත්තේ කඩුලු හතක් පමණි.
මෙය ක්‍රිකට් ඉතිහාසයේ ක්‍රීඩකයෙකු අඩුම කාලයකින්, අවම දක්ෂතාවයකින් ශ්‍රේණිගත කිරීම් වල ලබා ගත් ඉහළම දක්ෂතාවය ලෙස සැලකිය හැක.
23 හැවිරිදි රවී බිශ්නෝයි T20 තරග 21ක් ක්‍රීඩා කර කඩුලු 34ක් දවාගෙන තිබේ.
මෙය යම් ක්‍රීඩකයෙක් අවම තරග ගණනකින් ICC ශ්‍රේණිගත කිරීම් හි පෙරමුණට පැමිණි අවස්තාවක් ද වේ.