රොටියක් වගේ
පැතලි වුණා නම් පෘථිවිය
මං
යවනවා කඩදාසි කාක්කෙක්
පාත්වෙන්නට
අරාබියේ
ඉන්ද්රානි වැඩකරන සුල්තාන්ගෙ මන්දිරේට.
ඌ
යාවි එහෙම වුණා නම්
ඉන්දු නිම්න ශිෂ්ඨාචාරයට ම
සිංදුවක් කියාගෙන.
ඌ
කියාවි ඉන්ද්රානිට
උප නිවර්තන කලාප ගැන
අරාබි මුහුදු පතුලේ කොරල් පර ගැන
ක්රිටේසියස් මැඩගස්කරය ගැන
වෙරළ බඩ කඩොලාන පල්ලෙ පෙම් කෙළින
මූදු කකුළුවො ගැන.
පොකිරිස්සන්ගෙ ප්රේමාලිංගන වැල්වටාරම් ගැන
කැස්බෑවුන් විය සිදුරෙන් අහස බලන හැටි
හොම්බෙන් ගිහින් සාංකාවෙ හූල්ලන
නන්නත්තාර නිල් තල්මසුන් ගැන.
ඌ කියාවි ඉන්ද්රානිට
සින්ධූ නදිය බඩගාගෙන ඇවිත්
මූද බදාගන්න ලීලාව.
අනික
සූවස් ඇල දිගේ යන
යෝධ නැව්වල කප්පිත්තො
හවානා සුරුට්ටු උරන අපූරුව.
ඌ
කියාවි ඉන්ද්රානිට
රතු දුඹුරු කොළ ඇල්ගී පැතිරිච්ච මූද දැක්කම
අර ඔයා නිතර ම ඇඳපු
චීත්ත ගවුම මතක්වෙන බව.
මං දන්නව
අඩු පීඩන කලාප මඟෑරගෙන
අක්ෂාංශ දේශාංශ තඹේකට මායිම් නොකර
කඩදාසි කාක්කා
ඉන්ද්රානි ගිනිරාමෙට වැඩකරන
සුල්තාන්ගෙ මන්දිරේ කුස්සියට
කොහොම හරි රිංගන විත්තිය.
මොන කෙහෙම්මලකට
ගෝලාකාර වුණා ද පෘථිවිය……..?