සෙලින්කෝ සමූහ ව්යාපාරයේ හිටපු අධිපති ලලිත් කොතලාවලගේ මරණ පරීක්ෂණයේ තීන්දුව ලබන 14 දින ප්රකාශයට පත්කරන බව කොළඹ අතිරේක මහේස්ත්රාත් පසන් අමරසිංහ ඊයේ (07) දැනුම් දී තිබේ.
කොතලාවලගේ මරණ පරීක්ෂණයට අදාළ වාර්තාව අධිකරණයට ලබා දෙන ලෙස දන්වා අධිකරණ වෛද්ය නිලධාරිවරයාට නොතීසි නිකුත් කරන ලෙස ද මහේස්ත්රාත්වරයා නියෝග කර ඇත.
කොතලාවලගේ මරණ පරීක්ෂණයට අදාළ සාක්ෂි ලබා දීම ඊයේ (07) අවසන් කෙරිණි.
මියගිය කොතලාවලගේ බිරියගේ සහෝදරියක වන ෂෙරින් පේෂන් විජේරත්න හා බම්බලපිටිය පොලිසියේ සැරයන් විමලරත්න (8764) මෙන්ම කොතලාවල යටතේ සේවය කළ සේවකයන් වන සෙලින්කෝ සමූහ ව්යාපාරයට සම්බන්ධ ගෝල්ඩන්කී තැන්පත්කරුවන්ගේ සංගමයේ ජූඩ් මාකෝ පෙරේරා, යූ.ඩී. රම්යා, සිසිර කුමාර සමරසිංහ, මහින්ද උපසේන වඩුගේ, සුනේත්රා කුමාරි රණසිංහ හා දිනේෂ් සඳරුවන් ජයවීර යන අය මෙහිදී සාක්ෂි ලබාදී තිබේ.
කොතලාවලගේ මරණය සැකසහිත බවට ඔහුගේ බිරියගේ සහෝදරියක වන ෂෙරින් පේෂන් විජයරත්න බම්බලපිටිය පොලිසියට කරන ලද පැමිණිල්ලක් මත මෙම නඩුව අධිකරණය හමුවේ ගොනුකර ඇත.
කොතලාවල අංක 28, එලිබෑන්ක් පාර, කොළඹ 5 ලිපිනයේ පදිංචිව සිටි නමුත් ඔහු යටතේ සේවය කළ කිහිපදෙනකුගේ අවශ්යතාව මත ඔහු ව අංක 13, ඩික්මන් පටුමග, කොළඹ 4 ලිපිනයෙහි පිහිටි නිවෙසක් වෙත ගෙනගොස් රඳවා තබා ගෙන ඇති බව ද සාක්ෂිකරුවන් විසින් ප්රකාශ කර තිබේ.
ඔහු යටතේ සේවය කළ කණ්ඩායම් දෙකක් ඔහුගේ දේපොළ අත්පත් කරගෙන ඇති බව ද එසේ දේපොළ අත්පත් කරගැනීම සඳහා කොතලාවලව අංක 13, ඩික්මන් පාර නිවසේ තබාගෙන සිට ඇති බවද එම මරණ පරීක්ෂණයේදී සාක්ෂිවලින් වැඩිදුරටත් හෙළි වූ බව සඳහන් ය.
කොතලාවල කොළඹ ප්රදේශයේ පිහිටි පෞද්ගලික රෝහලක ප්රතිකාර ලබමින් සිටියදී ඉකුත් 21 දින මියගොස් තිබූ බව මරණ පරීක්ෂණයේදී හෙළි විය.
මෙය ස්වභාවික මරණයක් නොවන බවට සාක්ෂිකරුවන් සිය සාක්ෂි ලබාදීම් මගින් අවධාරණය කර ඇත.