ටෙලිකොම් ආයතනය සම්බන්ධයෙන් ආණ්ඩුව පාර්ශ්වයෙන් ගත තීරණ ප්රශ්න කළ එහි සභාපති රොහාන් ප්රනාන්දු අදාළ ආයතනයේ කොටස් මිලදී ගත මැලේසියානු සමාගමේ අවශ්යතාව මත හදිසියේ ම එම ධුරයෙන් ඉවත් කර තිබේ.
එම ධුරයට එහි අධ්යක්ෂ මණ්ඩල සාමාජිකයෙකු ලෙස කටයුතු කළ රියාස් මිහුලර් පත්කර ඇත. ශ්රී ලංකා ටෙලිකොම් අධ්යක්ෂ මණ්ඩලය අද (20) පෙරවරුවේ රැස්වූ අවස්ථාවේදී මෙම තීරණය ගෙන තිබේ.
ටෙලිකොම් පනත ප්රකාර ව අධ්යක්ෂ මණ්ඩලය වෙත හදිසියේ ඉදිරිපත් කරන යෝජනාවක් ලෙස මෙම යෝජනාව ඉදිරිපත කොට සම්මත කරගෙන ඇත. රියාස් මිහුලර් ටෙලිකොම් අධ්යක්ෂ මණ්ඩලයට පත්කර ඇත්තේ ජනාධිපති රනිල් වික්රමසිංහ විසින් ය.
ටෙලිකොම් අධ්යක්ෂ මණ්ඩලය අද (20) උදෑසන 9ට තමන්ගේ ප්රධානත්වයෙන් රැස්වූ බවත්, එහිදී අනපේක්ෂිත ලෙස සභාපතිවරයා ඉවත් කිරීමේ යෝජනාවක් ඉදිරිපත් වූ බවත්, එම යෝජනාව අධ්යක්ෂ මණ්ඩල සාමාජිකයන් 10 දෙනාගෙන් 6 දෙනෙකු අනුමත කළ බවත් මේ පිළිබඳව අදහස් දක්වමින් ටෙලිකොම් හිටපු සභාපති රොහාන් ප්රනාන්දු සඳහන් කළේය.
මෙවැනි යෝජනාවක් අද අධ්යක්ෂ මණ්ඩල රැස්වීමට අදාළ න්යායපත්රයේ සඳහන්ව නොතිබූ බව ද ඔහු පැවසීය.
වැඩිදුරටත් අදහස් දක්වමින් ඔහු සඳහන් කළේ මීට පෙර අදාළ මැලේසියානු සමාගම මගින් සඳහන් කර තිබුණේ සභාපතිවරයා මාරු කිරීම ඔවුන්ගේ කාර්යයක් නොවන බව යනුවෙනි. එහෙත් හදිසියේ ම එය වෙනස් වී ඇතැයි ද ඔහු පැවසීය.
සාමාන්යයෙන් ටෙලිකොම් ආයතනයේ සභාපති ධුරය පත්කිරීම හෝ වෙනස් කිරීම සම්බන්ධ තීරණ ගැනීමේදී එය මහා භාණ්ඩාගාරය මගින් දැනුම් දීමේ ක්රමවේදයක් ක්රියාත්මක වූ බවත්, එය මෙහිදී ක්රියාත්මක නොවූ බවත් මේ සම්බන්ධයෙන් අදහස් දක්වමින් එහි ජ්යෙෂ්ඨ නිලධාරියක සඳහන් කළේය.
2012 වසරේ සිට KPMG ගණකාධිකරණ ආයතනයේ කළමනාකරණ මණ්ඩල සාමාජිකයෙකු ලෙස කටයුතු කළ රියාස් මිහුලර්, 2018 වසරේදී එහි මැදපෙරදිග සහ දකුණු ආසියාව බාර ප්රධානියා ලෙස පත්කෙරිණි. රටවල් 14ක කාර්යාල 30කට අධික සංඛ්යාවක් පවත්වාගෙන යන KPMG හි 6,500කට අධික වෘත්තිකයෝ පිරිසක් සේවය කරති.