පහ වසර ශිෂ්‍යත්ව විභාගය සහ අපොස සාමාන්‍ය පෙළ විභාගය තවදුරටත් පවත්වාගැනීමේ අවශ්‍යතාව සම්බන්ධයෙන් ජනාධිපති රනිල් වික්‍රමසිංහගේ ප්‍රධානත්වයෙන් ඊයේ (14) විශේෂ සාකච්ඡාවක් පවත්වා තිබේ.
ජනාධිපති මාධ්‍ය අංශය සඳහන් කරන්නේ නව ජාතික අධ්‍යාපන ප්‍රතිපත්තිය සැකසීම පිළිබඳව මේ සාකච්ඡාව පැවැත්වුණු බවයි. එම ප්‍රතිපත්තිය සැකසීමේ අමාත්‍ය කමිටුවට උපදෙස් ලබාදීම සඳහා පත්කළ විශේෂඥ කමිටුව සහ ජනාධිපතිවරයා අතර පැවති මෙම සාකච්ඡාවේදී විභාග කේන්ද්‍රීය අධ්‍යාපනය වෙනුවට වෘත්තිකයන් බිහිකිරීමේ නව අධ්‍යාපන ක්‍රම සහ විදේශ රටවල පිළිගත් අධ්‍යාපන පර්යේෂණ පිළිබඳව සාකච්ඡා කර තිබේ.
ජනාධිපති ලේකම් කාර්යාලයේදී පැවති මෙම සාකච්ඡාවේදී තාක්ෂණය සහ ඉංග්‍රීසි භාෂාව මූලික කරගත් අධ්‍යාපන ක්‍රමයක් සකස් කිරීමේ වැදගත්කම සහ වසර 13ක පාසල් අධ්‍යාපනයේ ප්‍රතිඵල සම්බන්ධයෙන් අවධානය යොමු කර ඇත.
අධ්‍යාපනඥයන් ද දිගින්-දිගටම අවධාරණය කරන ලද්දේ විභාග කේන්ද්‍රීය ව ක්‍රියාත්මක මෙරට පාසල් අධ්‍යාපන ක්‍රමය කඩිනමින් වෙනස් විය යුතු බවයි.
කෙසේ වෙතත් 2019 මාර්තු මාසයේදී ද මෙවැනි සාකච්ඡා වටයක් පැවැත්වුණද, අදාළ විභාග සම්බන්ධයෙන් කිසිදු තීරණයක් නොගැනිණි.