පුරප්පාඩු වී ඇති අභියාචනාධිකරණ විනිසුරු ධුරය සඳහා නම් දෙකක් යෝජනා වී තිබේ.
මෙම නම් දෙක ජනාධිපතිවරයාගේ පාර්ශ්වයෙන් ව්‍යවස්ථාදායක සභාව වෙත යොමුකර ඇත. රුවන් ප්‍රනාන්දු විනිසුරුවරයා විශ්‍රාම ගැනීමත් සමග අභියාචනාධිකරණයේ මෙම පුරප්පාඩුව ඇති විය.
මෙම පුරප්පාඩුව සඳහා අගවිනිසුරු ජයන්ත ජයසූරියගේ පාර්ශ්වයෙන් මහාධිකරණ විනිසුරු චමත් මොරායස්ගේ නම යෝජනා කර ඇත. මහාධිකරණ විනිසුරු නම ලේඛනයේ ඉහළින් ම සිටින විනිසුරුවරයා මොරායස් බව අධිකරණ ක්ෂේත්‍රයේ ආරංචි මර්ග සඳහන් කරයි.
නීතිපති සංජය රාජරත්නම්ගේ පාර්ශ්වයෙන් මෙම පුරප්පාඩුව සඳහා ජ්‍යෙෂ්ඨ නියෝජ්‍ය සොලිසිටර් ජනරාල් මහේන් ගොපල්ලවගේ නම යෝජනා කර තිබේ.
ව්‍යවස්ථාවට අනුව ජනාධිපතිවරයා විසින් මෙම නම් දෙක, ව්‍යවස්ථාදායක සභාව වෙත යවා ඇති අතර, එමගින් අවසාන තීන්දුව ගත යුතුය.