ප්‍රංශයේ පැවැත්වෙන 10 වැනි ලෝක පැරා මලල ක්‍රීඩා ශූරතාවයේ හෙල්ල විසි කිරීමේ ඉසව්වෙන් ලෝකඩ පදක්කමක් දිනා ගැනීමට පැරාලිම්පික් ශූර දිනේෂ් ප්‍රියන්ත ඊයේ (17) සමත් විය.
පිරිමි F46 කාණ්ඩය යටතේ හෙල්ල විසිකිරීමේ ඉසව්ව නියෝජනය කළ ඔහු ලෝකඩ පදක්කම හිමිකම් කීවේ මීටර් 65.38 ක දක්ෂතාවක් දක්වමිනි.
එම කාණ්ඩයේ පළමු ස්ථානය හිමි කර ගත්තේ මීටර් 65.41ක දස්කමක් දැක්වූ ඉන්දීයානු ක්‍රීඩක අජීත් සිං විසිනි.
මීටර් 65.38ක දුරක් වාර්තා කළ රින්කු හූඩා එහි දෙවැනි ස්ථානය පත්විය.
මෙය ලෝක මලල ක්‍රීඩා ශූරතාවයක දී දිනේෂ් දිනා ගත් තෙවැනි පදක්කම වූ අතර ඔහු මීට පෙර 2017 සහ 2019 තරගාවලිවල දී රිදී පදක්කම් දිනා ගැනීමට සමත් විය.
එමෙන්ම 2021 වසරේදී ජපානයේ ටෝකියෝ නුවර පැවැත්වුණු පැරාලිම්පික් උළෙලේ හෙල්ල විසි කිරීම F45 ඉසව්වට සහභාගි වුණු දිනේෂ් රන් පදක්කමකට හිමිකම් කීවේ නව ලෝක වාර්තාවක් ද පිහිටුවමිනි.
එම ඉසව්වේදී ඔහු වාර්තා කළ දුර ලෙස සටහන් වූයේ මීටර 67.79 කි. එමෙන්ම ඔහු 2016 වසරේ බ්‍රසීලයේ රියෝද ජැනයිරෝ පැරාලිම්පික් උළෙලට සහභාගී වී F45 ඉසව්ව නියෝජනය කරමින් ලෝකඩ පදක්කම දිනා ගැනීමට සමත් විය.
මෙවර ලෝක පැරා මලල ක්‍රීඩා ශූරතාවලියේ F64 කාණ්ඩයේ පිරිමි හෙල්ල විසිකිරීමේ ඉසව්ව සඳහා සහභාගී වූ සමිත දුලාන් එම ඉසව්ව මීටර් 64.06ක දුරක් වාර්තා කරමින් ලෝකඩ පදක්කම හිමිකර ගත්තේය.
2021 ටෝකියෝ නුවර පැවැත්වුණු පැරාලිම්පික් උළෙලේ F44 කාණ්ඩයෙන් ලෝකඩ පදක්කම දිනා ගත්තේ ද සමිත දුලාන් විසිනි.