ජාත්‍යන්තර විස්සයි20 ක්‍රිකට් තරගයකදී ලකුණු 08 කට කඩුලු 7ක් බිඳ දමමින් ලොව හොඳම පන්දු යැවීමේ වාර්තාවට හිමිකම් කීමට මැලේසියානු ක්‍රීඩක සයස්රුල් ඉද්‍රස් ඊයේ (26) සමත් විය.
2024 වසරේදී පැවැත්වීමට නියමිත විස්සයි20 ලෝක කුසලාන ක්‍රිකට් තරගාවලියට සුදුසුකම් ලබා ගැනීමේ තරගයකදී ඔහු මෙම ලෝක වාර්තාව තැබීමට සමත්විය.
මැලේසියාවේ ක්වාලාලම්පූර්හිදී පැවති තරගයේ පළමුව පන්දුවට පහර දුන් චීන කණ්ඩායමේ ඉනිම ලකුණු 23කට සීමා විය.
එහිදී සයස්රුල් ලකුණු 8ක් පමණක් ලබා දෙමින් කඩුලු 7 බිඳ දැමූ අතර ඒ පන්දුවාර 4කදී නිලකුණු පන්දු වාරයක් ද සමගිනි.
මීට පෙර මෙම වාර්තාවට උරුමකම් කීවේ ලකුණු 5කට කඩුලු 6ක් බිඳ දැමූ නයිජීරියාවේ පීටර් අහෝය.
අයිසීසී පූර්ණ සාමාජිකත්වය හිමි රටක් ලෙස විස්සයි20 ජාත්‍යන්තර තරගයකදී හොඳම පන්දු යැවීම වාර්තා කර ඇත්තේ ඉන්දීය ක්‍රීඩක දීපක් චාහර් වන අතර, ඔහු බංග්ලාදේශයට එරෙහිව ලකුණු 7කට කඩුලු 6ක් බිඳ දැමීමට සමත්විය.
කෙසේවෙතත් පිළිතුරු ඉනිම ක්‍රීඩා කළ මැලේසියාව කඩුලු දෙකක් දැවී පන්දුවාර 4.5කදී ජයග්‍රහණය තහවුරු කළේය.